Nwaɛdɛɛ̄ Loo Piya Nu A Le Bu Yii Gbo Nyɔɔ Intanɛt

NU ANUA ALU EBƐƐ̄: Doodoo pya dɔɔ̄na nu tam, yii gbo nyɔɔ intanɛt dap yerebah nɛ nɛɛ, e a dap nage gbee nɛɛ. Siga pya Nɛɛ Kraist ebiara fii kɔ ba naale e yiie gbo nyɔɔ intanɛt. Pio pya Nɛɛ Kraist esua sīdee ama nua kɛ̄ esu kɔā ue nɛ pya wa butɔ le pya wa gbo. Kerewo, Pɔrɔ-edɔɔ̄ gbī kɔ i su yii gbo nyɔɔ intanɛt daānu bu pɔrɔ sīdee, e lo ama dap gbee gbanialoo i ɛrɛ loo Jɛhova. Doodoo Jizɔs, i dap su pya daakuu a le bu Muɛ̄ Ue Bari yeā nu kuādɛɛloo pya nu bɔɔ a le bu sa teera aaloo.​—Luk 4:​4, 8, 12.

PYA NU BƆƆ A BƆLOO ENWAƐDƐƐ̄ LOO:

• Tɔɔ̄ nyɔɔ intanɛt yee kɛ̄. Su gbɛnɛ-edo sɔ̄ nyɔɔnɛ nɛɛ kɔnia sɔh nyɔɔ intanɛt ale si ee nu dap su sɔ̄ i bee su nyimɛ i gbanialoo kumaloo Jɛhova

  Pya daakuu Baibol: Ɛfɛs 5:​15, 16; Fil 1:10

• Si ee pya nu a naa bɔloo. Ɛp foto a naa bɔloo dap ture nɛɛ mmɛ loo ɛp foto ekotɛ̄ nɛɛ ale kuna gā. Buū kpa a aaba pya a ana yira ale dɔ intanɛt ba kpaāna dap gbee yira i ɛrɛ bu Jɛhova

  Pya daakuu Baibol: Mat 5:28; Fil 4:8

• Yere pya ue ale foto a naa bɔloo. Nyɔɔbee beenyiɛ lu nu dag a, a dap zū nɛɛ kɔ a yere pya ue le foto a naa bɔloo nyɔɔ intanɛt. Bu kaka, lo ama dap gbee lo nɛɛ ale edoo kɔ ye yira bu Jɛhova a ɔloo

  Pya daakuu Baibol: Rom 14:13; Ɛfɛs 4:29

SI EE VIDIO A KURA NWAƐ̄DƐƐ̄ SƆ̄ O GAA YII GBO NYƆƆ INTANƐT, LƐƐ BUĪ TƐƐ̄ NYƆƆ KƐ̄ EDAP BE EEBA PYA KƐ̄TƆƆ̄ AMA DOO: