Kɛ̄ Esu Epɛɛ Kpa Bɔātɛ̄ Zue Ue Doo

Aāge bu Tua Enɔɔ̄ loo zua 2018 a, eko dumɛ Kpa Enɔānu Tɔɔ̄dum le Tam Zue Ue aara edoba kɛ̄ ezue ue doo. Elua eyere i mɛm loo kɔ i sere ekɛɛrɛ nyɔɔ nyɔɔnɛ pya nɛɛ kɔnia ue ee aba enɛ wa kpa. Lo eyerebah nɛ pya zue ue kɔ ba a kwabaloo kɛ̄ ba sere baloo zue ue doo, pya vidio a tɔgɛ edoba kɛ̄ ezue ue doo etɔgɛ i kɛ̄ esu aba Baibol bɔātɛ̄ ekɔa ue doo. Kerewo, lo ama kurage kɔ ii le enɛ na kpa sɔ̄ i gaa zue ue aa ziī tɔ yii ziī ni? Eeye doo pippip! Bu edoba, epɛɛ kpa dap dɔ kaāna biī sɔ̄ i su bɔātɛ̄ zue ue. I dap su pya sīdee ama daā sɔ̄ i gaa su i epɛɛ kpa zuema ue:

1. Bip pya ebip a le nyɔɔ lo epɛɛ kpa.

2. Tɔgɛ ye ture a aabu Baibol alu e’ɛm dee nyɔɔ eree baɛ naɛsī lo epɛɛ kpa. Lo sɔ̄ le, buū sa bui kɔnia ue nyɔɔ pio ue a le bu lo epɛɛ kpa.

3. Nɛ lo epɛɛ kpa tɛ ɛrɛ tɔ, sa ye yere mɛm loo kɔ a buū lo a siga sɔ̄ a ɛrɛ sɔ̄.

4. Lɛɛ o gae kii, tɔgɛ ye ebip a le kɛɛ̄ “Naa Kɛɛrɛ,” sa nɔɔ̄ sɔ̄ o obia lu wee agara ye enɛ aābu Baibol.

Sɔ̄ o obia si, nyɔɔnɛ ye kɔnia ye ture sa o bip ye dɔɔ̄na ebip bui kɔ ue nyɔɔ dɔɔ̄na sɔ̄. O dap bip ziī ebip a le i dɔ intanɛt ale lo a aabu kpa a le dumɛ lo epɛɛ kpa. Sɔ̄ sɔ̄ ebɔa loo, nuunabee nwī ekpo kpa a kura Leyere Ue A Aaba Bari! ale dɔɔ̄na kpa i wee nɔā Baibol a le bu i Ekpo Tam Tɔgɛnu.