Tɔ Kpo Etɔɔ̄ Taāŋabah

Sɔ̄ Mozis bee le nyɔɔ Egu Sinai, Jɛhova bee ye kɔ nɛ kɔ a wu ziī keebee tɔ kpo, lo alu ekure tɔ kpo zɔ̄zɔ̄ŋia kɛ̄ pya Izrɛl etɔɔ̄ ye taāŋaebah. Ba ewu lo tɔ kpo bu sīdee ba edap dana kuma ɛrɛgebah kɛ̄ ba ekii.

Jɛhova bee kɔ nɛ Mozis kɔ: ‘Kɔ nɛ pya nɛɛ a kɔ ba a dɔɔ̄ ɛrɛgebah nu ba ɛrɛ lɛabah lokwa a dap lu esu wuā tɔ kpo zɔ̄zɔ̄ŋia.’ Pya Izrɛl bee dɔɔ̄ gold, nwī-kpɔrɔ, dɛm a si gbɛnɛ du, le lɔh oo. Ba bee dɔɔ̄nage wool, linen, zia nam, le gbɛnɛ-edo dɔɔ̄na dɔɔ̄na nu. Pya Izrɛl bee dɔɔ̄nu lɛabah mmɛ kɛ̄ Mozis wa kɔ nɛ kɔ: ‘Egbɔ̄ mɛɛ! Bui aa suna nua.’

Gbɛnɛ-edo pya nɛɛdam le nɛɛwa ba ɛrɛ bahtam bee yerebah lo ewu lo tɔ kpo zɔ̄zɔ̄ŋia. Jɛhova bee wa nɛ suānu lo esiā lo tam. Pio aba bee loh ezii, sa loh bɛ. E pio aba bee nɔɔ̄ dɛm, su gold siātam sa ɔnage te.

Ba bee wu lo tɔ kpo zɔ̄zɔ̄ŋia dookɛ̄ Jɛhova bee wa kɔ nɛ doo. Ba bee kwa ziī ekpedɛɛ̄ bɛ fimakɛ̄ sa su fimabu lo tɔ kpo zɔ̄zɔ̄ŋia nua baɛ. Ziī sī bee le Kɛ̄ Kaɛ, e elua sī a Kɛ̄ Alu Kaɛ Eenyɔɔ. Lo Kɛ̄ Alu Kaɛ Eenyɔɔ na ekpo yii bɔ̄madum lo a bee lu esu te acacia le gold kwaā le a. Kɛ̄ Kaɛ na numiā alu esu gold daā, kasi le da wɔp zɔɔ a wee lu e’ɔp nu a wee sī lele nuloo nyɔɔ le a. Kɛ̄-ee loo tɔ kpo zɔ̄zɔ̄ŋia na ko-maā nwī-kpɔrɔ lo gbɛnɛka da wɔp zɔɔ bee le a. Ekpo yii bɔ̄madum bee nyɛŋiabu pya Izrɛl yii ba bee yira kɔ ba egbaɛ̄etɔ̄loo Jɛhova. O suāge nu yii bɔ̄madum lu ni? Ɛɛ na ziī keebee yii alu eyira.

Jɛhova bee tubebahloo Erɔn le pya ye miɔŋɔ nɛɛdam kɔ ba alu pya wɔp zɔɔ bie bu tɔ kpo zɔ̄zɔ̄ŋia. Wa tam na lo ekuūdɛɛ̄loo lo tɔ kpo zɔ̄zɔ̄ŋia sa waara zɔɔ nɛ Jɛhova. Aba Erɔn alu nɛɛ tɛsī ewɔp na a bee lu elɛɛbahloo kɔ a yii Kɛ̄ Alu Kaɛ Eenyɔɔ a. A wee yii Kɛ̄ Alu Kaɛ Eenyɔɔ aba ziī sɔ̄ bu ziī zua lo ewɔp zɔɔ bee pya ye butɔ, gbaānageloo pɔrɔ dɛ̄dɛɛ̄ edonyɔɔ Izrɛl.

Pya Izrɛl bee wu lo tɔ kpo zɔ̄zɔ̄ŋia lɛɛ sɔ̄ elua ziī zua aā sɔ̄ ba bee aa Ijipt. Nyaawo, ba e’ɛrɛ kɛ̄ etɔɔ̄ taāŋabah Jɛhova.

Jɛhova bee doo kɔ ye gogoro a mma dɛ̄dɛɛ̄ lo tɔ kpo zɔ̄zɔ̄ŋia, e biira bunyɔɔ bee sira nyɔɔ dɛ̄dɛɛ̄ lo tɔ kpo. E kuma sɔ̄ lo biira bunyɔɔ le nyɔɔ lo tɔ kpo zɔ̄zɔ̄ŋia, pya Izrɛl etɔɔ̄ bia kɛ̄ ba le. E lo alu esu lo biira bunyɔɔ lɛɛ, lo sɔ̄ ba suā kɔ e’ina sɔ̄ ba e aa e kɛ̄ ba bee tɔɔ̄. Ba edāna lo tɔ kpo zɔ̄zɔ̄ŋia sa kiā nyɔɔnɛ lo biira bunyɔɔ.