Jehova nọ ta rẹn Moses: ‘Bru mẹ rhiẹ oberun ugbenu na. Mi na ya irhi mẹ rhẹ evwẹre itita, ni mi na ha aye wẹn.’ Moses no rheren riẹ oberun ugbenu na, nọ daji avwaye ẹdọke 40 ọrhẹ ason 40. Ọke i Moses ọ ha avwaye, Jehova nọ ya irhi ikpe na rhẹ evwẹre itita eva, nọ ha rẹ aye rẹn Moses.

Ọke oru, emọ Israel ni rorori taghene i Moses ọ nyaji aye vwo ne. Aye ni ta rẹn Aaron: ‘Ame i guọlọ ohworho ro no sun ame. Ru osolobrugwẹ harẹn ame!’ Aaron nọ tare: ‘Are i ha oro rhe.’ Nọ wrorhan oro na, nọ hariẹ ru oma ọmọ erhuẹn harẹn aye. Ihworho na ni tare: ‘Ọmọ erhuẹn ọnana yẹ Osolobrugwẹ ame ro simi rẹ ame nẹ Egypt!’ Aye na ha ẹga rẹn oma ọmọ erhuẹn ra ha oro ru na, aye na riorẹ. Oborẹ aye i ruru na ọsọre? Ee, nime aye i vive rẹn i Jehova ne, taghene aye ina ga i Jehova ọvo. Ọrẹn, aye erhe ru oborẹ aye i veri na-a.

Ọke i Jehova ọ mẹrẹn oborẹ ọ phia, nọ ta rẹn i Moses: ‘Nyarhẹn bru ihworho na. Aye i tiẹn uvwele mẹ, aye na ha ẹga rẹn osolobrugwẹ efian.’ Moses nọ ruẹ otọre nẹ ugbenu na, rhẹ evwẹre itita eva na.

Ọke i Moses o ti kẹrẹ ọko na, no rhon edon ihworho ra so ijoro. Nọ mẹrenrẹn aye, aye e gbe igbegbe jeghwai gburhomu rhotọre rẹn oma ọmọ erhuẹn na. Moses nọ tuekwẹre ọgbogbanhon. No doron itita eva na rhotọre, aye ni ghwọghọre yẹghẹyẹghẹ. Ogege, Moses nọ ghwọghọ oma ọmọ erhuẹn na. Moses nọ nọ Aaron: ‘Marhẹ yẹ ihworho na i ru lẹrhuọ ru emru obiobiomu ọnana?’ Aaron nọ tare: ‘Wu vwa tuekwẹre-e. Wu rhe oborẹ ihworho enana i havwọ. Aye i tare taghene aye i guọlọ osolobrugwẹ, omarana, ni mi doron oro aye rhẹ erhanren, ọmọ erhuẹn ọnana nọ homaphia!’ Manẹ Aaron o vwo ru omara-an. Moses nọ ghwẹrioma riẹ oberun ugbenu na ya rẹ i Jehova nọ harhomu ihworho na.

Jehova nọ harhomu ihworho ri vwo omwemẹ rẹ aye ina huvwele yi. Wu mẹrẹn oborẹ ọsoriẹ ọ ghanren rẹ emọ Israel ina nyalele ọkpọvi Moses?

Ọke i Moses ọ ha oberun Ugbenu i Sinai, Jehova nọ ta riẹn nọ bọn oghwọgbọ oghẹnrensan re se i tabernacle, ro rhiẹ ekete emọ Israel ina ha ẹga riẹn. Aye ina bọn yen neneyo aye i sabu rha kpariẹ riẹ ekete aye a nya ephian.

Jehova nọ tare: ‘Ta rẹn ihworho na nẹ aye i toro oborẹ aye i vwori, na sabu bọn i tabernacle na.’ Emọ Israel ni toro oro, idọlọ efuanfon, erẹmo, itita eghoghanren ọrhẹ itama eghoghanren. Aye ni ji toro iruru, ewẹn, ephianron eranmo ọrhẹ ekwakwa erọrọ buebun. Aye i tiobọnu ekwakwa bun omamọ, te erhirhiẹ i Moses ọ ta rẹn aye: ‘O te ne! Are i vwa ha rhe ghwomara-an.’

Ehworharhe ọrhẹ emẹse buebun ri tẹn ona, yi ha userhumu phia bọn i tabernacle na. Jehova ọ yẹrẹ aye ẹghwanren rẹ aye ina wian owian na. Ihworho ezẹko i wian owian re rhuon oruru. Awọrọ i koko itita, erọrọ i ha oro wian owian, awọrọ i jare erhan.

Ihworho na ni bọn i tabernacle na lele oborẹ i Jehova ọ ta rẹn aye. Aye ni ha ikọtini orhorhomu ghalẹ i tabernacle na akwava, ekete Ọfuanfon ọrhẹ ekete Rọ Mai Fon. Ekete Rọ Mai Fon na yẹ owọ ọphọ na ọ havwọ, oro ọrhẹ orhan re se acacia ya ha ru owọ ọphọ na. Ekete Ọfuanfon na, o vwo ekete ra kpare ukpẹ rhọ ra ha oro ru, imẹdjẹ ọrhẹ agbarha ra torhẹ ajijan. O ji vwo oze ra ha erẹnmo ru ọrhẹ agbarha ọduado uvuẹn egodo na. Owọ ọphọ na, ọ karorhọ emọ Israel kpahen ive aye ina huvwele i Jehova. Wu rhe oborẹ e se ọphọ? Ọphọ o mevirhọ ive oghẹnrensan.

Jehova ọ djẹ Aaron ọrhẹ emọyen ehworhare nẹ aye i rhiẹ irherẹn uvuẹn i tabernacle na. Aye ina hẹrote yi jeghwai rhe ze izobo rẹn i Jehova avwaye. Aaron ọvo yo vwo uphẹn rọ nọ ruẹ ekete Rọ Mai Fon na, nime ọye orherẹn ọduado. Aaron ọ ruẹ ekete Rọ Mai Fon na kẹgbukpe kẹgbukpe ye ze izobo fọkiẹ edandan yen, edandan ekrun ọnẹyen ọrhẹ edandan emọ Israel ephian.

Ẹgbukpe owu ọ vrẹn hin ọke emọ Israel e nẹ Egypt, aye ni bọn i tabernacle na hin. Vwana, aye i vwo ekete rẹ aye ina ga i Jehova ne.

Odidi Jehova nọ vuọn i tabernacle na, avwre nọ homaphia oberun i tabernacle na. Ọke ephian avwre na ọ ha oberun i tabernacle na, emọ Israel na daji ekete aye i havwọ. Ọrẹn, avwre na orho nẹ oberun i tabernacle na, aye ne rhe taghene o te ọke aye ina tuẹn onya rhọ ne. Aye ne kpitin i tabernacle na, aye na nyalele avwre na.