ପାଠ ୧୦
ଆମ ସଭାଗୁଡ଼ିକରେ ଆସିଲେ ଆପଣଙ୍କୁ କʼଣ ଲାଭ ହେବ ?
କʼଣ ଆପଣ କେବେ ଯିହୋବାଙ୍କ ସାକ୍ଷୀମାନଙ୍କ ସଭାକୁ ଯାଇଛନ୍ତି ? ହୁଏତ ଆପଣଙ୍କୁ ସେଠାକୁ ଯିବା ପାଇଁ ଟିକେ ଡର ଲାଗୁଥିବ । ଆପଣ ହୁଏତ ଭାବୁଥିବେ, ‘ସେମାନଙ୍କ ସଭାଗୁଡ଼ିକରେ କʼଣ ହୁଏ ? ମୁଁ ସେଠାକୁ କାହିଁକି ଯିବି ?’ ଆସନ୍ତୁ ଦେଖିବା ଯେ ସଭାଗୁଡ଼ିକରେ ଗଲେ ଯିହୋବାଙ୍କ ସହ ଆପଣଙ୍କ ସମ୍ପର୍କ କିପରି ମଜବୁତ୍ ହେବ ଏବଂ ଆପଣଙ୍କୁ ଆଉ କʼଣ ଲାଭ ହେବ ।
୧. ସଭାକୁ ଯିବାର ସବୁଠୁ ବଡ଼ କାରଣ କʼଣ ?
ଈଶ୍ୱରଙ୍କ ଜଣେ ସେବକ ଲେଖିଲେ, ‘ସମାଜ ବା ସଭା ମଧ୍ୟରେ ମୁଁ ଯିହୋବାଙ୍କର ପ୍ରଶଂସା କରିବି ।’ (ଗୀତସଂହିତା ୨୨:୨୨) ଏଥିରୁ ଜଣାପଡ଼େ ଯେ ସଭାକୁ ଯିବାର ସବୁଠୁ ବଡ଼ କାରଣ ହେଉଛି, ଯିହୋବାଙ୍କ ପ୍ରଶଂସା କରିବା ଅର୍ଥାତ୍ ତାଙ୍କ ଉପାସନା କରିବା । ତେଣୁ ସାରା ଦୁନିଆରେ ଯିହୋବାଙ୍କ ସାକ୍ଷୀମାନେ ପ୍ରତି ସପ୍ତାହ ଖୁସି ଖୁସି ସଭାକୁ ଯାଆନ୍ତି । ପ୍ରତିବର୍ଷ ସେମାନଙ୍କର କିଛି ବଡ଼ ବଡ଼ ସଭା ମଧ୍ୟ ହୁଏ । ସେମାନେ ସଭାରେ ଯିହୋବାଙ୍କ ମହିମା କରନ୍ତି, ଗୀତ ଗାʼନ୍ତି ଏବଂ ପ୍ରାର୍ଥନା କରନ୍ତି ।
୨. ଆପଣ ଆମ ସଭାଗୁଡ଼ିକରେ କʼଣ ଶିଖିବେ ?
ସଭାଗୁଡ଼ିକରେ ବାଇବଲରୁ ଶିଖାଯାଏ । ସେଠାରେ ଆମକୁ ବାଇବଲର କଥାଗୁଡ଼ିକୁ ଭଲ ଭାବେ ବୁଝାଇ ଦିଆଯାଏ । (ନିହିମୀୟା ୮:୮ ପଢ଼ନ୍ତୁ ।) ସଭାରେ ଆପଣ ଯିହୋବା ଓ ତାଙ୍କ ଗୁଣଗୁଡ଼ିକ ବିଷୟରେ ଅନେକ କଥା ଶିଖିପାରିବେ । ଆପଣ ଜାଣିପାରିବେ ଯେ ଯିହୋବା ଆପଣଙ୍କୁ କେତେ ପ୍ରେମ କରନ୍ତି, ଯାହାଫଳରେ ତାଙ୍କ ସହ ଆପଣଙ୍କ ସମ୍ପର୍କ ଆହୁରି ମଜବୁତ୍ ହେବ । କେବଳ ଏତିକି ନୁହେଁ, ସଭାକୁ ଗଲେ ଆପଣ ଯିହୋବାଙ୍କଠାରୁ ଶିଖିବେ ଯେ ଖୁସିରେ ରହିବା ପାଇଁ ଆପଣଙ୍କୁ କʼଣ କରିବାକୁ ପଡ଼ିବ ।—ଯିଶାଇୟ ୪୮:୧୭, ୧୮.
୩. ସଭାକୁ ଆସିଥିବା ଲୋକମାନଙ୍କ ସହ କଥାବାର୍ତ୍ତା ହେଲେ ଆପଣଙ୍କୁ କʼଣ ଲାଭ ହେବ ?
