Gidiɔn Bee Be Eebah Pya Midia

Sɔ̄ sɔ̄ aa kiisī pya Izrɛl bee ɔbɛ etaāŋabah Jɛhova sa bɔātɛ̄ taāŋabah ekwɔ bari. Bu ɛrɛba zua, pya Midia bee yip nam pya Izrɛl sa gbeesī nu ba bee foh. Pya Izrɛl wee gɔā bu edee a le loo egu lokwa pya Midia naa muɛ wa. Ba bee bara Jɛhova kɔ a kpɔāe wa. Nyɔɔwo, Jɛhova bee yere ziī ɛnjɛl siāloo ziī zege gbara a kura Gidiɔn. Lo ɛnjɛl bee kɔ nɛ Gidiɔn kɔ: ‘Jɛhova esagɛ a kɔ o lu ziī gbɛnɛ nɛɛ nɔ̄ a ɛrɛ ekpo.’ Gidiɔn bee ye bip kɔ: ‘M dap tɛɛ̄ doodoo wa kpɔā pya Izrɛl sɔ̄ mm le dɛɛ̄ lɔgɔ nu ni?’

Ena Gidiɔn bee doo lo esuā kɔ Jɛhova esagɛe ye kɔ a kpɔā pya Izrɛl a? A bee su pio zia a bee kpɔ lɛɛloo naana-pee sere kɛnɛkɛ̄ sa kɔ nɛ Jɛhova kɔ: ‘Lo a le biara maāmaā doo kɔ zia ama a dɛp li lɔɔrɛ sa kɛnɛkɛ̄ le kagara, m gaa le suā kɔ o gbī kɔ m kpɔā pya Izrɛl.’ E ye lɔɔrɛ lo zia bee dɛp kaāna, mɛ kɛnɛkɛ̄ bee le kagara! E Gidiɔn bee sikɛ̄ bara kɔ, lo zia a kaga li lɔɔrɛ nyɔɔ’ee, mɛ kɛnɛkɛ̄ a dɛp. Sɔ̄ a bee sira doo wo, Gidiɔn bee yiga kaāna kɔ Jɛhova esagɛe ye. A bee bɔŋɛnɛloo pya ye nɔ̄ lo ebebeloo pya Midia.

Jɛhova bee kɔ nɛ Gidiɔn kɔ: ‘M gaa le doo kɔ pya Izrɛl a be eebah, mɛ nyɔɔbee pya o nɔ̄ kuīkpo a, o dap kɛɛrɛ kɔ tɛ̄maloo oloo ekpo na anua o be eebah a. Kɔ nɛ ɛrɛgebah nɛɛ bɔɔ aa kɔ a kii be.’ Nyɔɔwo, 22,000 bee kii be, e 10,000 bee bia. Jɛhova bee kɔ: ‘Pya nɔ̄ a bia ama kuī kpo. Su wa kuma kpaɛ̄ maā sa wa kɔ nɛ kɔ ba a ɔ̄ maā. Sagɛ ɛrɛgebah nɛɛ a dāna bee lɛɛkɛ̄ sɔ̄ a gaa ɔ̄ sa ɛp lo a le pya ye baa aa lu.’ Bee le aba 300 nɛɛ na ba bee bia bu nwaɛ̄dɛɛ̄ sa dāna bee lɛɛkɛ̄ sɔ̄ ba gaa ɔ̄ maā a. Jɛhova bee yira yii kɔ pya nɛɛ a naa kuīkpo ama na a gaa le be eebah pya gbo nɔ̄ Midia lo wa buā lu 135,000 a.

Sɔ̄ elua bu edɛɛ̄ Jɛhova bee kɔ nɛ Gidiɔn kɔ: ‘Nyaawo na sɔ̄ o gaa le bebeloo pya Midia a!’ Gidiɔn bee nɛ dɔɔ̄ni pya ye nɛɛ le gbɛnɛ gbɛnɛka kāna-maā lo ba bee gɔ̄ nu-miā bu. A bee wa kɔ nɛ kɔ: ‘Ɛbaa mɛ, sa doo taɛ nu m doo.’ Gidiɔn bee fuuri dɔɔ̄ni, fɛ ye kāna maā, su ye nu-miā toore bunyɔɔ sa nyɔŋɛ, sa wiikpā kɔ: ‘Gɛ̄ nɔ̄ Jɛhova le lo Gidiɔn!’ E dɛ̄dɛɛ̄ 300 pya nɛɛ a bee ye le loo bee doonage wo. Bɔɔ bee aa pya Midia, e dɛ̄dɛɛ̄ aba bee bɔātɛ̄ teera yaara. E sɔ̄ ba gaa teera, ba bee bɔātɛ̄ bebeloo ɛnia aba sa fɛ ziī. Lo sɔ̄ ama Jɛhova bee yerenage bah nɛ pya Izrɛl kɔ ba a be eebah pya wa nɛɛbaa.