E Na I Doo Lokwa Bari Su I Taāŋabah A?

Dookɛ̄ i bee nɔ bu elua ekobee ue a doo, naale dɛ̄dɛɛ̄ sīdee taāŋabah na a nia Bari a. Kerewo, i dap taāŋabah Nɛɛ a bee i Dɛm bu sīdee e’ɛɛrɛ ye bu. Amunu sīdee taāŋabah [ale yigabari] na a ye nia a? (Jemes 1:27) Ɛp pya nu Baibol tɔgɛ ama.

1. E na i taāŋabah edɛɛa nyɔɔ a?

Nu i taāŋabah edɛɛa nyɔɔ na Baibol. Jizɔs bee kɔ nɛ Bari kɔ: “O ue lu kaka.” (Jɔn 17:17) Pio sīdee taāŋabah ɛp Muɛ̄ Ue Bari lo a le Baibol tɛrɛ. Ba su tɔgɛnu miɔŋɔ nɛɛ le doonu kɛnɛkɛ̄ sere ye dɔ. Bu Jɛhova naa ɛɛ loo pya a “kiī lok Bari.” (Buū Maak 7:9.) Mɛ i doo kɔ bu Jɛhova a ɛɛ sɔ̄ i su zuurabahtɔ̄ a le bu Baibol yerebu dogo.

2. Bu mɛ sīdee na i taāŋabah Jɛhova a?

Aba Jɛhova na a bɔloo kɔ i taāŋabah a, nyɔɔbee alɛ na a bee i dɛm a. (Mumuuna 4:11) Lo ama kura kɔ i ɛrɛ ewere ye loo sa taāŋabah aba alɛ, e ii ɛrɛ esu nwī-nɛɛ-pie, foto ale nu i mɔmadɛɛ̄ ye taāŋabah.—Buū Aisaia 42:8.

I taāŋabah ɛrɛ ele “kaɛ sa nia” Jɛhova. (Pya Rom 12:1) Lo ama kura kɔ i ɛrɛ etɔɔ̄dum tɛ̄maloo ye daakuu a loga. Bu edoba, pya a wereloo Jɛhova ɛrɛ ewereloo daakuu a nɛ nyɔɔ iya dam le wa sa nyɔɔnɛ. E ba ekpooraloo lɛɛloo pya dogo a dap yere muū loo nɛɛ, elap a doodoo ɔ̄ sɔɔ̄, ɔ̄ pɔrɔ eyuu pie, ale ɔ̄ e’aga mii.a

3. E na anua i gbaaloo pya a le bu yira taāŋabah Jɛhova a?

Pya i enɔānu ziī ziī kaɛ nɛ i dee kɔ i “leera Jɛhova . . . bu bɔŋanaloo.” (Le-yɔɔ 111:1, 2) Ziī sīdee i doo lo ama na tɛ̄maloo e’uɛ yɔɔ leera nɛ Bari. (Buū Le-yɔɔ 104:33.) Jɛhova kɔ i si enɔānu nyɔɔbee a were i loo sa suā kɔ pya lo enɔānu eyerebah i nɛ kɔ i ɛrɛ ekpeloo dum mmɛ deedee. Gbaa zɔ̄ŋia sa yere mɛm loo ziī dɔbiī i nɛ.

NƆ YERELOO

4. Ii le esu foto ale bera ɛrɛgeba nu yere bu i taāŋabah

VIDIO: Bari Gbīge Kɔ I Taāŋae Ye Bah Tɛ̄maloo Nwī-Nɛɛ-pie Ni? (3:26)

• E na a bee sira sɔ̄ pio pya nɛɛ Bari a dee kere bee gbī etaāŋa ye bah tɛ̄maloo nwī-nɛɛ-pie a?

