Saŋ Bee Doo Kɔ A Fɛ Nɛɛ

Adam le Iv bee ɛrɛ gbomiɔŋɔ sɔ̄ ba e’aara bu gɔh Idɛn. Wa tua nwiī bee le Ken, e a wee foh nu, lo eree baɛ bee le Ebɛl, e a wee tɔɔ̄loo naana-pee.

Ziī dee, Ken le Ebɛl bee wɔp zɔɔ nɛ Jɛhova. O suāge nu wɔp zɔɔ kura ni? Ɛɛ ziī keebee dɔɔ̄nu. Bu Jɛhova bee ɛɛ loo zɔɔ Ebɛl, mɛ bu ye naa bee ɛɛ loo zɔɔ Ken. E Ken bee ɛrɛ gbɛnɛ saŋ. Jɛhova bee zuurabahtɔ̄ Ken kɔ ye saŋ gaa le doo kɔ a doo nu a bee piya. Mɛ Ken naa bee gbaɛ̄tɔ̄.

Taā Ken gbaɛ̄tɔ̄ nu Jɛhova ye kɔ nɛ, a bee kɔ nɛ ye wuga Ebɛl kɔ: ‘Doo mɛ i si bu wii.’ E sɔ̄ aba baɛ aba le bu wii, Ken bee su nu zima ye wuga fɛ. Ena Jɛhova edoo kumaloo nu Ken doo ama ani? Jɛhova bee su kpɔte nua nyɔɔ Ken, tɛ̄maloo ekpo ye lɛɛ yɛɛ pya ye nɛɛ ture kɛ̄ a binia. E a naa bee ye lɛɛbahloo kɔ a sikɛ̄ wa obia pii.

Ekɔ a ɛrɛge nu ili dap nɔ aāloo ni? I dap bɔātɛ̄ ɛrɛ saŋ lo nu naa kiā leere dookɛ̄ i bee ɛmadɛɛ̄ doo. Lo i muɛ kɔ saŋ le i bu, ale pya dɔɔ̄na yere nukuādɛɛ̄loo kɔ i gaa ɛrɛ saŋ sa ba zuura i bahtɔ̄ akiiloo, a lee kɔ i nwaabah kwabahloo kɛ̄ nu i tɔɔ̄ loo doo, lokwa saŋ naa zū i kɔ i doo nu a bee piya.

Jɛhova naale e’ibere Ebɛl, nyɔɔbee a bee wereloo Jɛhova sa doo nu a lee. Sɔ̄ kɛnɛkɛ̄ ama elu paradais, Jɛhova elɛɛ Ebɛl kɛ̄ bu luh sa sere dum.