Lo Maak Bee Ɛm

13 Sɔ̄ a gaa aabu tɔkaɛ, ziī nɛɛ yɛɛ pya a wee ye nyɔɔnɛ dumɛ bee ye kɔ nɛ kɔ: “Nɛɛ Tɔgɛnu, ɛp kɛ̄ pya tɔ a le bu tɔkaɛ le kɛ̄ pya dɛm alu esu wuā kpedɛɛ̄ doo a!” 2 Kerewo, Jizɔs bee ye kɔ nɛ kɔ: “O muɛge gbɛnɛ tɔ ama ni? Naale elu elɛɛbahloo lɔgɔ ekpodɛm bie nyɔɔ ziī sa a naale elu etaā bahloo tɛrɛ kɛ̄.”

3 Sɔ̄ a bee le e’ɛŋɛtɛ̄ nyɔɔ kpokɛ̄ Olive, kɛ̄ a bee le aa yira muɛ tɔkaɛ, Pita, Jems, Jɔn, le Andru bee ye bip sɔ̄ ba le aba aba kɔ: 4 “Kɔ i nɛ, mɛ sɔ̄ na pya nu ama esudɔ a, e ena elu esu yeā nukuadɛɛ̄ loo sɔ̄ dɛ̄dɛɛ̄ pya nu ama e’ina kuma a?” 5 Nyɔɔwo Jizɔs bee bɔātɛ̄ ekɔ wa nɛ kɔ: “Nwanaadɛɛ̄ lokwa lɔgɔ nɛɛ naa dag i. 6 Gbɛnɛ-edo nɛɛ elu bu na bee sa kɔ, ‘Mda na ɛɛ a,’ e ba edag booboo nɛɛ. 7 Kerewo, sɔ̄ bui dā kɔma nɔ̄ le kpɛa akiiloo booboo nɔ̄, bɔɔ aa i aa; pya nu ama ɛrɛge esira mɛ kuma sii lu.

8 “Nyɔnɛbee edonyɔɔ ebebe loo edonyɔɔ, e buɛ̄-mɛnɛ ebebe loo buɛ̄-mɛnɛ; e nyɔŋa kɛnɛkɛ̄ elegara keekee kɛ̄; e kii nuede elenage. Dɛ̄dɛɛ̄ pya lo nu ama na bɔātɛ̄ etɛɛrɛloo a.*

9 “Mɛ bɔɔlo nwanaadɛɛ̄. Pya nɛɛ esu i kuma tɔbiaɛ, sa elu ezip i bie bu tɔ bɔŋanaloo, e ba edoo kɔ bui yira kɛ̄sī pya mɛnɛ le kɛ̄sī pya aa bɛɛ nyɔɔ mdaa bee, lo eyira ekeebee wa nɛ. 10 Gbaāloo wo, edasī lu ezue le yereue bu dɛ̄dɛɛ̄ edonyɔɔ. 11 E sɔ̄ ba aa i su kuma li, bui aa nɛ taāŋa loo i loo nu bui kɔ lɛɛ a gae lu lo sɔ̄; kɔaa nu kaɛ edɔɔ̄ i zū kɔ bui kɔ taɛ lo sɔ̄, nyɔnɛbee a naale bɔɔlo na a gaa kɔ ue a mɛ kaɛ edɔɔ̄. 12 Gbaāloo wo, wuga esu wuga yere kɛ̄bah luh, e tɛ esu nwiī, e gbomiɔŋɔ e’aakɛ̄ lo edoo wa tɛ le wa ka sa wa su yere kɛ̄bah luh. 13 E dɛ̄dɛɛ̄ nɛɛ ebaa i loo nyɔɔ mdaa bee. Mɛ nɛɛ a egerebu mmɛ kuma, elu ekpɔā.

