Ɛnjɛl Jɛhova Bee Kpega Hezikaia

Pya Asiria ebea eebah lop gā Izrɛl sa su wa buɛ̄-mɛnɛ. E nyaawo, Senakerib mɛnɛ Asiria aa gbīnage esu aba lo baɛ gā buɛ̄-mɛnɛ Juda a siga. Kinakina a bee bɔātɛ̄ esu ziī ziī buɛ̄ a le Juda. Mɛ lo buɛ̄ a bee ye taɛ esu gbɛnɛ na Jerusɛlɛm. Mɛ Senakerib naa bee suā kɔ Jɛhova aa kpega buɛ̄ Jerusɛlɛm.

Hezikaia mɛnɛ-buɛ̄ Juda bee kpɛ gbɛnɛ-edo kpugi nɛ Senakerib lokwa a naa su buɛ̄ Jerusɛlɛm. Mɛnɛ Senakerib bee su lo kpugi sa yerenage pya ye gbo nɔ̄ kɔ ba a kii wee bebeloo Jerusɛlɛm. Kɛ̄ pya gbo nɔ̄ Asiria kiā waɛloo buɛ̄ Jerusɛlɛm doo, kɛ̄ bɔɔ bee aanage pya nɛɛ a le Jerusɛlɛm doolo. Nyɔɔwo, Hezikaia bee wa kɔ nɛ kɔ: ‘Bɔɔ aa i aa. Pya nɔ̄ Asiria ɛrɛ ekpo, mɛ Jɛhova edoo kɔ i ɛrɛ ekpo wa ee.’

Senakerib bee yere Rabshakɛl ye nɛɛ lɛɛratam kɔ a si Jerusɛlɛm wee kɛgɛ pya nɛɛ Bari. E Rabshakɛl bee yira kɛ̄-ee loo buɛ̄ Jerusɛlɛm wiikpā kɔ: ‘Jɛhova naale edap i yerebah nɛ. Bui aa yiga kɔ Hezikaia a dag i. Lɔgɔ bari edap i kpɔā i lɛɛbah naale.’

Hezikaia bee bip Jɛhova nu a dooe, e Jɛhova bee ye agara nɛ kɔ: ‘Waa yiga kɔ nu Rabshakɛl kɔ a aarɛ a bɔɔ. Senakerib naale edap su Jerusɛlɛm.’ Sɔ̄ esaa, Senakerib bee ɛm kpa ma Hezikaia. A ɛm bu lo kpa kɔ: ‘Waa ɛrɛ lɔgɔ bɛābu. Jɛhova naale edap a kpɔā.’ Hezikaia bee yere kara kɔ: ‘Soosoo, a Jɛhova, kpɔā i, lokwa dɛ̄dɛɛ̄ nɛɛ suā kɔ aba olo na lo kaka Bari a.’ Jɛhova bee ye kɔ nɛ kɔ: ‘Mɛnɛ Asiria naale eyii Jerusɛlɛm. M gaa le kpega na gbɛnɛ buɛ̄.’

Senakerib bee kɛɛrɛ kɔ bia nwīgbagbara sɔ̄, buɛ̄ Jerusɛlɛm elu lo alɛ e. Mɛ ziī uunɛ, Jɛhova bee yere aba ziī ka ɛnjɛl siā kɛ̄ pya gbo nɔ̄ Asiria bee le ebɔŋana dumɛ buɛ̄ Jerusɛlɛm. Lo ɛnjɛl bee fɛ 185,000 pya gbo nɔ̄ Asiria! Mɛnɛ Senakerib bee peere dɛ̄dɛɛ̄ pya ye gbo nɔ̄ ba ɛrɛ ekpo. Naa bee ɛrɛna lɔgɔ nu edoo kaɛlɛɛ obia kii be doodoo nɛɛ elua ebe eebah bie uwe nɔ̄. Jɛhova bee kpega Hezikaia le buɛ̄ Jerusɛlɛm dookɛ̄ a bee ye yira nɛ doo. Lo alu olo na o bee le buɛ̄ Jerusɛlɛm a, o bee dɛrɛge nyiɛ nyɔɔ Jɛhova ni?