Awan mwan usuẹn Iseri Jehova ye wu rheri? Wẹwẹ rhẹ otu ame ezẹko erhirhiẹ kugbe, wian kugbe, jeghwai riẹ isukuru kugbe. Ọkezẹko wẹwẹ rhẹ ame gba tẹmro i Baibol kugbe dẹ ne. Ayọmo yẹ ghini ame, mesoriẹ ame e dje esegburhomẹmro ame phia uvuẹn afiede?

Ame ihworho kpekpa. Ame i nẹ ẹkwotọre rhẹ oka iruemru sansan rhe. Ezẹko usuẹn ame i riẹ ẹga ọrọrọ vẹrhẹ bri. Ezẹko dede evwo esegburhomẹmro kpahen Osolobrugwẹ bri-i. Jọrẹn bọmọke ame ki rhiẹ Iseri, ame dabu ha ọke e yono i Baibol na. (Acts 17:11) Ame i kwerhọ oborẹ ame i yonorin na, nẹ ame djẹ odjẹ omobọ ame, ana ga Jehova Osolobrugwẹ.

Ame a mẹrẹn erere nẹ uyono i Baibol na. Jerẹ ihworho erọrọ, ame vwo ebẹnbẹn rhẹ ovwiẹlẹ ọrẹ ame. Ame a mẹrẹn omamerhomẹ uvuẹn akpọ-enyerẹn ame nime ame a nyalele iruemru-urhi Baibol kẹdẹkẹdẹ. (Psalm 128:1, 2) Ọrana usuẹn oborẹ ọ lẹrhẹ ame lele ihworho yono i Baibol na.

Ame a nyalele iruemru-urhi ọrẹ Osolobrugwẹ. Iruemru-urhi enana re ha uvuẹn i Baibol na ọ lẹrhẹ ame vwo enyerẹn-obọdẹn jeghwai dje ọghọ harẹn awọrọ, kugbe omamọ uruemru jerẹ, urhomẹmro-ẹta rhẹ uruemru esiri. Iruemru-urhi enana e toroba oma-ọkpokpọ ọrhẹ erhumu ihworho re ha uvuẹn ẹkwotọre na. Aye a jeghwai toroba onyerẹnkugbe ekrun rhẹ uruemru ọforon. Omwuru ame ẹro taghene ‘Osolobrugwẹ ọvwọ sanọ ihworho-o’ fọkiẹ omaran na, ihworho ame rhẹ aye agba ga kugbe ekete akpọ na okeri te, i vwo omamọ onyerẹnkugbe rọ vabọ usuon oseghe, ame vwa ji sanọ ihworho-o. Dedevwo ame ihworho kpekpa, ame ihworho oghẹnrensan.—Acts 4:13; 10:34, 35.

• Marhẹ Iseri Jehova rhẹ awọrọ iru họhọ oma?

• Omamọ iruemru ego yẹ Iseri Jehova i yono nẹ i Baibol na rhe ne?

Ihworho buebun e roro taghene, Iseri Jehova, odẹ ẹga ọkpokpọ. Jọrẹn, ẹgbukpe 2,700 re vrẹn ne, idibo Osolobrugwẹ urhomẹmro na, e djerẹ aye rhẹ ‘iseri’ enẹyen. (Isaiah 43:10-12) Oki rhi me te 1931, e rhe rẹ ame rhẹ Emọ Uyono i Baibol. Mesoriẹ ame a riẹ odẹ na Iseri Jehova?

Odẹ na o dje Osolobrugwẹ ame phia. Sekpahen imanuscripti ahwanren, odẹ Osolobrugwẹ, Jehova, ọ homaphia uvuẹn i Baibol na ọgbọ uriusiorin buebun. Uvuẹn erhianrhian i Baibol buebun, e wene odẹ na riẹ edovan jerẹ, Ọrovwori yanghene Osolobrugwẹ. Jọrẹn Ọsolobrugwẹ urhomẹmro na o dje omayen phia harẹn i Moses nyoma odẹ ọnẹyen, Jehova, ọrhọ ta: ‘Ọnana yẹ odẹ mẹ bẹmẹdẹ.’ (Exodus 3:15) Omaran na, nọ vẹnẹ omayen nẹ isolobrugwẹ efian ephian. Oma ọmerhen ame rẹ a ha odẹ ọfuanfon ọrẹ Osolobrugwẹ na e se ame.