Tɔɔ̄loo pio nɛɛ kɔ sɔ̄ ba taāŋabah bari tɛ̄maloo nu ba muɛ na ba ye tɔɔ̄e waɛloo a. Mɛ dodoo wo dapge doo kɔ a tɔɔ̄ binia wa aaloo ni? Buū A’aa 20:4-6 le Le-yɔɔ 106:35, 36, lɛɛ o agara pya ebip ama:

• Pio amunu bera nu na o emɔna pya nɛɛ su taāŋabah Bari a?

• Su nu ba ɔ ale ɛrɛgeba bera nu yere bu taāŋabah tɔɔ̄loo Jɛhova doodoo wa?

• Su nwī-nɛɛ-pie daānu bu taāŋabah tɔɔ̄loo olo doodoo wa?

5. Tataāŋabah aba Jɛhova doo kɔ i lu puɛ aabu keekee ekwɔ yiga

VIDIO: Ɛrɛ Agia Tɛ̄maloo Kaka Ue (5:16)

Buū Le-yɔɔ 91:14, lɛɛ o agara ebip ama:

• E na Jɛhova yira yii kɔ edooe i nɛ lo i were ye loo sa taāŋabah aba alɛ a?

6. I wee taāŋabah Bari bie bu pya i enɔānu

I leera Jɛhova sa yere mɛm loo ɛnia ii sɔ̄ i uɛ yɔɔ sa agara ebip bie enɔānu bu bɔŋanaloo. Buū Le-yɔɔ 22:22, lɛɛ o agara pya ebip ama:

• Wee a kpegeloo sɔ̄ pya dɔɔ̄na agara ebip bie enɔānu ni?

• Eniage a ekpɛ̄naloo lo e’agara ziī bee ebip ni?

7. Wee ɛɛrɛbu Jɛhova sɔ̄ i nyɔɔnɛ pya dɔɔ̄na ponia nu i nɔ

Ɛrɛ gbɛnɛ-edo sīdee i dap nyɔɔnɛ pya dɔɔ̄na ponia pya kaka ue Baibol i enɔā. Buū Le-yɔɔ 9:1 le 34:1, lɛɛ o agara ebip ama:

• Amunu nu o enɔā aābu Baibol na enia a ekɔ nu akiiloo nɛ ziī nɛɛ a?

TƐƐ̄NYƆƆ

I doo kɔ bu Nɛɛ a i Dɛm a ɛɛ tɛ̄maloo etaāŋabah aba alɛ, ye leera bie bu enɔānu, sa kɔ nu i enɔā nɛ pya dɔɔ̄na.

Ebip Tɛ̄ma Nyɔɔ

• Mɛ kɛ̄ na i dap nɔ kɛ̄ etaāŋabah Bari bu sīdee a ye nia aā a?

• E na anua i taāŋabah aba Jɛhova a?

• E na anua i gbaaloo pya a gbī edoo nu a nia Bari ye taāŋabah a?

GBĪTƐ̄ NU

Bu eloh a kɔ “Mm Bee Luna Zooro Nɛ Yɔ,” buu ue a tɔgɛ kɛ̄ zii wa bee lu puɛ aabu taaŋabah yɔ doo.

“Baibol Nyaana Dum” (The Watchtower, July 1, 2011)

Nɔ lo esuā nu edap a yerebah nɛ kɔ o agara ebip bie enɔānu bu bɔŋanaloo.

“Leera Jɛhova Bu Bɔŋanaloo” (The Watchtower, January 2019)

Ɛp kɛ̄ ziī zege gbara bee ɛrɛ biī aāloo si pya i enɔānu kere a naa bee ye waɛbah tua sɔ̄ doo.

Jɛhova Kuū Mɛ Dɛɛ̄loo (3:07)

Gbɛnɛ-edo nɛɛ yiga kɔ gbāgbaɛ̄te lu nukuādɛɛ̄ loo pya Nɛɛ Kraist, mɛ i suge daānu bu i taāŋabah ni?

“E Na Anua Pya Ekeebee Jɛhova Naa Wee Su Gbāgbaɛ̄te Daānu Bu Wa Taāŋabah A?” (Ekobee ue a le nyɔɔ intanɛt)