Bari Bee Dɛm Tuatua Nɛɛdam Le Nɛɛwa

Jɛhova bee kwa ziī gɔh kɛ̄ a kura Idɛn. Ekpe-ekpedɛɛ̄ flawa, te le nam bee mma bu lo gɔh. Lɛɛ Bari dɛm tuatua nɛɛ a kura Adam aābu esaā sa fuuri piogi dum yerebu baɛ ye edee biɔ̄. O suāge nu a sira nyɔɔnɛ ni? Adam bee lu nɛɛ a le dum! Jɛhova bee kɔ Adam a kuūdɛɛ̄loo dɛ̄dɛɛ̄ nu a le bu gɔh Idɛn, sa a kɔ ye nɛ kɔ a nɛ bee dɛ̄dɛɛ̄ nam a le bu lo gɔh.

Jɛhova bee nɛ ziī lok a kuī kaāna Adam. A bee kɔ nɛ Adam kɔ: ‘O dap de bee a aaloo dɛ̄dɛɛ̄ te a le bu gɔh ama, kaɛlɛɛ aba ziī te alu keebee na oo le ede bee a ye aaloo a. Lo o de bee a aaloo lo te o gaa le u.’

Sɔ̄ esaa Jɛhova bee kɔ: ‘M gaa le dɛm nɛɛ yerebah nɛ Adam.’ Bari bee doo kɔ Adam a dɔ bu gbɛnɛ daa, e sɔ̄ Adam le daa Bari bee su ziī ekpo-koo lɛɛ loo Adam sa su dɛma wa ye nɛ. Ye bee bee kura Iv. Adam le Iv na tuatua butɔ a bee bɔātɛ̄ a. A bee tɔɔ̄loo Adam doodoo wa sɔ̄ a bee muɛ ye wa ni? Bu Adam bee ɛɛ kaāna mmɛ kɛ̄ a kɔ: ‘Ɛp nɛɛ Jɛhova dɛm aāloo na ekpo! Ɛ̄hɛɛ̄! Nɛɛ ama le dookɛ̄ mda le doo.’

Jɛhova bee kɔ nɛ Adam le Iv kɔ ba a ɛrɛ gbomiɔŋɔ sa mma bu nyɔuwe. A bee gbī kɔ ba a gbaa ɛrɛ ekpeloo, sa kwa dɛ̄dɛɛ̄ kɛnɛkɛ̄ ama nua paradais, ale ekpedɛɛ̄ gɔh, dookɛ̄ gɔh Idɛn le doo. Mɛ a naa bee sira doo wo. Ena anua a? I gaa le suā bu lo ekobee ue a nyɔɔnɛ.