Lo Matiu Bee Ɛm

27 Sɔ̄ dee eyira, dɛ̄dɛɛ̄ pya tɛsī ewɔp le pya kanɛɛ loo pya nɛɛ bee gbaa biraloo lo efɛ Jizɔs. 2 Sɔ̄ ba ebɔba ye sah, ba bee ye ture ma Pailet alu nɛɛ aa bɛɛ lo barasī.

3 Sɔ̄ Judas nɛɛ a bee lɛɛ Jizɔs emɔna kɔ elua ebiaɛ kɔ alu efɛ ye, a bee ye kiɛ̄, e a obara 30 kpugi silva a ma pya tɛsī ewɔp le pya kanɛɛ, 4 sa kɔ: “M bee si pɔrɔ sɔ̄ m bee lɛɛ nɛɛ ue naa bee.” Ba kɔ ye nɛ: “Nyɔɔwo, ili i doo wa? Ɛp kɛ̄ o doo doo!”* 5 Nyɔɔwo, a bee top lo kpugi silva egara bu tɔkaɛ sa aa. Sa kii wee yaa eziī oo. 6 Mɛ pya tɛsī ewɔp bee su lo kpugi silva sa kɔ: “A naa bɔloo bu lok lo esu yere bu kɛ̄ a wee lu ekpooge kpugi bu tɔkaɛ nyɔnɛbee alu kpugi miī.” 7 Sɔ̄ ba egbaara yii bira sah, ba su lo kpugi yaā kere nam aābah nɛɛ dɛm baɛ̄ nua kɛ̄ li pya saanɛɛ. 8 Nyɔɔwo alu esu lo kere nam kure, Kere Nam Miī mmɛ nii’ee. 9 Lo sɔ̄ a bee lu edoo gbɔ̄mɛɛ nu nɛɛ mɔmanudɛɛ̄ Jeremaia bee kɔ, lo a kɔ: “E ba bee su 30 kpugi silva lo alu du ba bee kɔ loo lo nɛɛ, lo nɛɛ pio pya miɔŋɔ Izrɛl bee kɔ du loo, 10 sa ba kpɛ loo kere nam nɛɛ dɛm baɛ̄ dookɛ̄ ue Jɛhova bee mɛ kɔ nɛ le doo.”

11 Sɔ̄ a bee lu esu Jizɔs nua kɛ̄sī Pailet, a bee ye bip kɔ: “Lege olo na Mɛnɛ pya Juu ani?” Jizɔs ture ye nɛ kɔ: “Olo ekɔa.” 12 Mɛ sɔ̄ pya tɛsī ewɔp le pya kanɛɛ aa bee ye dɛrɛ ue, a naa bee kɔ lɔgɔ nu. 13 Lo sɔ̄ Pailet kɔ ye nɛ kɔ: “Oo dā pya nu aa lu ekɔ a kuma loo ama ni?” 14 Mɛ a naa bee ye ture lɔgɔ nu nɛ, kunɛ ziī bee ue, nyɔɔwo, a bee lu nyɛŋia loo Pailet.

15 A wee lu nu a wee le kɛ̄ kɔ ɛrɛgebah dee doonu, Pailet wee lɛa ziī nɛɛ kpɔgɔrɔ bah nɛ gbɛnɛkpo nɛɛ, ɛrɛgebah nɛɛ ba kɔ alu elɛa bah. 16 Taɛ lo sɔ̄, a ɛrɛ ziī e’agabah nɛɛ biu a bee le kpɔgɔrɔ a kura Barabas. 17 Nyɔɔwo, sɔ̄ ba ebɔŋanaloo, Pailet bip wa kɔ: “Mɛɛ na bui gbī kɔ m lɛa bah i nɛ a, Barabas sɛh Jizɔs alu ekure Kraist?” 18 Nyɔɔbee Pailet bee suā kɔ nyɔɔ emaanyiɛ ba ye ɛrɛ loo na anua ba su ye nua a. 19 Gbaāloo wo, sɔ̄ a bee le e’ɛŋɛtɛ̄ nyɔɔ kasi biaɛ, ye wa bee ye yere ue ma kɔ: “O aa doo lɔgɔ nu loo nɛɛ kaāna dogo ama nyɔnɛbee m tɔga gbɛnɛ anii’ee bu zagara m ye muɛ kumaloo.” 20 Mɛ pya tɛsī ewɔp le pya kanɛɛ bee zū gbɛnɛkpo nɛɛ a kɔ ba a bara kɔ alu elɛa Barabas bah sa alu efɛ Jizɔs. 21 Nyɔɔwo, Pailet bee sikɛ̄ wa bip kɔ: “Amunu yɛɛ baɛ aba na bui gbī kɔ m lɛa bah i nɛ?” Ba kɔ: “Barabas.” 22 Pailet kɔ wa nɛ kɔ: “Nyɔɔwo, ena bui gbī kɔ m doo loo Jizɔs nɛɛ alu ekure Kraist ama a?” Dɛ̄dɛɛ̄ aba bee kɔ: “Ka ye loo te!” 23 A kɔ: “Ena anua a? Amunu pɔrɔ nu na edora a?” Kerewo, ba bee kiisī lo ewii kpā agɛrɛ kɔ: “Ka ye loo te!”

