Lo Luk Bee Ɛm
23 Nyɔɔwo dɛ̄dɛɛ̄ gbɛnɛkpo nɛɛ a bee aakɛ̄ sa ye su ma Pailet. 2 Lo sɔ̄ ba bee bɔātɛ̄ edɛrɛ ye ue kɔ: “I muɛ nɛɛ ama a gaa dagɛ pya i edonyɔɔ, a kɔ a naa bɔloo ekpɛ etup nɛ Siza le kɔ alɛ na Kraist alu mɛnɛ a.” 3 Lo sɔ̄ Pailet bip ye kɔ: “Lege olo na Mɛnɛ pya Juu ani?” A ture ye nɛ kɔ: “Olo ekɔa doo wo.” 4 Lo sɔ̄ Pailet bee kɔ nɛ pya tɛsī ewɔp le gbɛnɛkpo nɛɛ a kɔ: “Mm muɛ lɔgɔ pɔrɔ nu nɛɛ ama doo.” 5 Mɛ ba bee agɛrɛbah kɔ: “Ye tɔgɛnu yere taāŋa yɛɛ pya nɛɛ bu dɛ̄dɛɛ̄ Judia, bɔātɛ̄ aā Galilii mmɛ akɛāma.” 6 Sɔ̄ Pailet edaā doo wo, a bee bip lo a le Jizɔs lu Galilii. 7 Sɔ̄ esuā kɔ a aa barasī Hɛrɔd gaa bɛɛ, a bee ye yere ma Hɛrɔd, lo a bee lenage Jerusɛlɛm bu lo gbo dee.
8 Sɔ̄ Hɛrɔd bee muɛ Jizɔs, bu ye bee ɛɛ kaāna. Nyɔnɛbee bu nyɔɔnyɔɔ sɔ̄ a gaa bee ye taɛ lo emuɛ Jizɔs, nyɔɔbee ebee dā gbɛnɛ-edo nu a ye kiiloo, e aa bee ɛmadɛɛ̄ kɔ edoo pio nyɛŋiatam ye bie kɛ̄sī. 9 Nyɔɔwo, a bee ye su nyɔɔnyɔɔ sɔ̄ bima ebip mɛ a naa bee ye ture lɔgɔ nu nɛ. 10 Kerewo, pya tɛsī ewɔp le pya ɛm kpa bee aakɛ̄ sa ye dɛrɛ ue bu bah ekpo. 11 Lo sɔ̄ Hɛrɔd le pya ye nɔ̄ bee ye gbɛ sa ye su nua nu mɔm tɛ̄maloo eyere ye ekpedɛɛ̄ bɛloo loo sa ye obara ma Pailet. 12 Hɛrɔd le Pailet bee sikɛ̄ lu gbo taɛ lo dee, nyɔnɛbee lɛɛ a gae lu lo dee ba wee baaloo ziī.
