Tɔgɛ Nia Loo Nu Jɛhova Le Jizɔs Edoora A Nɛ

Wee a tɔɔ̄ loo doodoo wa sɔ̄ o gbo a dɔɔ̄ le nu nɛ ni? Naa daba, bu a wee ɛɛ sa o gbī edoo kɔ a suā kɔ o tɔgɛe nia loo lo dɔɔ̄nu kaāna. Jɛhova le Jizɔs nɛ i dɔɔ̄nu a lee eera. Ena lo dɔɔ̄nu a, e bu mɛ sīdee na i dap tɔgɛ nia loo a?

1. Ziī amunu sīdee na i tɔgɛ nia loo nu Bari le Kraist bee i doo nɛ a?

Baibol kɔ “ɛrɛgeba nɛɛ a . . . yira nɛ [Jizɔs]” etɔɔ̄dum mmɛ deedee. (Jɔn 3:16) I tɔgɛ lo yira doodoo wa? I doo nu a eenyɔɔ aba yiyiga bu Jizɔs. I tɔgɛnage yira tɛ̄maloo i biaɛfii le pya nu i doo. (Jemes 2:17) Sɔ̄ i tɔgɛ yira bu nu i doo le bu nu i kɔ, i agɛrɛtɛ̄ i nyinia gbo loo Jizɔs le ye Tɛ Jɛhova.—Buū Jɔn 14:21.

2. Amunu keebee doonu na a i yerebah nɛ kɔ i tɔgɛ nia loo nu Jɛhova le Jizɔs bee doo a?

Uunɛ lɛɛ Jizɔs gae u, a bee kɔ nɛ pya a wee ye nyɔɔnɛ dumɛ akiiloo dɔɔ̄na sīdee etɔgɛ nia loo ye waara zɔɔ. A bee wa kɔ nɛ kɔ ba edooe ziī keebee doonu Baibol kure “Nuede Uunɛ [Nɛɛ-a-i ɛrɛ],” a lunage ekure Doonu Nyɛŋiabu Loo Luh Jizɔs. (1 Pya Kɔrint 11:20) Jizɔs bee bɔātɛ̄ doonu ama lokwa pya ye nɛɛ lɛɛratam le dɛ̄dɛɛ̄ pya esikɛ̄ ye nyɔɔnɛ dumɛ dap wee nyɛŋiabu kɔ a bee nɛ ye dum i nyɔɔ. Kiiloo doonu ama, Jizɔs bee nɛ lok kɔ: “Dooraa lo ba ama bu kɛkɛɛrɛ mɛ bu.” (Luk 22:19) Lele kɛ̄ loo Doonu Nyɛŋiabu Loo Luh Jizɔs tɔgɛ kɔ bu a ɛɛ loo wereloo Jɛhova le Jizɔs i tɔgɛ kumaloo.

NƆ YERELOO

3. Ena i dap doo lo etɔgɛ doo yaa a?

Naa su kɔ ziī nɛɛ kpɔā a sɔ̄ maā aa bee a su. E aage dee waɛ kɔ o ibere nu nɛɛ ama bee a doo nɛ ni? Sɛh o gbīge kɛ̄ edoo tɔgɛ lo nɛɛ kɔ bu a ɛɛe loo nu a bee a doo nɛ ni?

Jɛhova na a i sere dum a. Buū 1 Jɔn 4:8-10, lɛɛ o agara pya ebip ama:

• Ena anua waara zɔɔ Jizɔs lu keebee dɔɔ̄nu a?

• Nu Jɛhova le Jizɔs a doo nɛ ama tɔɔ̄ a loo doodoo wa?

I tɔgɛ nia loo nu Jɛhova le Jizɔs i doo nɛ doodoo wa? Buū 2 Pya Kɔrint 5:15 le 1 Jɔn 4:11; 5:3. Agara ebip ama sɔ̄ o ebuna ziī ziī dɔ ama sah:

• Dɛɛa nyɔɔ dɔ kpa kaɛ ama, e na i doo lo etɔgɛ doo yaa a?

