ଯୀଶୁଙ୍କ ସୁଦୂର ପର୍ଯ୍ୟନ୍ତ ପ୍ରସାରିତ ଭବିଷ୍ୟତବାଣୀ

ଉପରେ ଜୀତପର୍ବତ ଓ ତଳେ ଯିରୁଶାଲମ ନଗର ଓ ତାʼର ମନ୍ଦିରର ଅପୂର୍ବ ସୌନ୍ଦର୍ଯ୍ୟମୟ ଦୃଶ୍ୟ । ଥରେ ଯୀଶୁଙ୍କୁ ଏକାକୀ ଦେଖି ତାହାଙ୍କ ଚାରି ଜଣ ଶିଷ୍ୟ ତାʼଙ୍କ ନିକଟକୁ ଆସି କିଛି ପ୍ରଶ୍ନ ପଚାରନ୍ତି । ଯୀଶୁ କହିଲେ ଯେ ଯିରୁଶାଲମ ମନ୍ଦିରର ଧ୍ୱଂସ ହେବ । ଏହାର ଠିକ୍‌ ପୂର୍ବେ ଯୀଶୁ ସେମାନଙ୍କୁ “ଯୁଗାନ୍ତ” ବିଷୟରେ କହିଥିଲେ । (ମାଥିଉ ୧୩:୪୦, ୪୯) ବର୍ତ୍ତମାନ ତାହାଙ୍କ ଶିଷ୍ୟମାନେ ପଚାରିଲେ: “ଆପଣଙ୍କ ଆଗମନ ଓ ଯୁଗାନ୍ତର ଲକ୍ଷଣ କଅଣ” ?—ମାଥିଉ ୨୪:୩.

ଏହାର ଉତ୍ତର ଦେଇ ଯୀଶୁ କହିଲେ ଯିରୁଶାଲମର ଧ୍ୱଂସ ପୂର୍ବେ କʼଣ ଘଟିବ । କିନ୍ତୁ ତାହାଙ୍କ କଥାଗୁଡ଼ିକ ସୁଦୂର ପର୍ଯ୍ୟନ୍ତ ଆଧାରିତ ଥିଲା । ପରେ ତାହାଙ୍କ ଭବିଷ୍ୟତବାଣୀ ସାରାବିଶ୍ୱରେ ବ୍ୟାପକଭାବେ ପୂର୍ଣ୍ଣ ହେବ । ଯୀଶୁ କେତେକ ଘଟଣା ଓ ଜଗତର ପରିସ୍ଥିତି ବିଷୟରେ ଭବିଷ୍ୟତବାଣୀ କହିଥିଲେ ଯାହା ଭବିଷ୍ୟତରେ ଏକ ଚିହ୍ନ ସାଦୃଶ୍ୟ ହେବ । ସେହି ଚିହ୍ନଟି ପୃଥିବୀବାସୀଙ୍କୁ ଜଣାଇବ ଯେ ସ୍ୱର୍ଗୀୟ ରାଜା ଭାବେ ଯୀଶୁଙ୍କ ଉପସ୍ଥିତି ଆରମ୍ଭ ହୋଇଛି । ଅନ୍ୟଥା କହିବାକୁ ଗଲେ ଏହି ଚିହ୍ନ ଦେଖାଏ, ଯିହୋବା ଈଶ୍ୱର ଯୀଶୁଙ୍କୁ ଦୀର୍ଘଦିନର ପ୍ରତିଜ୍ଞାତ ମସୀହଙ୍କ ରାଜ୍ୟର ରାଜାରୂପେ ନିଯୁକ୍ତି କରିଛନ୍ତି । ଏହି ଚିହ୍ନ ସେହି ରାଜ୍ୟ ବିଷୟରେ ଏହା ମଧ୍ୟ କହେ ଯେ ଏହା ପୃଥିବୀର ଦୁଷ୍ଟତା ଦୂର କରି ମନୁଷ୍ୟଜାତି ପାଇଁ ପ୍ରକୃତ ଶାନ୍ତି ସ୍ଥାପନ କରିବ । ଯୀଶୁଙ୍କ ଭବିଷ୍ୟତବାଣୀ ଗୁଡ଼ିକ ଦେଖାଏ ଯେ ବର୍ତ୍ତମାନର ଧର୍ମ, ରାଜନୀତି ଏବଂ ସାମାଜିକ ବ୍ୟବସ୍ଥାର ସମାପ୍ତି ହେବାକୁ ଯାଉଛି ଏବଂ ଏକ ନୂତନ ବିଧିବ୍ୟବସ୍ଥା ଆରମ୍ଭ ହେବାକୁ ଯାଉଛି ।