Odẹ na o dje owian ame phia. Ihworho ahwanren buebun i se oseri kpahen esegburhomẹmro aye i vwori kpahen i Jehova, ọ tonrhọ rhẹ ohworho ọvwata, Abel. Uvwre ẹgbukpe buebun, Noah, Abraham, Sarah, Moses, David, rhẹ ihworho erọrọ ni kwomakugbe ‘otu iseri buebun’ enana. (Hebrews 11:4–12:1) Jerẹ oborẹ ohworho ose oseri harẹn ọrẹ o vwo ru sọ uvuẹn ẹghware, ame jeghwai brorhiẹn rẹ ame ine se oseri urhomẹmro kpahen Osolobrugwẹ ame.

Ame a hẹrokele i Jesu. Baibol na o se i Jesu ‘oseri urhomẹmro ọrhẹ ọrẹ ovwo esegburhomẹmro na.’ (Revelation 3:14) Jesu ọvo ọtobọ ta taghene ọye ‘o dje odẹ Osolobrugwẹ phia,’ jeghwai ha ọke na ephian e ‘se oseri urhomẹmro’ kpahen Osolobrugwẹ. (John 17:26; 18:37) Omaran na, nẹ ofori taghene Ilelikristi urhomẹmro na a ha odẹ i Jehova e se aye, nẹ aye ji dje yi phia. Ọnana yẹ oborẹ Iseri Jehova a damoma rẹ aye ine ru.

• Mesoriẹ Emọ Uyono i Baibol na a riẹ odẹ na Iseri Jehova?

• Marhẹ ojiri te ne rẹ i Jehova o vwo iseri uvuẹn otọrakpọ na ne?

• Ọrọmo yẹ Oseri Jehova rọ maido kparobọ?

Baibol na ọtare taghene i Kristi o hwu hin, iyono efian ena homaphia uvuẹn uvwre Ilelikristi ukukaro, jeghwai gbe urhomẹmro i Baibol ghwu. (Acts 20:29, 30) Ọke o jiribẹn, nọ ghini ghwai phia omaran. Nẹ aye ha uyono efian ba uyono i Jesu, ẹga efian nọ rhe mọ homaphia. (2 Timothy 4:3, 4) Marhẹ o ru mwu ame ẹro taghene ame i rhe oborẹ i Baibol na o ghini yono fiotọre inyenana?

Ọke no rhi me te i Jehova o ghwolo urhomẹmro na phia. Ọye ọrhọ ta taghene uvwre ‘ọke oba na, irherhe ọgbagba na, ono gbephe.’ (Daniel 12:4) Uvuẹn 1870, i biẹ otu ihworho ra guọlọ-urhomemro na, ne mọ mẹriẹn taghene iyono buebun uvuẹn ishọshi, a ha aye nẹ i Baibol rhe-e. Omaran na, aye nẹ a guọlọ otọre oborẹ i Baibol na o ghini yono. Jehova nọ ha ebrurhọ harẹn aye, aye ni me rhe i Baibol na fiotọre.

Ehworhare urhomẹmro e dabu yono i Baibol na fiotọre. Emọ uyono i Baibol enana, ye tonrhọ oka uruemru uyono rẹ ame a je ha kpahen inyenana. Aye e yono i Baibol na nẹ urhomẹmro owu riẹ ọreva. Aye e rha mẹrẹn ekete uvuẹn i Baibol rẹ aye ivwe rhe otọriẹ, nẹ aye a guọlọ ekete ọrọrọ uvuẹn i Baibol na e dje yi fiotọre. Ọke rẹ aye i rhe vwo ekwerhọ ro serhọ rhẹ ekete erọrọ uvuẹn i Baibol na ne, aye nẹ a ya ye rhotọre. Nyoma ọnana rhe, aye ne rharhumu mọ mẹrẹn urhomẹmro na kpahen odẹ Osolobrugwẹ rhẹ Uvie yi, egbemwu ọnẹyen harẹn ituakpọ rhẹ otọrakpọ na, erhirhiẹ ihworho ri hwuru, kugbe ifiẹrorhọ ọrẹ ẹrhọmọnuhwu na. Urhomẹmro enana rẹ aye yono mẹrẹn na, no ti rẹ aye nẹ esegburhomẹmro ọrhẹ irueru efian buebun.—John 8:31, 32.