4. Nɔ Jizɔs

Dɔɔ̄na sīdee i dap tɔgɛ nia na tɛ̄maloo enɔ Jizɔs. Buū 1 Pita 2:21, lɛɛ o agara ebip ama:

• Bu pya amunu sīdee na o dap nyɔɔnɛ pah ekaɛtɔ Jizɔs kaāna a?

5. Si Doonu Nyɛŋiabu Loo Luh Jizɔs

Lo emuɛ nu a bee sira bie tuatua Doonu Nuede Uunɛ Nɛɛ-a-i-ɛrɛ, buū Luk 22:14, 19, 20. Lɛɛ o agara pya ebip ama:

• Ena a bee sira bie Doonu Nuede Uunɛ Nɛɛ-a-i-ɛrɛ a?

• Ena lo fituru le mii tɔɔ̄dɔ a?—Buū 19 le 20 barakpaɛ̄

Jizɔs bee gbī kɔ pya a wee ye nyɔɔnɛ dumɛ a doo Doonu Nuede Uunɛ Nɛɛ-a-i-ɛrɛ ziī sɔ̄ bu ziī zua nyɔɔ dee doonu nyɛŋiabu loo ye luh. Nyɔɔwo, Pya Ekeebee Jɛhova wee gbaa bɔŋia ziī ziī zua lo enyɛŋiabu luh Kraist bu sīdee a bee nɛ bu lok. Lo esuā nu akiiloo gbɛnɛ doonu ama, bira lo VIDIO. Lɛɛ o agara ebip a nyɔɔnɛ ama.

VIDIO: Nyɛŋiabu Loo Luh Jizɔs (1:41)

• Ena a wee lu edoo bie Doonu Nyɛŋiabu Loo Luh Jizɔs a?

Lo fituru le mii tɔɔ̄dɔ nu. Lo fituru tɔɔ̄dɔ ekpaloo Jizɔs a mmana lo a bee i su wɔma zɔɔ bee. Lo mii tɔɔ̄dɔ ye miī

TƐƐ̄NYƆƆ

I tɔgɛ nia loo nu Jizɔs i doo nɛ sɔ̄ i ye ɛrɛ yira bu sa si Doonu Nyɛŋiabu Loo ye luh.

Ebip Tɛ̄ma Nyɔɔ

• Ena ɛrɛ yira bu Jizɔs kura a?

• O tɔgɛ nia loo nu Jɛhova le Jizɔs edoora a nɛ doodoo wa?

• Ena anua alu ebɛɛ̄ kɔ i si Doonu Nyɛŋiabu Loo Luh Kraist a?

GBĪTƐ̄ NU

Ena luh Kraist i zū kɔ i doo a?

A Su Ye Ekpaloo Nɛa Ka Jɛhova(9:28)

Nɔ nu akiiloo yira le kɛ̄ i dap tɔgɛ doo.

“Tɔgɛ O Yira Bu Pya Yii Jɛhova” (The Watchtower, October 2016)

Bu eloh a kɔ “I Feel Clean, Alive, and Whole,” buū nu akiiloo kɛ̄ dum ziī wa bee nyaa doo sɔ̄ a bee nɔ nu akiiloo waara zɔɔ Kraist.

“Baibol Nyaana Dum” (The Watchtower, August 1, 2011)

Nɔ lo esuā nu anua aba nwī epoo nɛɛ wee de fituru sa ɔ̄ mii bie Doonu Nyɛŋiabu Loo Luh Jizɔs.

“Ena Anua Kɛ̄ Pya Ekeebee Jɛhova Doo Doonu Nuede Uunɛ Nɛɛ-a-i-ɛrɛ Doo Lu Kee Loo Kɛ̄ Pya Dɔɔ̄na Tɔbari Sere Baloo Doo A?” (Ekobee ue a le nyɔɔ intanɛt)