ଯୋଶୀୟ ଈଶ୍ୱରଙ୍କ ବ୍ୟବସ୍ଥାକୁ ବହୁତ ପ୍ରେମ କରୁଥିଲେ

ଯୋଶୀୟ ଆଠ ବର୍ଷର ଥିବା ବେଳେ ଯିହୁଦାର ରାଜା ହେଲେ । ସେସମୟରେ ସେଠାର ଲୋକମାନେ ଯାଦୁବିଦ୍ୟା ଓ ମୂର୍ତ୍ତିପୂଜା କରୁଥିଲେ । ଯୋଶୀୟ ୧୬ ବର୍ଷର ହେବା ପରେ ସଠିକ୍‌ ଉପାୟରେ ଯିହୋବାଙ୍କ ଉପାସନା କରିବା ଶିଖିଲେ । ଆଉ ୨୦ ବର୍ଷ ବୟସରେ ସେ ସମ୍ପୂର୍ଣ୍ଣ ଦେଶରୁ ମୂର୍ତ୍ତି ଓ ବେଦିଗୁଡ଼ିକୁ ନଷ୍ଟ କରିଦେଲେ । ଆଉ ୨୬ ବର୍ଷ ବୟସରେ ସେ ଯିହୋବାଙ୍କ ମନ୍ଦିରର ମରାମତି କରିବା ପାଇଁ ବ୍ୟବସ୍ଥା କରାଇଲେ ।

ମନ୍ଦିରରେ ମହାଯାଜକ ହିଲ୍‌କୀୟଙ୍କୁ ଯିହୋବାଙ୍କ ବ୍ୟବସ୍ଥାର ଚର୍ମପତ୍ର ମିଳିଲା । ହୁଏତ ଏହା ସେହି ଚର୍ମପତ୍ର ଥିଲା ଯାହା ମୋଶା ନିଜ ହାତରେ ଲେଖିଥିଲେ । ରାଜାଙ୍କ ଜଣେ ସେବକ ଶାଫନ୍‌, ଯୋଶୀୟଙ୍କ ପାଖକୁ ସେହି ଚର୍ମପତ୍ର ନେଇକି ଗଲେ ଏବଂ ତାହା ତାଙ୍କୁ ପଢ଼ିକି ଶୁଣାଇଲେ । ରାଜା ଯୋଶୀୟ ବୁଝିଗଲେ ଯେ ଲୋକମାନେ ଅନେକ ବର୍ଷରୁ ଯିହୋବାଙ୍କ ଆଜ୍ଞା ମାନୁ ନାହାନ୍ତି । ସେ ହିଲ୍‌କୀୟଙ୍କୁ କହିଲେ, ‘ଯିହୋବା ଆମ ଉପରେ ବହୁତ କ୍ରୋଧିତ ଅଛନ୍ତି । ଯାଅ ଓ ତାଙ୍କ ସହ କଥା ହୁଅ, ସେ କହିବେ ଯେ ଆମେ କʼଣ କରିବା ଉଚିତ୍‌ ।’ ଯିହୋବା ଭବିଷ୍ୟଦ୍‌ବକ୍ତ୍ରୀ ହୁଲ୍‌ଦାଙ୍କ ଜରିଆରେ କହିଲେ, ‘ଯିହୁଦାର ଲୋକମାନେ ମୋତେ ଛାଡ଼ି ଦେଇଛନ୍ତି । ତେଣୁ ସେମାନଙ୍କୁ ଦଣ୍ଡ ମିଳିବ । କିନ୍ତୁ ଯେବେ ଯାଏ ଯୋଶୀୟ ରାଜା ଅଛନ୍ତି ତେବେ ଯାଏ ଏପରି ହେବ ନାହିଁ, କାରଣ ସେ ନିଜକୁ ନମ୍ର କରିଛନ୍ତି ।’

ରାଜା ଯୋଶୀୟ ଏହି ସନ୍ଦେଶ ଶୁଣିବା ପରେ ମନ୍ଦିରକୁ ଗଲେ ଓ ଯିହୁଦାର ଲୋକମାନଙ୍କୁ ଏକାଠି କଲେ । ତାʼପରେ ସେ ସମସ୍ତଙ୍କୁ ଯିହୋବାଙ୍କ ବ୍ୟବସ୍ଥା ପଢ଼ିକି ଶୁଣାଇଲେ । ଯୋଶୀୟ ଓ ଲୋକମାନେ ପ୍ରତିଜ୍ଞା କଲେ ଯେ ସେମାନେ ହୃଦୟର ସହ ଯିହୋବାଙ୍କ ଆଜ୍ଞା ମାନିବେ ।

ଯିହୁଦାର ଲୋକମାନେ ଅନେକ ବର୍ଷରୁ ନିସ୍ତାର ପର୍ବ ପାଳନ କରି ନ ଥିଲେ । କିନ୍ତୁ ଯେବେ ଯୋଶୀୟ ବ୍ୟବସ୍ଥା ପଢ଼ିଲେ ତେବେ ସେ ଜାଣିପାରିଲେ ଯେ ସେମାନଙ୍କୁ ପ୍ରତିବର୍ଷ ନିସ୍ତାର ପର୍ବ ପାଳନ କରିବା ଉଚିତ୍‌ । ତେଣୁ ସେ ଲୋକମାନଙ୍କୁ କହିଲେ, ‘ଆମେ ଯିହୋବାଙ୍କ ପାଇଁ ନିସ୍ତାର ପର୍ବ ପାଳନ କରିବା ।’ ଯୋଶୀୟ ଅନେକ ବଳିଦାନ ଚଢ଼ାଇବା ପାଇଁ ଏବଂ ମନ୍ଦିରରେ ଗାୟକମାନଙ୍କ ଦଳ ଗୀତ ଗାଇବା ପାଇଁ ବ୍ୟବସ୍ଥା କଲେ । ତାʼପରେ ସାରା ଦେଶର ଲୋକମାନେ ନିସ୍ତାର ପର୍ବ ପାଳନ କଲେ ଏବଂ ପରେ ‘ତାଡ଼ିଶୂନ୍ୟ ରୋଟୀର ପର୍ବ’ ପାଳନ କଲେ ଯାହା ସାତ ଦିନ ଯାଏ ହେଉଥିଲା । ଏପରି ନିସ୍ତାର ପର୍ବର ପାଳନ ଶାମୁୟେଲଙ୍କ ପରଠାରୁ କେବେ ହୋଇ ନ ଥିଲା । ଯୋଶୀୟ ଈଶ୍ୱରଙ୍କ ବ୍ୟବସ୍ଥାକୁ ବହୁତ ପ୍ରେମ କରୁଥିଲେ । କʼଣ ଆପଣଙ୍କୁ ବି ଯିହୋବାଙ୍କ ବିଷୟରେ ଶିଖିବା ଭଲ ଲାଗେ ?