Enọ Rẹ Otu Re Se Ẹbe Ọwan I Nọren

Ecclesiastes 5:8 o sekpahen ituakpọ re suẹn, gbinẹ o ji sekpahen Jehova?

Oghwẹmro ọnana orho: “Wu rha mẹrẹn ovwiegbere re sehiẹn, ọrhẹ orhienbro ọsoso re gbeghwu, kugbe irueruo ọvwata ra sẹrerhumuji uvuẹn ẹkwotọre ọnọ, wu vwe jenẹ ẹmro na o gbo unu-u. Fọkime ohworho ro suẹn rọ do ghwẹ ye ọ mẹriẹn, o ji vwo awọrọ ri ji do ghwẹ aye.”—Eccl. 5:8.

Sekpahen irherhe ituakpọ, ẹmro ọnana o dje kpahen ituakpọ ri vwo omẹgbanhon usun. Ọrẹn, erhe roro kpahiẹn rhọ, o ji vwo urhomẹmro ro sekpahen i Jehova, rọ nọ yẹ ọwan urhebro ọrhẹ imwẹro.

Ecclesiastes 5:8 ọ ta kpahen osuinsuensun ro sehiẹn ivwiegbere, ro vwo ji brorhiẹn ọsoso rẹn aye. O fori nẹ osuinsuensun ọnana ọ karorhọ taghene ohworho ro vwo omẹgbanhon usun ghwẹ ye ọ mẹriẹn. Itiọrurhomẹmro, ọnọ sabu vwo awọrọ ri vwo omẹgbanhon usun ghwẹ ye. Ọrẹ omemwurhọ, uvuẹn isuensuon ituakpọ, ọsoso ihworho re suẹn ina sabu biomu hin, rọ lẹrhẹ ihworho rioja fọkiẹ oborẹ aye e suẹn lele.

Ọrẹn, erhirhiẹ na ọrhọ tobọ biomu dede, jenẹ o mwu ọwan ẹro taghene Jehova ‘ọ mẹrẹn ihworho re suẹn’ inyenana. Ana sabu nekpẹn userhumu mie Osolobrugwẹ, ji donron ebẹnbẹn ọwan vwe yi. (Ps. 55:22; Phil. 4:6, 7) Ọwan i rheri taghene “ikẹro i Jehova e ni ọsoso otọrakpọ na, no dje omẹgbanhon ọnẹyen harẹn ihworho ra ga ye rhẹ ọsoso ọmudu aye.”—2 Chron. 16:9.

Omarana, oborẹ ọ ha uvuẹn Ecclesiastes 5:8 ọ lẹrherẹ ọwan karorhọ oborẹ erhirhiẹ igọmẹti akpọ na ọ havwọ; ọrẹn ọ ji lẹrhẹ ọwan rhe taghene o vwo ohworho ro vwo omẹgbanhon usun ghwẹ aye ephian. Ọrọ mai ghanren, oghwẹmro ọrana ọnọ lẹrhẹ ọwan karorhọ taghene Jehova yẹ ohworho ro vwo Omẹgbanhon Rọmaido uvuẹn ọsoso akpọ na. Ọye ọ nyoma Ọmọyen Jesu Kristi ro rhiẹ Orodje Uvie Osolobrugwẹ suẹn ne. Ọrọmaigbanhon na, rọ mẹrẹn ekwakwa ephian, o brorhiẹn ọsoso, omaran ji te Ọmọyen.