ଦରଦାମ୍ ବଢ଼ି ଚାଲିଛି
ଭାବିଚିନ୍ତି ପଇସା ଖର୍ଚ୍ଚ କରନ୍ତୁ
ଯେବେ ଦରଦାମ୍ ବଢ଼େ, ତେବେ ଆମେ ସମସ୍ତେ ଚିନ୍ତାରେ ପଡ଼ିଯାଉ । ଆମକୁ ବୁଝାପଡ଼େ ନାହିଁ ଯେ ଆମେ କʼଣ କରିବା । କିନ୍ତୁ ଏମିତି ସମୟରେ ବି ଆପଣ କିଛି ପଦକ୍ଷେପ ନେଇପାରିବେ ଏବଂ ନିଜ ପରିସ୍ଥିତିକୁ ସୁଧାରିପାରିବେ ।
ଏପରି କରିବା କାହିଁକି ଜରୁରୀ ?
ଯଦି ଆପଣ ଭାବିଚିନ୍ତି ଖର୍ଚ୍ଚ କରିବେ ନାହିଁ, ତେବେ ଆପଣଙ୍କର ଆର୍ଥିକ ସମସ୍ୟା ବଢ଼ିପାରେ ଆଉ ଆପଣଙ୍କର ଚିନ୍ତାଗୁଡ଼ିକ ବି ବଢ଼ିପାରେ । ଯଦିଓ ଆପଣଙ୍କ ପାଖରେ କମ୍ ପଇସା ଥିବ, ତଥାପି ତାʼର ସଠିକ୍ ବ୍ୟବହାର କରିବା ପାଇଁ ଆପଣ ବହୁତ କିଛି କରିପାରିବେ ।
ଆପଣ ଏହା କିପରି କରିପାରିବେ ?
ନିଜ ଆୟ ଅନୁସାରେ ଖର୍ଚ୍ଚ କରନ୍ତୁ । ଆପଣଙ୍କ ପାଖରେ ଯେତେ ପଇସା ଅଛି, ତାʼ ଅନୁସାରେ ଖର୍ଚ୍ଚ କଲେ ଆପଣଙ୍କର ଚିନ୍ତା କମ୍ ହେବ । ଏପରି କଲେ ଆପଣଙ୍କ ହାତରେ କିଛି ପଇସା ବି ବଞ୍ଚିଯିବ, ଯାହା ଆପଣ ଆଗକୁ ଯାଇ ଆବଶ୍ୟକ ସମୟରେ ଖର୍ଚ୍ଚ କରିପାରିବେ ।
ଯଦି ଆପଣ ଲେଖିକି ରଖିବେ ଯେ ଆପଣଙ୍କ ଆୟ କେତେ ଓ ଖର୍ଚ୍ଚ କେତେ, ତାହେଲେ ଆପଣ ନିଜ ଆୟଠାରୁ ଅଧିକ ଖର୍ଚ୍ଚ କରିବେ ନାହିଁ । ତାʼପରେ ଏହା ନିଶ୍ଚିତ କରନ୍ତୁ ଯେ ଆପଣ କେବଳ ସେହି ଜିନିଷଗୁଡ଼ିକ ପାଇଁ ଖର୍ଚ୍ଚ କରିବେ, ଯାହା ଆପଣଙ୍କୁ ପ୍ରକୃତରେ ଆବଶ୍ୟକ । ଯେବେ ଆପଣଙ୍କର ଆୟ ବଦଳେ କିମ୍ବା ଜିନିଷଗୁଡ଼ିକର ଦରଦାମ୍ ବଦଳେ, ତାହେଲେ ପୁଣିଥରେ ଦେଖନ୍ତୁ ଯେ କେଉଁ ଜିନିଷଗୁଡ଼ିକ ଉପରେ ଆପଣ କେତେ ଖର୍ଚ୍ଚ କରିବେ । ଆଉ ହଁ, ଯଦି ଆପଣ ବିବାହିତ ତାହେଲେ କୌଣସି ବି ନିଷ୍ପତ୍ତି ନେବା ପୂର୍ବରୁ ନିଜ ସାଥି ସହ କଥା ହୁଅନ୍ତୁ ।
ଏହା ଲାଗୁ କରି ଦେଖନ୍ତୁ: ଉଧାରରେ କିମ୍ବା EMI (ଇଏମଆଇ) ଜରିଆରେ ଜିନିଷଗୁଡ଼ିକ କିଣିବା ପରିବର୍ତ୍ତେ ଯଦି ସମ୍ଭବ, ସେହି ସମୟରେ ହିଁ ପଇସା ଦେଇ କିଣନ୍ତୁ । କିଛିଲୋକ ଏମିତି କଲା ପରେ ଦେଖିଲେ ଯେ ସେମାନେ ନିଜ ଆୟ ଅନୁସାରେ ଖର୍ଚ୍ଚ କରିପାରନ୍ତି, ଏପରିକି ଋଣରୁ ବି ବଞ୍ଚିଯାʼନ୍ତି । ଏହା ଛଡ଼ା, ସମୟ ବାହାର କରି ନିଜ ବ୍ୟାଙ୍କ ପାସବୁକ୍ କିମ୍ବା ଷ୍ଟେଟ୍ମେଣ୍ଟ୍ ଦେଖନ୍ତୁ । ଏଥିରୁ ଆପଣଙ୍କୁ ଜଣାପଡ଼ିବ ଯେ ଆପଣଙ୍କ ଖାତାରେ କେତେ ପଇସା ଆସିଲା, କେତେ ଗଲା ଏବଂ କେତେ ପଇସା ରହିଲା । ହୁଏତ ଏଥିରୁ ଆପଣଙ୍କର ଚିନ୍ତା କମ୍ ହେବ ।
