Jesu o Yono Idibo yi Oborẹ a Nẹrhomo

Kemru kemru rẹ otu i Pharisee na e ruẹ, ọrẹ aye ine djoma aye neneyo oma ọ merhen ihworho na. Aye i rhe dje uruemru esiri phia, aye e ruie neneyo ihworho i vwo oniso kpahen aye. Aye a nẹrhomo uvuẹn afiede neneyo ihworho i sabu mẹrẹn aye. Otu i Pharisee na e yono ẹrhomo iseseri rhẹ urhomu, aye na nẹrhomo na phia uvuẹn i synagogue ọrhẹ uvuẹn idumu na neneyo ihworho i sabu rhon aye. Omarana, no gbe ihworho na unu ọke i Jesu ọ ta rẹn aye taghene: ‘Are i vwa nẹrhomo jerẹ otu i Pharisee na-a. Otu i Pharisee na e roro taghene oma ọ merhen Osolobrugwẹ fọkiẹ ẹrhomo iseseri rẹ aye a nẹ na, ọrẹn, oma ọ vwọ merhen i Jehova kpahiẹ-ẹn. Wẹwẹ rhẹ i Jehova ya gba tẹmro kugbe ọke wa nẹrhomo. Wu vwa vwanriẹn ẹmro owu ọgbọ buebu-un. Jehova ọ guọlọre ne wu ta riẹn oborẹ o kpokpo ẹhẹn ọnọ.’

Jesu no yono idibo yi taghene aye i nẹrhomo omana: “Ọsẹ ame obẹ idjuwu, jenẹ e ru odẹ ọnọ fon. Jenẹ Uvie ọnọ rhe. Jene ru ọhọre ọnọ uvuẹn otọrakpọ na jerẹ oborẹ e ruie obẹ odjuwu.” Jesu ọ ji ta rẹn aye nẹ aye i nẹrhomo kpahen emaren aye ina re kẹdẹkẹdẹ, ọdandan ra na harhomu aye, ọrhẹ edamẹ erọrọ aye i vwori.

Jesu nọ tare: ‘Are i vwa dobọ ẹrhomo ẹnẹ ji-i. Are i rha nekpẹn ekwakwa irhorhomu mie Jehova ro rhiẹ Ọsẹ are. Esẹ ọrhẹ izu ephian i guọlọ yẹ emọ aye ekwakwa irhorhomu. Ọmọ ọnọ ọrhọ nekpẹn ibrẹdi mio, wu na yẹ ye atita? Ọrhọ nekpẹn erhenrin mio, wu na yẹ ye obodirin?’

Ọke oru, Jesu nọ ta rẹn aye oborẹ aye ina sabu yono nie rhe: ‘Orhianẹ are i rhe oborẹ e tiobọnẹ ẹghẹlẹ irhorhomu harẹn emọ are, Jehova ro rhiẹ Ọsẹ ọwan o tiobọnẹ ẹhẹn ọfuanfon na rẹn ihworho ra nekpẹn yen mie yi? O fori taghene are i rha nẹrhomo.’ Wa ha urhebro i Jesu ọnana ruiruo? Ekwakwa ego wa nẹrhomo kpahan?