Moses ọrhẹ Aaron ni rharhumu ya ta rẹn Pharaoh kpahen oborẹ Osolobrugwẹ ọ tare: ‘We rhe kwe tiobọnu ihworho mẹ nẹ aye i nyarhẹ-ẹn, ni mi ne dje ọden ruẹ ẹkwotọre na.’ Ọden buebun ni vuọn oghwa itu Egypt na ephian, edafe ọrhẹ ivwiegbere. Ẹkwotọre na nọ vuọnren rhẹ ọden. Ọrẹn, ọden na a ruẹ i Goshen ro rhiẹ amwa rẹ emọ Israel i havwọ-ọ. Nẹ ukpokpogho ọrẹ ẹne na nyarhẹn, emọ Israel arha dẹrughwaroghwu ukpokpogho owuorowu-u. Pharaoh nọ tare: ‘Biko rẹ i Jehova nọ dobọ ọden enana ji. Are ina sabu nyarhẹn.’ Ọrẹn, ọke i Jehova ọ dobọ ọden na ji, Pharaoh no wene ẹhẹn. Pharaoh ono ghini tiobọnu ihworho na?

Jehova nọ tare: ‘Pharaoh orho kwe tiobọnu ihworho mẹ nẹ aye i nyarhẹ-ẹn, eranmo itu Egypt ine kpomu jeghwai hwu.’ Ẹdẹ ọreva ye, eranmo na ne hwuẹ. Ọrẹn, eranmo emọ Israel e hwu-u. Udabọ ọrana, Pharaoh o ji vwo udu, o kwe tiobọnu aye nẹ aye i nyarhẹ-ẹn.

Omarana, Jehova nọ ta rẹn i Moses nọ rharhumu bru i Pharaoh, no phopho iphirhikerewi rhẹ aphẹrẹ na. Iphirhikerewi na ni dẹriẹrhiẹ oghwurhie, oghwurhie na nọ vuọn oma itu Egypt. Oghwurhie na, nọ suẹ era ra miama rhẹ oma itu Egypt ọrhẹ eranmo aye. Udabọ ọrana, Pharaoh o ji kwe tiobọnu emọ Israel nẹ aye i nyarhẹ-ẹn.

Jehova nọ rharhumu dje i Moses bru i Pharaoh, Moses nọ ta riẹn: ‘Wa ji guọlọ tiobọnu ihworho mẹ? Odẹ rọ sa na, itita ine se nẹ oberun rhe jerẹ oso.’ Ẹdẹ ọreva ye, Jehova no ghini dje itita, agbranran ọrhẹ erhanren nẹ odjuwu rhe. Egypt ọ ji dẹrughwaroghwu aruo ogiribo ọrana dẹ-ẹ. Ọsoso erhan ọrhẹ ewawọ itu Egypt ni hwuru, ọrẹn, ewawọ ọrhẹ erhan emọ Israel ri ha uvuẹn Goshen e hwu-u. Pharaoh nọ tare: ‘Biko rẹ i Jehova nọ dobọ ukpokpogho na ji! Mi ne tiobọnu are nẹ are i nyarhẹn.’ Ọrẹn, ogege oso atita na ọ dobọji, Pharaoh no ji wene ẹhẹn yen.

Moses nọ tare: ‘Vwana, ebaka a samọ riẹ ọsoso ewawọ are ri hẹrhẹre.’ Ebaka na ni riẹ ẹbe ri hẹrhẹre uvuẹn ikebi ọrhẹ uvuẹn erhan na. Pharaoh nọ tare: ‘Biko, rẹ i Jehova mẹ, nọ dobọ ebaka na ji.’ Ọrẹn, ọke ebaka na a dobọji, Pharaoh o ji kwe tiobọnu aye-e.

Jehova nọ ta rẹn i Moses: ‘Rionbọ rierun.’ Ogege, aruọke na no mwuokuku. Itu Egypt a sabu mẹrẹn emru owuorowu ọsoso ẹdọke esa-a. Emọ Israel ọvo ya mẹrẹn ude uvuẹn ekete aye i havwọ.

Pharaoh nọ ta rẹn i Moses: ‘Wẹwẹ ọrhẹ ihworho enọ ina sabu nyarhẹn. Ọrẹn, are i nyajẹ eranmo are vwo.’ Moses nọ tare: ‘Ame ina kpare eranmo ame ba, nẹ ame i sabu ha aye ze izobo rẹn Osolobrugwẹ ame.’ Pharaoh nọ tuekwẹre. Nọ vanren: ‘Nyarhẹn nẹ obaro mẹ! Mi rha rharhumu mẹruọn, wu ne hwuo.’

Moses nọ ta rẹn i Pharaoh taghene ọ vwọ samọ mẹriẹn ghwomara-an. Ọrẹn, Moses ọ ki nyarhẹn, nọ ta rẹn i Pharaoh: ‘Uvuẹn erhẹrhẹ ason ọnana, ọsoso emọ ekpako ri ha uvuẹn Egypt, ine hwuo, nẹ ọmọ ọkpako i Pharaoh ye fiẹ ọmọ ọkpako evrẹn na.’

Jehova nọ ta rẹn emọ Israel nẹ aye i riẹ emaren oghẹnrensan. Jehova nọ tare: ‘Are i kpe ọmogegede yanghene ọmọ ẹvwe rọ ha ẹgbukpe owu, nẹ are i ha ọbara ye gbule anurẹsẹ oghwa are. Are i ha aranmo na tọn, nẹ are i ha ibrẹdi ro vwo phie riẹ. Are i ku ewun ọrhẹ isabatu are rhọ, nẹ are i mwuegbe are ina nyarhẹn. Ason ọnana, mi ne simi are.’ Gbe roro oborẹ oma ọnọ merhen emọ Israel te.

Erhẹrhẹ ason, ọmakashe i Jehova nọ ruẹ oghwa itu Egypt ephian. Ọmọ ọkpako rọ ha uvuẹn oghwa ro vwo vwo ọbara uvuẹn anurẹsẹ ye, no hwuẹ. Ọrẹn, ọmakashe na nọ nyavrẹn oghwa ro vwo ọbara uvuẹn anurẹsẹ ye. Emọ ekpako itu Egypt ephian te edafe ọrhẹ ivwiegbere, ni hwuru. Ọrẹn, o vwo ọmọ owuorowu ro rhiẹ onyẹ Israel ro hwuru-u.

Ọmọ ọkpako i Pharaoh dede, o ji hwu. Nọ da i Pharaoh omamọ. Ogege, Pharaoh nọ ta rẹn i Moses ọrhẹ Aaron: ‘Are i vẹnrẹn. Are i nẹ ekete aran. Are i nyarhẹn ya ga Osolobrugwẹ are. Are i ha eranmo are, nẹ are i nyarhẹn!’

Emọ Israel ni nẹ uvuẹn Egypt ọke ubiamo na ọ dabu kinhariẹ ne, a kwaphierẹ aye rhọ lele ekrun ọrhẹ uvwiẹ aye i nurhe. Aye ephian i bun te 600, 000. Habaye, awọrọ i ji lele aye, neneyo aye i sabu kwomakugbe aye ga i Jehova. Emọ Israel i vwo ugbomọphẹ ne!

Nẹ aye i sabu karorhọ obore i Jehova o simirin aye lele, aye ina rha riorẹ oghẹnrensan ọrana kẹgbukpe kẹgbukpe. E se orẹ ọrana, Orẹ Ọnyavrẹn.