TƆƆ̄DUM DOODOO PYA NƐƐ KRAIST
Ba Mɛɛ Na Pya O Gbo Nyɔɔ Intanɛt A?
Nɛɛ alu gbo na “nɛɛ a tɔɔ̄ dabaloo dɔɔ̄na nɛɛ nyɔɔ wereloo a ye ɛrɛ loo.” Bu edoba, Jonatan le Devid bee yinia gbo a naa waɛ elabara sɔ̄ Devid efɛa Goliat sah. (1 Sam 18:1) Devid le Jonatan bee tɔgɛ pya lele elap a wa zuura nwamaloo ziī. Nyɔɔwo, nu a wee doo kɔ nyinia gbo a le yɛɛ baɛ nɛɛ a aga bu na sɔ̄ ba suāloo ziī leere. Susuāloo dɔɔ̄na nɛɛ wee gbī epiaga le sɔ̄. Mɛ a waɛ e’ɛrɛ “gbo” bie nyɔɔ intanɛt tɛ̄maloo aba biibah nyɔɔ fon ale kɔmpɔta. Kuma sɔ̄ pya a le nyɔɔ intanɛt dap nɔɔ nu ba ekɔ sa doo kɔ pya nɛɛ a ɛp wa dookɛ̄ alaba gbī doo a, lo ama doo kɔ ba a gɔ̄ taɛ nɛɛ ba lu. Nyɔɔwo, a lee lo esagɛ pya nɛɛ eyii gbo bie nyɔɔ intanɛt. Bɔɔ aa a aa lo ekiī sɔ̄ pya nɛɛ oo suāloo a bara kɔ o lue wa gbo nyɔɔbee oo gbī ebiire wa bu. Nyɔɔ nu bɔɔ a le bu, pio nɛɛ ebiarafii kɔ ba naale eyiie nyɔɔ pya kɛ̄ kɔnia ue a le nyɔɔ intanɛt doo pippip. Kɛādoo, lo olo sagɛ lo eyii nyɔɔ, ena o su seea nyiɛ a?
SI EE VIDIO A KURA NWAƐ̄DƐƐ̄ LOO PIYA NU A LE BU YII GBO NYƆƆ INTANƐT, LƐƐ BUI AGARA PYA EBIP A NYƆƆNƐ AMA:
Ena o kɛɛrɛbu loo lɛɛ o gae ɛm sa yere ue le foto nyɔɔ intanɛt a?
Ena anua o su suānu saŋɛ pya nɛɛ o yii gbo nyɔɔ intanɛt a?
Ena anua o sere sɔ̄ loo buā sɔ̄ o su tɔma nyɔɔ pya kɛ̄ kɔnia ue a le nyɔɔ intanɛt a?—Ɛfɛs 5:15, 16