13 Lo sɔ̄ Pailet bee kue pya tɛsī ewɔp le pya bɛbɛɛ le pya nɛɛ bɔŋɛnɛloo 14 sa wa kɔ nɛ kɔ: “Bui bee su nɛɛ ama mɛ ma kɔ a doo kɔ pya nɛɛ a lɛɛbeekɛɛ̄. Mɛ ɛp! m ebiba ye ebip i bie kɛ̄sī mɛ mm muɛ lɔgɔ nu a tɔgɛ kɔ a doo nu bui ye dɛrɛ. 15 Bu kaka, Hɛrɔd naa muɛnage lɔgɔ nu, nu anua a obara ye i ma lo, e ɛp! a sii doo lɔgɔ nu a bɔloo luh. 16 Nyɔɔwo, m kpɔ ye te loo sa m ie ye.” 17* —— 18 Mɛ gbɛnɛkpo nɛɛ a bee kɔ: “Fɛ nɛɛ ama* sa o lɛa Barabas bah i nɛ!” 19 (Bee lu eyere nɛɛ ama kpɔgɔrɔ nyɔɔbee a be bɛbɛɛ sa fɛ nɛɛ.) 20 Pailet bee wa sinagekɛ̄ kɔ ue nɛ, nyɔnɛbee aa bee gbī elɛa Jizɔs bah. 21 Lo sɔ̄ ba bɔātɛ̄ ewiikpā kɔ, “Ka ye loo te! Ka ye loo te!” 22 A bee wa kɔ nɛ lo eree taa sɔ̄ kɔ: “Ena anua a? Amunu pɔrɔ nu na nɛɛ ama doo a? Mm muɛ lɔgɔ nu a doo a tɔgɛ kɔ a bɔloo luh; m kpɔ ye te loo sa m lɛa ye bah.” 23 Mɛ ba bee kiisī lo ekɔ agɛrɛ sa dana muɛ̄ nɛ nyɔɔ kɔ alu efɛ* ye mmɛ sɔ̄ Pailet yiga. 24 Nyɔɔwo, Pailet bee biaɛfii kɔ alu edoo nu ba kɔ. 25 A bee lɛa nɛɛ ba gaa bee gbī a bah, nɛɛ a bee lu eyere kpɔgɔrɔ nyɔɔbee a be bɛbɛɛ sa fɛ nɛɛ, mɛ a bee lɛa Jizɔs bah wa nɛ kɔ ba a doo ye nu ba gbī.
26 Sɔ̄ ba aa ye su aā, ba bee aa Saimɔn alu Sairini lo aa bee tɛɛ̄ yii bu buɛ̄ a, e ba bee su lo te tɔga ye nɛ kɔ a toora nyɔɔnɛ Jizɔs. 27 Gbɛnɛ-edo nɛɛ bee ye nyɔɔnɛ gbaāloo pya nɛɛwa lo ba gaa bee ziaga bah beenyiɛ wa bu ekiɛ̄nu sa ye to nyɔɔnɛ. 28 Jizɔs bee kiiya ɛp pya nɛɛwa a sa kɔ: “Miɔŋɔ nɛɛwa Jerusɛlɛm, bui aa mɛ to nyɔɔ. Toaa nyɔɔ aba bui le pya bui miɔŋɔ; 29 mɛ ɛp! gbo dee gaa lu sɔ̄ pya nɛɛ ekɔ, ‘Ɛɛbu a le nɛ waa ziina, bu a naa maɛ̄ nwiī le wa a naa nɛ ma nwiī!’ 30 Lo sɔ̄, ba ebɔātɛ̄ ekɔ nɛ egu kɔ, ‘Dɔ i nyɔɔ!’ E ba ekɔ nɛ nwīkpokɛ̄ kɔ, ‘Uuwa i nyɔɔ!’ 31 Lo a le ba doo lo ama sɔ̄ te le dum, ena ba edoo sɔ̄ te ekaga a?”
32 Ba bee sunage baɛ nɛɛ bag dogo ye gbaāloo kuma kɛ̄ ba efɛ wa. 33 E sɔ̄ ba ina kɛ̄ alu ekure Ekpo Ekobee, ba bee ye ka loo te gbaāloo baɛ lo nɛɛ bag dogo, ziī aba bara bahle ye, e elua a bara bahkie ye. 34 Mɛ Jizɔs bee kɔ: “Tɛ, aaloo wa nɛ nyɔnɛbee ba naa suā nu ba gaa doo.” Gbaāloo wo, ba bee dɔnia ye bɛloo tɛ̄maloo edo nam. 35 E pya nɛɛ bee yira sa ye ɛp. Mɛ pya aa bɛɛ bee ye su nua nu mɔm sa kɔ: “A bee kpɔā pya dɔɔ̄na, doolo a kpɔā aba ɛɛ lo a lege alɛ na Kraist lo Bari yere, Nɛɛ a bee lu esagɛ.” 36 Pya nɔ̄ bee ye sunage nua nu mɔm, e ba bee ye nɛ mii enyima 37 sa kɔ: “Lo a le o lege Mɛnɛ pya Juu, kpɔā aba ɔɔ.” 38 Ba bee ɛm nu nyɔɔ eba nu, ka loo te nyɔɔ ye ekobee kɔ: “Mɛnɛ pya Juu na ama.”