14 “Nyɔɔwo, sɔ̄ bui muɛ saāŋa nu a wee gbee nu a le eyira kɛ̄ a naale ebee yira (doolo nɛɛ a buū suā nu a kura), lo sɔ̄ doolo pya a le Judia teera kii nyɔɔ egu. 15 Doolo nɛɛ a le nyɔɔ tɔ aa sirakɛ̄ ale yii bu ye tɔ lo esu ɛrɛgebah nu; 16 e doolo nɛɛ a le wii aa obia kii be wee su ye bɛloo dee nyɔɔ. 17 Ekiɛ̄nu ele nɛ pya waa bu loo le pya a gaa nɛ mah nwiī bu lo gbo dee! 18 Kiraasī lo eyere kara kɔ aa sira sɔ̄ tɔɔ. 19 Nyɔnɛbee lo gbo dee elu dee etɛɛrɛloo, dua lo a sii bee le aā sɔ̄ Bari bee bɔātɛ̄ edɛm nu mmɛ lo sɔ̄, e a naale esinakɛ̄ le. 20 Bu kaka, etaage bee Jɛhova fii gbo dee a kpuree, naale elu ekpɔā lɔgɔ nɛɛ. Mɛ elu efii gbo dee a kpuree nyɔɔbee pya alɛ bee sagɛ.

21 “E lo a le ziī nɛɛ kɔ i nɛ kɔ, ‘Ɛp! Kraist le akɛāma,’ ale ‘Ɛp! A le li kinima,’ bui aa yiga. 22 Nyɔnɛbee pya esah Kraist le pya zue ue esah e’aakɛ̄ sa doo keekee edobah nu le nyɛŋiatam lo edag pya nɛɛ, lo a waɛ, lo edag pya a bee lu esagɛ. 23 Mɛ bɔɔlo, nwanaadɛɛ̄. M ekɔa pya nu ama i nɛ lɛɛ a gae sira.

24 “Mɛ bu lo gbo dee sɔ̄ gbɛnɛ etɛɛrɛloo etɛ̄na, zue eyii zii, e enɔɔ̄ naale emɔna, 25 e zina edɔgara aa bunyɔɔ, e ekpo bunyɔɔ enyɔŋa. 26 E lo sɔ̄, ba emuɛ Nwiīnɛɛ a gaa lu bu tɔ̄dee sa ɛrɛ gbɛnɛ ekpo le ka. 27 E a gaa le yere pya ye ɛnjɛl kɔ ba a bɔŋɛnɛloo pya ye nɛɛ a bee lu esagɛ aā nia gah loo nyɔuwe, aā kuma nyɔuwe mmɛ kuma bunyɔɔ.

28 “Nɔaā nu aāloo edobah akiiloo te fig: Aba sɔ̄ ye naa si mɛɛ sa ye te yere epanya, bui wee suā kɔ sɔ̄ zue ewara. 29 Kɛ̄ a lenage doolo kumaloo bɔɔlo, sɔ̄ bui muɛ pya nu ama a gaa sira, suaā kɔ ewaraloo nudee. 30 Kaka m kɔ i nɛ kɔ lo sɔ̄ eku ama naale etɛɛ̄ aa mmɛ sɔ̄ dɛ̄dɛɛ̄ pya nu ama esira. 31 Bunyɔɔ le kɛnɛkɛ̄ etɛɛ̄ aa, mɛ pya na ue naale etɛɛ̄ aa.

32 “Mɛ kiiloo dee ale awa a lɔgɔ nɛɛ naa suā, kere pya ɛnjɛl a le li bunyɔɔ ale Nwiīnɛɛdam, mɛ aba Tɛ. 33 Nwanaadɛɛ̄ sa tɔɔ̄ yeere, nyɔnɛbee buii suā taɛ lo sɔ̄. 34 A le doodoo nɛɛ a aa ye tɔ si kiā lo a nɛ ekpo pya ye zooro kɔ ba a kuudɛɛ̄loo ye tɔ sa nɛ tam ziī ziī aba, e a kɔ nɛ nɛɛ kuūdɛɛ̄loo nudee kɔ a kiisī lo etɔɔ̄ baɛ. 35 Nyɔɔwo, tɔɔ̄naa baɛ nyɔnɛbee buii suā taɛ sɔ̄ tɛ-ɛrɛ tɔ a elu, ale loo uunɛ, ale taɛ pie edɛɛ̄, ale bee lɔɔrɛ*, ale bagara lɔɔrɛ, 36 lokwa lo alu sɔ̄ buii bee ɛmadɛɛ̄, a naa muɛ i bui le daa. 37 Mɛ nu m i kɔ nɛ na m kɔnage nɛ dɛ̄dɛɛ̄ nɛɛ a: Tɔɔ̄naa baɛ.”