Jekɔb Le Isɔ Bee Sere Efɛɛloo

Jɛhova bee yira yii nɛ Jekɔb kɔ a gaa le kpegae ye dookɛ̄ a bee kpegae Abreham le Aizik doo. Jekɔb bee tɔɔ̄ buɛ̄ a kura Haran, e lo kɛ̄ na a bee yira ii wa a, e ye butɔ bee kuī kpo, e a bee ɛrɛ gbɛnɛkpo zɔ.

Bu kpɛdumɛ, Jɛhova bee kɔ nɛ Jekɔb kɔ: ‘Obia kii o buɛ̄.’ Nyɔɔwo, Jekɔb le pya ye butɔ bee kiā nyɔɔnyɔɔ dɛɛ̄ kiā obia kii wa buɛ̄. Sɔ̄ ba le nyɔɔ dee aa kii, pio nɛɛ bee lu loo Jekɔb sa ye kɔ nɛ kɔ: ‘O wuga Isɔ gaa lu, e buā nɛɛ alu 400 le ye loo!’ Bɔɔ bee aa Jekɔb kɔ Isɔ gaa lu wee dooe ye pɔrɔ nu loo le loo pya ye butɔ. Jekɔb bee yere kara nɛ Jɛhova sa ye bara kɔ: ‘Soosoo kpɔā mɛ lɛɛbah na wuga.’ Lo dee a nyɔɔnɛ, Jekɔb bee yere dɔɔ̄nu ma ye wuga Isɔ, naana-pee, pee tɔ, nam, enyanya toora toh, le enyanya.

Sɔ̄ Jekɔb le aba ɛɛ taɛ lo uunɛ, a bee muɛ ziī ɛnjɛl! Lo ɛnjɛl le ɛɛ bee bɔātɛ̄ bebe. Ba bee bebe mmɛ sɔ̄ dee ɛɛ. Kereadoo muū bee yiiloo Jekɔb, a naa bee biewo ebebe loo lo ɛnjɛl. Lo ɛnjɛl bee kɔ: ‘Lɛɛ mɛ bahloo m kii.’ Jekɔb bee ye kɔ nɛ kɔ: ‘Mm le elɛɛ a bahloo mmɛ sɔ̄ o enɛa mɛ leelee.’

Bu kpɛdumɛ, lo ɛnjɛl bee nɛ leelee Jekɔb. Lo sɔ̄ Jekɔb bee suā kɔ Jɛhova naale elɛɛbahloo kɔ Isɔ a dooe ye lɔgɔ pɔrɔ nu loo.

Sɔ̄ dee eyira Jekɔb bee muɛ Isɔ le 400 pya nɛɛ a ye le loo ba gaa kiā lu. Jekɔb bee kiā zasī pya ye butɔ, sa bee uubee mmɛ kɛnɛkɛ̄ ɛrɛba sɔ̄ nɛ Isɔ. Isɔ bee teera wee zɔ̄ŋia Jekɔb sa ye aa uuwaloo. E baɛ aba bee to, sa ba sere efɛɛloo. O kɛɛrɛ kɔ sīdee Jekɔb aabahloo kɛ̄tɔɔ̄ ama tɔɔ̄loo Jɛhova doodoo wa?

Sɔ̄ a esaa, Isɔ bee obia kii ye be, e Jekɔb bee kiinage alɛɛ be. Jekɔb bee ɛrɛ 12 miɔŋɔ nɛɛdam. Wa bee na Reuben, Simeon, Livai, Juda, Dan, Naftali, Gad, Asha, Isaka, Zebulun, Josɛf, le Benjamin. Jɛhova bee su Josɛf alu ziī yɛɛ pya lo miɔŋɔ nɛɛdam kpɔā pya ye nɛɛ. O suāge kɛ̄ a bee doo lo ama doo ni? I sa i suā.