Dasī Nyɔɔnɛ O Wuga Sere Efɛɛloo​—Bu Mɛ Sīdee?

Naa su doo wo kɔ o le Galili bu sɔ̄ Jizɔs bee le a kɛnɛkɛ̄. O e’ina Jerusalɛm lo edoo Doonu Tɔkpo. Pya a wee taāŋabah Jɛhova elua aa kɛ̄ a binia mma bu lo buɛ̄. O gbī ewaara zɔɔ nɛ Jɛhova. O aara pee, sa bɔātɛ̄ o nyɔɔnyɔɔ dɛɛ̄ kiā sa tɛɛ̄ yɛɛ gbɛnɛkpo nɛɛ a le bu buɛ̄ sa gaa kii tɔkaɛ. Sɔ̄ o ina lo tɔkaɛ o muɛ̄ kɔ pya nɛɛ ba gaa gbī ewaara nage zɔɔ le mmɛ lo kɛ̄. Bu kpɛdumɛ, e ina sɔ̄ o su o pee nɛ nɛɛ wɔp zɔɔ. Taɛ lo kɛ̄ a, a nyɛŋia a bu kɔ ziī o wuga lo a dap le yɛɛ gbɛnɛkpo nɛɛ ale ziī kɛ̄ bu lo buɛ̄ a, le ɔɔ ɛrɛ taāŋa. Jizɔs baatɛ̄ nu o doo. (Buū Matiu 5:24.) O wuga le ɔɔ edap sere efɛɛloo dookɛ̄ Jizɔs kɔ doo ama doodoo wa? Bu pya nu a lu e’ɛm sere kɛɛ̄ ama, su lo ture a lee a le yɛɛ.

OLO . . .

• nyɔɔnɛ o wuga sere efɛɛloo lo a le o muɛ̄ kɔ olo na o bee ye biirebu a

• doo kɔ o wuga a dābeeloo kɔ a gaa si saŋ yee kɛ̄ ale o yiga kɔ pio lo taāŋa aae a bah

• fɛɛrɛloo gbaɛ̄tɔ̄ o wuga sɔ̄ a gaa kɔ ue, sa kere a bee kɔ lɔgɔ ekwɔ naa aa a bah, bara kɔ a aaloo sa bu ye aa biira loo nu a bee sira mɛ oo bee suāe

O WUGA . . .

• a kɔ nɛ pya dɔɔ̄na nɛɛ a le bu bɔŋanaloo kɔ olo na o bee dooe kɔ bu ye a biira a

• a gbɛ a, kɔ dɛ̄dɛɛ̄ piya nu o bee ye doo, sa kɔ o ɛrɛge etaāŋa ye loo

• a muɛ̄ kɛ̄ a gbī e’agaloo le kumalookɛ̄ lo elu ye loo doo, sa a aaloo a nɛ aābu ye beenyiɛ

Kere ilii taāŋabah anii’ee naa luna lo i su nam waana zɔɔ, e na Jizɔs gaa bee tɔgɛ akiiloo gbanialoo a le yɛɛ nyɔɔnɛ pya i wuga le bu efɛɛloo le taāŋabah Bari bu sīdee a su ani?