39 Lo sɔ̄ ziī nɛɛ bag dogo a bee lu eka ye bara kpaɛ̄ bee bɔātɛ̄ egbɛ ye sa kɔ: “Naale olo na Kraist a? Kpɔā oloo sa o kpɔānage ili!” 40 Mɛ elua aba a bee ye kɔgara ue kɔ: “Ekɔ oo ɛrɛ bɔɔ loo Bari kere sɔ̄ nɛɛ ama le ɔɔ aa gbaa tɔga ni? 41 Bu kaka, ili aa tɔga nyɔɔ nu i bee doo, mɛ nɛɛ ama naa doo lɔgɔ pɔrɔ nu.” 42 Lo sɔ̄ a kɔ: “Jizɔs, nyɛŋia mɛ bu sɔ̄ o ina bu o Buɛ̄-mɛnɛ.” 43 E Jizɔs bee ye kɔ nɛ kɔ: “Kaka, m kɔ a nɛ anii’ee, o le mɛ loo bu Paradais.”
44 Lo sɔ̄, ebee dap lu ini’ī sɔ̄ awa,* mɛ zii bee yii dɛ̄dɛɛ̄ buɛ̄ a mmɛ ɛrɛnia sɔ̄ awa,* 45 nyɔnɛbee zue naa bee mɔna; sa eba bɛ fima tɔkaɛ bee baara baɛ. 46 Lo sɔ̄, Jizɔs su gbɛnɛ muɛ̄ wimakpā kɔ: “Tɛ, kɛ̄bah a na m sere na edɔɔ̄ a.” E sɔ̄ ekɔa doo wo sah, a bee u.* 47 Sɔ̄ nɛɛ nɔ̄ muɛ nu a bee sira ama, a bee bɔātɛ̄ enɛ ka Bari sa kɔ: “Bu kaka, nɛɛ ama bee le nɛɛ kaāna dogo.” 48 Sɔ̄ gbɛnɛkpo nɛɛ a bee le ebɔŋana gaa si ee nu muɛ nu a sira, ba bee obia kii be sa ziaga bah beenyiɛ wa bu ekiɛ̄nu. 49 E dɛ̄dɛɛ̄ pya a ye suāloo bee yira kɛ̄ a binia. Gbaāloo wo, pya nɛɛwa a bee ye nyɔɔnɛ aa Galilii bee lenage lo kɛ̄ sa muɛ pya nu ama.
50 E ɛp! a ɛrɛ ziī gbara a kura Josɛf lo a wee sitam bu Bɔŋanaloo Tɔbiaɛ,* e a bee le nɛɛ a lee sa kaāna. 51 (Gbara ama naa bee yerekpotɛ̄ lɔgɔ nu ba aa bee nɔɔ̄ sa doo.) A bee le nɛɛ Arimatia, ziī buɛ̄ pya Judia, e a gaa bee tɔɔ̄ baɛ Buɛ̄-mɛnɛ Bari. 52 Gbara ama bee si loo Pailet sa bara ii* Jizɔs. 53 E a bee ye su lɛɛ nyɔɔ te a sa su le bɛ linen ye pigara loo, e a su ye maɛ̄ bu kpoli* a bee lu etogara bu dɛm, kɛ̄ a sii lu emaɛ̄ lɔgɔ nɛɛ. 54 Mɛ a bee le dee Kpɛ̄naloo nyɔnɛbee Dee Fɛɛrɛloo ebee sa ebɔātɛ̄. 55 Mɛ pya nɛɛwa a bee ye nyɔɔnɛ aa Galilii a bee wa nyɔɔnɛ sa ɛp kɛ̄ alu emaɛ̄ ye bu lo kpoli,* 56 e ba bee obia kii wee kwa nɔɔ̄ le nu a wee si lele nuloo. Mɛ ba bee seea nyɔɔ dee Fɛɛrɛloo dookɛ̄ Lok kɔ doo.