ଖର୍ଚ୍ଚଗୁଡ଼ିକ କମ୍ କରିବା ହୁଏତ ଆପଣଙ୍କୁ କଠିନ ଲାଗିପାରେ । କିନ୍ତୁ ଯଦି ଆପଣ ଭାବିଚିନ୍ତି ଖର୍ଚ୍ଚ କରିବେ ଓ ଭଲ ହିସାବ ରଖିବେ, ତାହେଲେ ଆପଣଙ୍କୁ ବହୁତ ସାହାଯ୍ୟ ମିଳିପାରିବ । ଏପରିକି ପଇସାକୁ ନେଇ ଆପଣଙ୍କୁ ଅଧିକ ଚିନ୍ତା ହେବ ନାହିଁ ।
ନିଜ ଚାକିରିକୁ ସୁରକ୍ଷିତ ରଖନ୍ତୁ । ଏଥିପାଇଁ ଆପଣ ଅନେକ ପଦକ୍ଷେପ ନେଇପାରିବେ । ଯେପରି, କାମ ଜାଗାରେ ଠିକ୍ ସମୟରେ ପହଞ୍ଚନ୍ତୁ । କାମ ବିଷୟରେ ସଠିକ୍ ଦୃଷ୍ଟିକୋଣ ରଖନ୍ତୁ । କଠିନ ପରିଶ୍ରମ କରନ୍ତୁ । ଆଗକୁ ବଢ଼ି ଅନ୍ୟମାନଙ୍କୁ ସାହାଯ୍ୟ କରନ୍ତୁ । ସମସ୍ତଙ୍କର ସମ୍ମାନ କରନ୍ତୁ । କାମ ଜାଗାରେ ନିୟମ ମାନନ୍ତୁ ଏବଂ ନିଜ ଦକ୍ଷତା ବଢ଼ାଇବା ପାଇଁ ଚେଷ୍ଟା କରନ୍ତୁ ।
ଅଯଥା ପଇସା ଖର୍ଚ୍ଚ କରନ୍ତୁ ନାହିଁ । ନିଜକୁ ପଚାରନ୍ତୁ, ‘କʼଣ ମୁଁ ନିଜ ପଇସା ବେକାର ଜିନିଷଗୁଡ଼ିକ ଉପରେ କିମ୍ବା ଖରାପ ଅଭ୍ୟାସଗୁଡ଼ିକରେ ଖର୍ଚ୍ଚ କରୁଛି ?’ ଅନେକ ଲୋକ ନିଜେ ପରିଶ୍ରମ କରି କମାଇଥିବା ପଇସାକୁ ଡ୍ରଗସ୍, ଜୁଆ, ସିଗାରେଟ୍ କିମ୍ବା ମଦରେ ଉଡ଼ାଇ ଦିଅନ୍ତି । ଏହି ଖରାପ ଅଭ୍ୟାସଗୁଡ଼ିକ ଯୋଗୁଁ ତାଙ୍କ ସ୍ୱାସ୍ଥ୍ୟ ମଧ୍ୟ ଖରାପ ହୋଇଯାଏ ଏବଂ ସେମାନେ ନିଜ ଚାକିରି ମଧ୍ୟ ହରାଇ ବସନ୍ତି ।
ଜରୁରୀକାଳୀନ ପରିସ୍ଥିତି ପାଇଁ ପଇସା ସଞ୍ଚୟ କରି ରଖନ୍ତୁ । ଯଦି ହୋଇପାରେ କିଛି ପଇସା ସଞ୍ଚୟ କରି ରଖନ୍ତୁ, ଯାହାଦ୍ୱାରା ହଠାତ୍ କୌଣସି ବଡ଼ ଖର୍ଚ୍ଚ କିମ୍ବା ସମସ୍ୟା ଆସିଲେ ସେହି ପଇସା ଆପଣଙ୍କ କାମରେ ଆସିବ । ଯେପରି, ଆପଣ କିମ୍ବା ଆପଣଙ୍କ ପରିବାରରେ କେହି ଅସୁସ୍ଥ ହୋଇପାରନ୍ତି, ଆପଣଙ୍କର ଚାକିରି ଚାଲି ଯାଇପାରେ କିମ୍ବା ଆଉ କିଛି ଖରାପ ପରିସ୍ଥିତି ଆସିପାରେ । ଏପରି ସମୟରେ ଯଦି ଆପଣ କିଛି ପଇସା ସଞ୍ଚୟ କରି ରଖିଥିବେ, ତାହେଲେ ଆପଣଙ୍କୁ ଚିନ୍ତା ହେବ ନାହିଁ ।