24 Sɔ̄ Pailet emɔna kɔ ye ue naa dap nyaana lo kɛ̄tɔɔ̄ taāwo ba bee bɔātɛ̄ doo taāŋa, a bee su maā loŋa baɛ bah ye bie kɛ̄sī gbɛnɛkpo nɛɛ a sa kɔ: “Miī nɛɛ ama naa mɛ le bee. Bɔɔlo na a le bee a.” 25 Lo sɔ̄ dɛ̄dɛɛ̄ pya nɛɛ a bee kɔ: “Lɛɛbahloo kɔ ye miī a le bee ili le pya i miɔŋɔ.” 26 Lo sɔ̄ a lɛa Barabas bah wa nɛ, mɛ a bee kɔ alu ezip Jizɔs lɛɛ a lɛa ye bah wa nɛ kɔ alu eka ye loo te.

27 Lo sɔ̄ pya nɔ̄ nɛɛbee a bee su Jizɔs kuma tɔ mɛnɛ, e dɛ̄dɛɛ̄ eku pya nɔ̄ bee bɔŋanaloo ye tɛɛ̄ ɛŋɛnɛ. 28 E ba lɛɛ ye bɛloo loo sa su nyɔɔnyɔɔ bɛloo alu doh doh ye yere loo, 29 e ba lo suusuu pɛgɛrɛ ye yere bee sa su nwī-tum* ye yere bara bahle. E ba kunɛ zū kɛ̄ ye kɛ̄sī, ye kɛgɛ sa kɔ: “Kana muɛ, a Mɛnɛ pya Juu!” 30 E ba tup ye maāsah loo sa su lo nwī-tum ye lɛɛ bah, ye zimagi ekobee. 31 Bu kpɛdumɛ, sɔ̄ ba ekɛgɛ ye sah, ba bee ye lɛɛ lo nyɔɔnyɔɔ bɛloo loo sa su ye bɛloo deenyɔɔ ye yere loo sa ye kuma wee ka loo te.

32 Mɛ sɔ̄ ba aa kii li, ba bee zɔ̄ŋia ziī gbara a aa Sairini ye bee kura Saimɔn. E ba bee su bah ekpo ye aā kɔ a toora ye te tɔga* 33 E sɔ̄ ba bee ina kɛ̄ alu ekure Gɔlgɔta, lo a kura, kɛ̄ ekpo ekobee, 34 ba bee ye nɛ mii alu esu sīleg* gwaā, mɛ sɔ̄ edaara nu, a naa bee yiga e’ɔ̄. 35 E sɔ̄ ba ekaa ye loo te, ba bee dɔnia ye bɛloo yɛɛ wa tɛ̄maloo do nam, 36 e ba ɛŋɛtɛ̄ lo kɛ̄ sa wee ye ɛp. 37 E ba bee ɛmnage nu alu edɛrɛ ye ye sere nyɔɔ ekobee lo a kɔ: “Alɛ ama na Jizɔs Mɛnɛ pya Juu a.”

38 E a bee lu eka baɛ nɛɛ biu ye gbaāloo, ziī aba bara bahle ye, e ziī aba bahkie ye. 39 E pya a gaa bee tɛɛ̄ bee ye kɔ pɔrɔ pɔrɔ ue kumaloo sa pigere bee wa 40 sa kɔ: “Olo o wee kɔ o fee e tɔkaɛ tɛrɛ kɛ̄ sa o siekɛ̄ wu bu taa biradee, kpɔā oloo! Lo a le o lege Nwiīnɛɛdam Bari, sira kɛ̄ aa nyɔɔ te tɔga* a kɛ̄!” 41 Bu aba lo sīdee, pya tɛsī ewɔp le pya ɛm kpa le pya kanɛɛ bee ye kɛgɛ sa kɔ: 42 “A bee kpɔā pya dɔɔ̄na; mɛ a naa dap kpɔā aba ɛɛ! Lo a le a lege Mɛnɛ pya Izrɛl; doolo a aa nyɔɔ te tɔga* sira kɛ̄, e i yira ye nɛ. 43 A ture nyiɛ loo Bari, doolo a ye kpɔā anyaawo lo a gbī ye, nyɔɔbee a kɔ, ‘Mda mm Nwiīnɛɛdam Bari.’” 44 Bu aba lo sīdee, pya biu a bee lu eka loo te ye kpaɛ̄ bee ye gbɛnage.

