ଜୀବନ ନିମନ୍ତେ ଈଶ୍ୱରୀୟ ବୁଦ୍ଧି

ଯିହୋବା କʼଣ ପ୍ରକୃତରେ ଜଣେ ଦକ୍ଷ ଶାସକ ? ଏହି ପ୍ରଶ୍ନର ଉତ୍ତର ଦେବାର ଏକ ନିର୍ଦ୍ଧିଷ୍ଟ ଉପାୟ ହେଲା ଯେ ତାହାଙ୍କ ଉପଦେଶ ଉପରେ ବିବେଚନା କରିବା । ଏହା କʼଣ ଯଥାର୍ଥ ? ଯଦି ଆମେ ଏହା ଜୀବନରେ ଲାଗୁ କରିବା ତେବେ କି ଆମ ଜୀବନ ଉନ୍ନତ ଓ ଅର୍ଥପୂର୍ଣ୍ଣ ହେବ ? ବୁଦ୍ଧିମାନ ରାଜା ଶଲୋମନ ଶହ ଶହ ହିତୋପଦେଶ ଲେଖିଛନ୍ତି । ଏଗୁଡ଼ିକ ଜୀବନର ପ୍ରତି କ୍ଷେତ୍ରରେ ଉପଯୋଗୀ । ତେବେ ଆସନ୍ତୁ ଏଥିର କିଛି ଉଦାହରଣ ଦେଖିବା ।

ଈଶ୍ୱରଙ୍କ ଉପରେ ନିର୍ଭର କରିବା । ଯିହୋବାଙ୍କ ସହିତ ଉତ୍ତମ ସମ୍ପର୍କର ପ୍ରକୃତ ଉପାୟ ହେଉଛି ତାହାଙ୍କ ଉପରେ ନିର୍ଭର କରିବା । ଶଲୋମନ ଲେଖନ୍ତି, “ତୁମ୍ଭେ ସର୍ବାନ୍ତଃକରଣ ସହିତ ସଦାପ୍ରଭୁଙ୍କଠାରେ ବିଶ୍ୱାସ କର ଓ ନିଜ ସୁବିବେଚନାରେ ଆଉଜି ପଡ଼ ନାହିଁ । ଆପଣାର ସବୁ ଗତିରେ ତାହାଙ୍କୁ ସ୍ୱୀକାର କର; ତହିଁରେ ସେ ତୁମ୍ଭର ପଥସବୁ ସରଳ କରିବେ ।” (ହିତୋପଦେଶ ୩:୫, ୬) ନିର୍ଭରତା ସହ ଈଶ୍ୱରଙ୍କ ପଥରେ ଚାଲିବା ଓ ଆଜ୍ଞା ପାଳନ କରିବା ଦ୍ୱାରା ଜୀବନ ଅର୍ଥପୂର୍ଣ୍ଣ ହୋଇଥାଏ । ଏପରି କରିବା ଦ୍ୱାରା ଜଣେ ଈଶ୍ୱରଙ୍କ ହୃଦୟକୁ ଖୁସୀ କରାଇ ଥାଏ ଏବଂ ଏହା ଯିହୋବାଙ୍କୁ ନିଜ ବିପକ୍ଷ ଶୟତାନଙ୍କ ପ୍ରଶ୍ନର ଉତ୍ତର ଦେବାକୁ ସାହାଯ୍ୟ କରିଥାଏ ।—ହିତୋପଦେଶ ୨୭:୧୧.