Uvuẹn ẹgbukpe 1879 Emọ Uyono i Baibol na, ne mọ mẹrẹn vwrurhe taghene ọke rẹ aye ine dje urhomẹmro na phia uvuẹn otọrakpọ na ephian o te ne. Uvuẹn ẹgbukpe ọrana, nẹ aye tonrhọ rhẹ ọbe ọphophẹghẹ re se, The Watchtower Announcing Jehovah’s Kingdom e fomu phia, rẹ ame e ji fomẹ inyenana. Ọke ọnana, ame e ghwoghwo urhomẹmro i Baibol na uvuẹn ẹkwotọre 239 kugbe edjadjẹ ri te 700. Irherhe ọgbagba na o ji gbephe te omaran vẹrhẹ bri-i!

• Ọke i Kristi o hwu hin, me yẹ ọphiare harẹn urhomẹmro i Baibol na?

• Me yẹ ọ yẹ rẹ ame userhumu rharhumu mẹrẹn urhomẹmro i Baibol na?

Ẹgbukpe buebun, Iseri Jehova e ha i Baibol sansan ruiruo, fomu aye, jeghwai ghalẹ aye. Ọrẹn, ame ne mọ mẹrẹn ọdamẹ ene vwo erhianrhian ọkpokpọ, rẹ ọnọ dabu yẹ ihworho userhumu e yono ‘irherhe rọ gbare ọrẹ urhomẹmro,’ ọnana yẹ ọhọre Osolobrugwẹ harẹn ihworho ephian. (1 Timothy 2:3, 4) Omaran na uvuẹn ẹgbukpe 1950, ame ni tonrhọ etiobọnu ekete ezẹko erhianrhian ọkpokpọ i Baibol ame re se New World Translation. Baibol ọnana, a dabu fon-evwan rhian ye gbagba uvuẹn edjadjẹ rọ vrẹn 120.

A guọlọ i Baibol rẹ ọnọ phẹrẹ erhe. Edjadjẹ a wẹnẹ, erhianrhian buebun jeghwai vwo ẹmro ri nẹ otọre ne, nọ bẹn ene rhe otọre ẹmro na. Habaye, a mẹrẹn imanuscripti ahwanren re dabu gba jeghwai họhọ eyaya erẹ ukukaro, ọnana nọ lẹrhe riẹ phẹrẹ nẹ a dabu rhe otọre edjadjẹ Hebrew, Aramaic, ọrhẹ Greek rẹ a ha ya i Baibol na.

A guọlọ erhianrhian ro serhọ rhẹ ẹmro Osolobrugwẹ. Ukperẹ ene wene ẹmro Osolobrugwẹ, ofori taghene ihworho ra rhian i Baibol na i fon-evwan rhian ye lele oborẹ eyaya ukukaro na e havwọ. Jọrẹn uvuẹn i Baibol buebun, odẹ ọfuanfon na, Jehova, a mẹrien uvuẹn aye-e.

A guọlọ i Baibol ọnọ ha ujiri harẹn Ọrọvworie. (2 Samuel 23:2) Uvuẹn New World Translation na, wu na mẹrẹn odẹ i Jehova ekete rọ vi havwọ ro te ọgbọ 7,000 uvuẹn imanuscripti Baibol ahwanren, jerẹ oborẹ udje yi ọ havwọ obotọre na. (Psalm 83:18) Erhumu ro nẹ owian otọre emru ra dabu jomarhotọre guọlọ na rhe, yẹ i Baibol ọnana rẹ ọmerhen oma e se, nime ọ dabu dje iroro Osolobrugwẹ phia. Wu rhe vwo i New World Translation na uvuẹn edjadjẹ ọnọ yanghene we vwo-o, ame ha urhebro wẹn neneyo wu vwo uruemru re se i Baibol na kẹdẹkẹdẹ.—Joshua 1:8; Psalm 1:2, 3.

• Mesoriẹ ame a djẹ odjẹ taghene a guọlọ erhianrhian i Baibol ọkpokpọ?

• Ohworho rọ guọlọ yono kpahen ọhọre Osolobrugwẹ, me yẹ ọnọ ha ru uruemru kẹdẹkẹdẹ?