45 Aā ini’ī sɔ̄ awa* kiisī, zii bee mma dɛ̄dɛɛ̄ kɛ̄ bu nyɔuwe mmɛ ɛrɛnia sɔ̄ awa.* 46 Bu nu alu ɛrɛnia sɔ̄ awa, Jizɔs bee su gbɛnɛ muɛ̄ wimakpā kɔ: “Eli, Eli, lamasabaktani” lo a kura, “Na Bari, na Bari, ena anua o lɛɛ mɛ bahloo bie a?” 47 Sɔ̄ pio pya a bee le lo kɛ̄ edaā lo ama, ba kɔ: “A gaa kue Elaija.” 48 E aba lo sɔ̄, ziī aba bee teera sa su ewoo* ka bu mii vine eyima sa yere bee ekpote ye nɛ kɔ a ɔ̄. 49 Pya elua a bee kɔ: “Lɛɛ ye bahloo! I naa ɛp lo a le Elaija eluge wee kpɔā ye.” 50 Jizɔs bee sinagekɛ̄ su gbɛnɛ muɛ̄ wimakpā, lɛɛ a sere ye kpɛdumɛ piogi.*

51 E ɛp! bɛ fima tɔkaɛ bee baara baɛ, aā nyɔɔ mmɛ kɛ̄, e kɛnɛkɛ̄ bee nyɔŋa sa bagi dɛm. 52 Gbɛnɛ-edo bana luh bee kpaā, e gbɛnɛ-edo ekpaloo pya kaɛ* ebee u bee bua aakɛ̄ 53 (sɔ̄ Bari elɛra Jizɔs kɛ̄ bu luh sah, gbɛnɛ-edo pya a bee aa kɛ̄ pya kpoli a le kii buɛ̄ kaɛ) bee wa muɛ. 54 Mɛ sɔ̄ nɛɛbee nɔ̄ le pya a bee ye le loo lo ba aa bee baɛloo Jizɔs bee muɛ nyɔŋa kɛnɛkɛ̄ a le dɛ̄dɛɛ̄ nu a sira, bɔɔ bee wa aa gbɛnɛ sa ba kɔ: “Bu kaka nɛɛ ama bee le Nwiīnɛɛdam Bari.”

55 E gbɛnɛ-edo pya nɛɛwa lo ba bee nyɔɔnɛ Jizɔs aa Galilii lo esitam ye nɛ, bee le eyira kɛ̄ a binia sa gaa ɛp; 56 Meri Magdelin le Meri lo a le ka Jems le Josis le ka miɔŋɔ Zɛbidii bee wa le yɛɛ.

57 Sɔ̄ e’ina aa lu loo uunɛ, ziī nɛɛ mɛnɛ a kura Josɛf a wee nyɔɔnɛ dumɛ Jizɔs alu Arimatia bee lu. 58 Lo gbara bee siloo Pailet sa bara ii Jizɔs. E Pailet bee nɛ lok kɔ alu enɛ ye. 59 Josɛf bee su ye ii sa su ɛɛ ekpedɛɛ̄ bɛ linen ye pigara loo, 60 sa ye su maɛ̄ bu ye aā kpoli a bee togara bu dɛm. E sɔ̄ a ekigere gbɛnɛ eba dɛm yere nudee kpoli a sah, a bee aa. 61 Mɛ Meri Magdelin le lo dɔɔ̄na Meri bee bia lo kɛ̄ sa ɛŋɛtɛ̄ lera sī lo kpoli.

62 Pya nu ama bee sira nyɔɔ dee ba gaa bee Kpɛ̄naloo loo Dee Fɛɛrɛloo, e dee a za nyɔɔnɛ pya tɛsī ewɔp le pya Farisii bee gbaa bɔŋana kɛ̄sī Pailet, 63 sa kɔ: “Nɛɛ-a-i-ɛrɛ, i nyɛŋia bu nu nɛɛ dag ama bee kɔ sɔ̄ a bee le dum kɔ, ‘Sɔ̄ taa biradee etɛ̄na, elu elɛɛ mɛ kɛ̄ bu luh.’ 64 Nyɔɔwo, nɛ lok kɔ alu ebaɛloo kpoli a mmɛ lo eree taa biradee, lokwa pya a wee ye nyɔɔnɛ dumɛ naa si wee yib ye e’aā lɛɛ ba kɔ nɛ pya nɛɛ kɔ ‘elua elɛɛ ye kɛ̄ bu luh!’ Lo sɔ̄ lo kpɛdumɛ dag ama ebee piya ee lo tuatua.” 65 Pailet bee wa kɔ nɛ kɔ: “Suaa pya baɛloo sa bui kpɛga kɛ̄ a dookɛ̄ bui dap doo.” 66 Nyɔɔwo, ba bee kii sa su nu bɛā kpoli a sa su pya baɛloo sere lo kɛ̄.