Ziī Aā Nɛɛ Zaāsī Le Baɛ Pya Nɛɛwa A Ɛrɛ E’agaloo

Sɔ̄ Joshua ezaāsī pya nɛɛ Jɛhova bu gbɛnɛ-edo zua, a bee u sɔ̄ a bee le 110 zua. Sɔ̄ Joshua bee le dum pya Izrɛl bee taāŋabah Jɛhova. Mɛ sɔ̄ esaa pya Izrɛl bee bɔātɛ̄ taāŋabah yɔ dookɛ̄ pya Kenan wee doo. Nyɔɔbee pya Izrɛl naa bee kiisī lo egbaɛ̄tɔ̄loo Jɛhova a, Jɛhova bee lɛɛbahloo kɔ ziī mɛnɛ Kenan a kura Jabin a tɔg wa. Pya Izrɛl bee bara Jɛhova kɔ a yereebah wa nɛ. Nyɔɔwo, Jɛhova bee wa nɛ ziī aā nɛɛ zaāsī ye bee kura Berak. A gaa le yerebah nɛ pya Izrɛl kɔ ba a obia pii Jɛhova.

Ziī waa mɔmanudɛɛ̄ a kura Debora bee kɔ ba a kue Berak nua. A ɛrɛ ziī yereue aābah Jɛhova lo ekɔ nɛ Berak, a bee ye kɔ nɛ kɔ: ‘Su 10,000 pya nɛɛ, sa kii wee bebeloo pya gbo nɔ̄ Jabin bie kpaɛ̄ kuru maā Kishon. E lo kɛ̄ na o gaa le be eebah Sisera nɛɛbee gbo nɔ̄ Jabin a.’ Berak bee kɔ nɛ Debora kɔ: ‘M gaa le si, lo a le o nyɔɔnɛ mɛ.’ Debora bee ye kɔ nɛ kɔ: ‘M gaa le nyɔɔnɛ a, mɛ suā kɔ a naale olo na o gaa le fɛ Sisera a. Jɛhova ebee kɔ ziī wa na a gaa le fɛ ye a.’

Debora bee nyɔɔnɛ Berak kii nyɔɔ Kpokɛ̄ Tabor lo ekpɛ̄naloo be nɔ̄. Aba sɔ̄ Sisera bee dā doo wo, a bee bɔŋɛnɛloo ye fah kɛnɛkɛ̄ le pya ye gbo nɔ̄ sa kii pɛɛkɛ̄. Debora bee kɔ nɛ Berak kɔ: ‘Nii’ee na Jɛhova edoo kɔ o be eebah a.’ Berak le 10,000 pya nɛɛ a bee ye le loo bee kponia pya gbo nɔ̄ Sisera a ɛrɛ ekpo.

Jɛhova bee doo kɔ gbɛnɛ dɔɔ boo a dɔɔ, e kuru maā Kishon bee mma. Fah kɛnɛkɛ̄ Sisera bee zii bia bu gba. Sisera bee aabu ye fah kɛnɛkɛ̄ sa bɔātɛ̄ esu ekpotɔ teā. Berak le pya ye gbo nɔ̄ bee be eebah pya gbo nɔ̄ Sisera, mɛ Sisera bee si-bah! A bee teera sa gɔā bu tɔkpo ziī wa a kura Jael. E Jael bee ye nɛ māh-nam kɔ a ɔ̄, lɛɛ a su bɛ ye kpɛɛraloo. Sisera bee bɔātɛ̄ daa. Lɛɛ Jael kiā kinakina yii kpaɛ̄ Sisera sa su ekpo-suu a wee lu esu kaā tɔkpo ye ka bee, e a bee u.

Berak bee bɔātɛ̄ gbī Sisera. Jael bee aabu ye tɔkpo yii kɛ̄ ee sa ye kɔ nɛ kɔ: ‘Nyɔɔnɛ mɛ yii bu na tɔkpo, e m tɔgɛ a nɛɛ o waa gbī.’ Sɔ̄ Berak yii bu tɔkpo Jael, a bee muɛ Sisera a le makɛ̄ a e’ua. Berak le Debora bee uɛ yɔɔ leera Jɛhova kɔ a edoora kɔ pya Izrɛl a be eebah pya wa nɛɛ baa. Aā lo sɔ̄ pya Izrɛl bee tɔɔ̄ bu efɛɛloo bu 40 zua.