Iseri Jehova i Vwo i Baibol Obọ Aye?
Iseri Jehova i ha erhianrhian i Baibol sansan ruiruo ne. Ọrẹn ame i vwo ọdaremẹro kpahen New World Translation of the Holy Scriptures maido uvuẹn edjadjẹ ri vworie uvuẹn erhianrhian ọnana, fọkiẹ odẹ Osolobrugwẹ ra ha ruiruo, oborẹ ọ gba te, ọrhẹ oborẹ o fiotọre lele.
Odẹ Osolobrugwẹ ra ha ruiruo. Ihworho ezẹko re fomu i Baibol phia, e kwe họghọ rẹn ọro vwo i Baibol na-a. Jerẹ udje, uvuẹn erhianrhian i Baibol owu, a hunute odẹ ihworho ri ghwẹ 70 fọkime aye i toroba erhianrhian i Baibol ọnana re fomu phia. Ọrẹn uvuẹn i Baibol owu ọvo na, e tiẹ odẹ Osolobrugwẹ ro vwo i Baibol na, ro rhiẹ i Jehova nie kpatakpata!
Ọrẹ ovẹnẹ, Baibol ọrẹ New World Translation o fiẹ odẹ Osolobrugwẹ rhẹ ekete buebun rọ homaphia uvuẹn Baibol ahwanren na, ọrẹn e rhe ihworho ri wian rhẹ erhianrhian i Baibol na-a.
Oborẹ ọ gba te. Orhiẹ erhianrhian i Baibol ephian yi vwo iyẹnrẹn rọ gbare jerẹ i Baibol ahwanren na-a. Jerẹ udje, erhianrhian i Baibol owu nọ rhian Matthew 7:13 omana: “Ha kpahen anurẹsẹ ọkpakpa na, nime anurẹsẹ amwa erhanren okekeri, izede ro lele fie ọ phẹnren.” Ọrẹn, Baibol ahwanren na ọ ha ẹmro na “oghwọghọ” ruiruo, orhiẹ “amwa erhanre-en.” Ọkezẹko erhienrhianrhian na yi fiẹ ẹmro na “amwa erhanren” rhọye nime aye i vwo imwẹro taghene evwọkon ina torhẹ uvuẹn amwa erhanren bẹmẹdẹ. Ọrẹn Baibol na o kwerhọ uyono ọrana-a. Omarana, Baibol ọrẹ New World Translation nọ ha ẹmro rọ gbare ruiruo: “Ha kpahen anurẹsẹ ọkpakpa na, fọkime anurẹsẹ okekeri ọrhẹ izede ro phẹnren na ye suẹn riẹ oghwọghọ.”
Oborẹ o fiotọre te. O fo nẹ erhianrhian i Baibol ọ gba ọvo-o, o fori no fiotọre ne ji vwẹruọ ye. Roro kpahen udje owu. Uvuẹn Romans 12:11, ọnyikọ Paul nọ ha ẹmro owu ruiruo rọ nọ sabu mevirhọ “ẹhẹn rọ họrhọ.” Ra mẹriẹn taghene ẹmro ọnana ọ dabu merhen uvuẹn edjadjẹ Oyibo-o, Baibol ọrẹ New World Translation nọ rhian oghwẹmro na izede ra na sabu kiki vwẹruọ ye. Nọ tare taghene o fori nẹ “ẹhẹn ọfuanfon na ọ lẹrhẹ are [Ilele Kristi] vwo oruru.”
Haba odẹ Osolobrugwẹ rẹ New World Translation na ọ ha ruiruo, oborẹ ọ gba te ọrhẹ oborẹ o fiotọre te, o ji vwo emru ọrọrọ rọ lẹrheriẹ vẹnẹ omamọ: A vwa rhẹ ye-e, e tiobọnie ọphẹ. Omarana, iduduru ihworho na sabu se i Baibol na uvuẹn edjadjẹ aye, omaran ji te ihworho ri na ja sabu dẹ i Baibol na bi.