ଅନ୍ୟମାନଙ୍କ ସହିତ ସଦ୍‌ବ୍ୟବହାର କରିବା । ପତି, ପତ୍ନୀ ଓ ସନ୍ତାନମାନଙ୍କ ପାଇଁ ଈଶ୍ୱରଙ୍କ ଉପଦେଶ ଆଜି ସବୁଠାରୁ ଅଧିକ ଜରୁରୀ ଅଟେ । “ତୁମ୍ଭେ ଆପଣା ଯୌବନକାଳର ଭାର୍ଯ୍ୟାଠାରେ ଆମୋଦ କର” ଏହା କହି ଈଶ୍ୱର ପ୍ରତ୍ୟେକ ସ୍ୱାମୀମାନଙ୍କୁ ନିଜ ସ୍ତ୍ରୀ ପ୍ରତି ବିଶ୍ୱସ୍ତ ରହିବାକୁ କହିଛନ୍ତି । (ହିତୋପଦେଶ ୫:୧୮-୨୦) ହିତୋପଦେଶ ପୁସ୍ତକରୁ ବିବାହିତ ସ୍ତ୍ରୀମାନେ ଏକ ଉତ୍ତମ ସ୍ତ୍ରୀ ବିଷୟରେ ଜାଣିପାରିବେ ଯେଉଁଠାରେ ବର୍ଣ୍ଣିତ ଅଛି ଯେ ଏକ ଗୁଣବତୀ ସ୍ତ୍ରୀ କିପରି ନିଜ ପରିବାରରେ ସ୍ୱାମୀ ଓ ପିଲାମାନଙ୍କର ଆଦର ପାଏ । (ହିତୋପଦେଶ, ଅଧ୍ୟାୟ ୩୧) ଏବଂ ଏହା ପିଲାମାନଙ୍କୁ ନିଜ ମାʼ ବାପାଙ୍କର ଆଜ୍ଞାକାରୀ ହେବା ପାଇଁ ଉପଦେଶ ଦିଏ । (ହିତୋପଦେଶ ୬:୨୦) ଏହି ପୁସ୍ତକରେ ଏହା ମଧ୍ୟ କୁହାଯାଇଛି ଯେ ଜୀବନରେ ବନ୍ଧୁତା ରହିବା ନିହାତି ଆବଶ୍ୟକ କାରଣ ଏକାକୀ ରହିବା, ଜୀବନକୁ ସ୍ୱାର୍ଥପର କରାଇ ଥାଏ । (ହିତୋପଦେଶ ୧୮:୧) ବନ୍ଧୁମାନେ ଆମ ଜୀବନରେ ସୁପ୍ରଭାବ ଓ କୁପ୍ରଭାବ ପକାଇଥାନ୍ତି, ତେଣୁ ଆମକୁ ବୁଦ୍ଧିମତା ସହିତ ବନ୍ଧୁ କରିବା ଦରକାର ।—ହିତୋପଦେଶ ୧୩:୨୦; ୧୭:୧୭.

ନିଜ ପ୍ରତି ସଚେତନ ରହିବା । ହିତୋପଦେଶ ପୁସ୍ତକରେ ଅମୂଲ୍ୟ ଉପଦେଶ ରହିଛି ଏଠାରେ କୁହାଯାଛି ଯେ ଅତ୍ୟାଧିକ ମଦ୍ୟପାନ ତ୍ୟାଗ କରିବା, ଜୀବନ ପ୍ରତି ଉତ୍ତମ ଦୃଷ୍ଟିକୋଣ ରଖିବା, ବଦ୍‌ଗୁଣଗୁଡ଼ିକୁ ଛାଡ଼ିବା ଏବଂ କଠିନ ପରିଶ୍ରମୀ ହେବା । (ହିତୋପଦେଶ ୬:୬; ୧୪:୩୦; ୨୦:୧) ଏଠାରେ ସତର୍କ କରାଯାଇଛି ଯେ ଈଶ୍ୱରଙ୍କ ଉପଦେଶକୁ ନିର୍ଭର ନ କରି ମନୁଷ୍ୟ ଉପରେ ନିର୍ଭର କରିବା ଜୀବନରେ ବିପଦ ଆଣିଥାଏ । (ହିତୋପଦେଶ ୧୪:୧୨) କୁପ୍ରଭାବଠାରୁ ନିଜକୁ ଅର୍ଥାତ ହୃଦୟର ରକ୍ଷା କରିବାକୁ ଏଠାରେ ଉତ୍ସାହିତ କରାଯାଇଛି, ଏହା ଆମକୁ ମନେ ପକାଏ “ତହିଁରୁ [ହୃଦୟ] ଜୀବନର ପ୍ରବାହ ଜନ୍ମଇ ।”—ହିତୋପଦେଶ ୪:୨୩.

ଆଜି ପୃଥିବୀ ବ୍ୟାପି ଲକ୍ଷ ଲକ୍ଷ ଲୋକ ଏହି ଉପଦେଶଗୁଡ଼ିକୁ ପାଳନ କରିବା ଦ୍ୱାରା ନିଜ ଜୀବନକୁ ଏକ ସୁଖମୟ ଜୀବନ କରି ପାରିଛନ୍ତି । ଫଳ ସ୍ୱରୂପେ, ଯିହୋବାଙ୍କୁ ନିଜ ଶାସକ ରୂପେ ଗ୍ରହଣ କରିବାକୁ ସେମାନଙ୍କ ପାଖରେ ଯଥେଷ୍ଟ କାରଣ ରହିଛି ।

—ଏହା ହିତୋପଦେଶ ପୁସ୍ତକ ଉପରେ ଆଧାରିତ ।