ସ୍ୱର୍ଗୀୟ ରାଜା ଭାବେ ନିଜର ଉପସ୍ଥିତି ସମୟରେ ପୃଥିବୀରେ କେଉଁ କେଉଁ ଘଟଣା ଘଟିବ ସେହି ବିଷୟରେ ଯୀଶୁ ବ୍ୟାଖ୍ୟା କରି କହିଲେ ଯେ ବିଶ୍ୱବ୍ୟାପି ଯୁଦ୍ଧ, ମରୁଡ଼ି, ବଡ଼ ବଡ଼ ଭୂମିକମ୍ପ ଏବଂ ମହାମାରୀ ହେବ । ଅଧାର୍ମିକତାର ବୃଦ୍ଧି ହେବ । ଯୀଶୁଙ୍କ ପ୍ରକୃତ ଶିଷ୍ୟମାନେ ଈଶ୍ୱରଙ୍କ ରାଜ୍ୟର ସୁସମାଚାର ସାରା ପୃଥିବୀରେ ପ୍ରଚାର କରିବେ । ଏହି ସମସ୍ତ କିଛିର ପରିଣାମ ହେବ “ମହାକ୍ଳେଶ” ଯାହା ଆଜି ପର୍ଯ୍ୟନ୍ତ କେବେ ଘଟି ନାହିଁ ।—ମାଥିଉ ୨୪:୨୧.

ଯୀଶୁଙ୍କ ଅନୁଗାମୀମାନେ କିପରି ଜାଣିବେ ଯେ ମହାକ୍ଳେଶ ପାଖେଇ ଆସୁଛି ? ଯୀଶୁ କହିଲେ, “ଡିମିରିବୃକ୍ଷରୁ ଦୃଷ୍ଟାନ୍ତ ଶିକ୍ଷା କର” । (ମାଥିଉ ୨୪:୩୨) ଡିମିରି ବୃକ୍ଷର କଅଁଳ ପତ୍ରଗୁଡ଼ିକରୁ ଗ୍ରୀଷ୍ମକାଳର ଉପସ୍ଥିତି ଜଣାପଡ଼େ । ଠିକ୍‌ ସେହିପରି ଯୀଶୁଙ୍କ କହିଥିବା ସମସ୍ତ କଥା ଏକାସମୟରେ ଘଟି ଏହା ଦେଖାଏ ଯେ ଯୁଗାନ୍ତର ସମୟ ଅତି ପାଖେଇ ଆସିଅଛି । ଏହି ମହାକ୍ଳେଶ କେବେ ଓ କେଉଁ ସମୟରେ ହେବ, ସେହି ବିଷୟରେ ପିତାଙ୍କ ବିନା ଆଉ କେହି ଜାଣନ୍ତି ନାହିଁ । ସେଥିପାଇଁ ଯୀଶୁ ନିଜ ଶିଷ୍ୟମାନଙ୍କୁ ପ୍ରୋତ୍ସାହନ କରି କହିଥିଲେ: “ଜାଗି ରୁହ; କାରଣ ସେସମୟ କେବେ ହେବ, ତାହା ତୁମ୍ଭେମାନେ ଜାଣ ନାହିଁ ।”—ମାର୍କ ୧୩:୩୩.

—ଏହା ମାଥିଉ ଅଧ୍ୟାୟ ୨୪ ଏବଂ ୨୫; ମାର୍କ ଅଧ୍ୟାୟ ୧୩; ଲୂକ ଅଧ୍ୟାୟ ୨୧ ଉପରେ ଆଧାରିତ ।