ଯିହୋବା ଆମକୁ ଆଜ୍ଞା ଦେଇଛନ୍ତି ଯେ ‘ଆମେ ପରସ୍ପର ବିଷୟରେ ଚିନ୍ତା କରିବା ଏବଂ ପରସ୍ପରକୁ ଭଲ ପାଇବା ଓ ଭଲ କାମ କରିବା ପାଇଁ ଉତ୍ସାହିତ କରିବା ଉଚିତ୍ ଏବଂ ଏକାଠି ମିଳିତ ହେବା ବନ୍ଦ କରିବା ଉଚିତ୍ ନୁହେଁ ।’ (ଏବ୍ରୀ ୧୦:୨୪, ୨୫, ଇଜି-ଟୁ-ରିଡ୍ ଭର୍ସନ) ସଭାରେ ଆପଣ ଏପରି ଲୋକମାନଙ୍କ ସହ ଦେଖା ହେବେ, ଯେଉଁମାନେ ପରସ୍ପରକୁ ପ୍ରକୃତ ପ୍ରେମ କରନ୍ତି ଏବଂ ଆପଣଙ୍କ ଭଳି ଈଶ୍ୱରଙ୍କ ବିଷୟରେ ଆହୁରି ଅଧିକ ଶିଖିବାକୁ ଚାହାନ୍ତି । ସେମାନଙ୍କ କଥାରୁ ଆପଣଙ୍କ ସାହସ ବଢ଼ିବ ଏବଂ ବାଇବଲ ଉପରେ ଆପଣଙ୍କ ବିଶ୍ୱାସ ବଢ଼ିବ । (ରୋମୀୟ ୧:୧୧, ୧୨ ପଢ଼ନ୍ତୁ ।) ସେଠାରେ ଆପଣ ଏପରି ଲୋକମାନଙ୍କ ସହ ମଧ୍ୟ ଦେଖା ହୋଇପାରିବେ, ଯେଉଁମାନେ ଆପଣଙ୍କ ଭଳି ସମସ୍ୟାର ସାମନା କରିଥିଲେ । ସେମାନଙ୍କଠାରୁ ଆପଣ ଜାଣିପାରିବେ ଯେ ସମସ୍ୟା ସତ୍ତ୍ୱେ ଆପଣ ଖୁସିରେ କିପରି ରହିପାରିବେ । ସଭାକୁ ଗଲେ ଆପଣଙ୍କୁ ଆହୁରି ଅନେକ ଲାଭ ମିଳିବ । ତେଣୁ ଯିହୋବା ଆମକୁ ସଭାଗୁଡ଼ିକରେ ଯିବା ପାଇଁ କହନ୍ତି ।
ଭାବନ୍ତୁ ଓ ଶିଖନ୍ତୁ
ଜାଣନ୍ତୁ ଯେ ଯିହୋବାଙ୍କ ସାକ୍ଷୀମାନଙ୍କର ସଭାଗୁଡ଼ିକରେ କʼଣ ହୁଏ ଏବଂ ଆମେ ସେଠାକୁ ଯିବା ପାଇଁ କାହିଁକି ଚେଷ୍ଟା କରିବା ଉଚିତ୍ ।
୪. ଯିହୋବାଙ୍କ ସାକ୍ଷୀମାନଙ୍କର ସଭା
ପ୍ରଥମ ଶତାବ୍ଦୀର ଖ୍ରୀଷ୍ଟିୟାନମାନେ ନିୟମିତ ଭାବେ ଏକାଠି ହୋଇ ଯିହୋବାଙ୍କ ଉପାସନା କରୁଥିଲେ । (ରୋମୀୟ ୧୬:୩-୫) କଲସୀୟ ୩:୧୬ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନ ଉପରେ ଆଲୋଚନା କରନ୍ତୁ:
ସେସମୟର ଖ୍ରୀଷ୍ଟିୟାନମାନେ ଉପାସନା ପାଇଁ ଏକାଠି ହୋଇ କʼଣ କʼଣ କରୁଥିଲେ ?
ଆଜି ଯିହୋବାଙ୍କ ସାକ୍ଷୀମାନେ ମଧ୍ୟ ପ୍ରତି ସପ୍ତାହ ଉପାସନା କରିବା ପାଇଁ ଗୋଟିଏ ଜାଗାରେ ଏକାଠି ହୁଅନ୍ତି । ତାହାକୁ ରାଜ୍ୟଘର କୁହାଯାଏ । ସେମାନଙ୍କ ସଭାଗୁଡ଼ିକ କିପରି ହୁଏ, ତାହା ଜାଣିବା ପାଇଁ ଭିଡିଓ ଦେଖନ୍ତୁ । ତାʼପରେ ସଭାର ଚିତ୍ର ଦେଖନ୍ତୁ ଏବଂ ଆଗକୁ ଦିଆଯାଇଥିବା ପ୍ରଶ୍ନଗୁଡ଼ିକ ଉପରେ ଆଲୋଚନା କରନ୍ତୁ ।
କଲସୀୟ ୩:୧୬ ପଦରେ ଯାହା କୁହାଯାଇଛି ଏବଂ ଆଜି ଆମ ରାଜ୍ୟଘରେ ଯାହା ଯାହା ହୁଏ, ସେମଧ୍ୟରେ କେଉଁ କେଉଁ କଥା ସମାନ ?
ଆପଣଙ୍କୁ ଭିଡିଓ ଓ ଚିତ୍ରରେ ଆଉ କʼଣ ଭଲ ଲାଗିଲା ?
୨ କରିନ୍ଥୀୟ ୯:୭ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନ ଉପରେ ଆଲୋଚନା କରନ୍ତୁ:
ଯିହୋବାଙ୍କ ସାକ୍ଷୀମାନଙ୍କର ସଭାଗୁଡ଼ିକରେ କାହିଁକି କାହାରିଠାରୁ ପଇସା ମଗାଯାଏ ନାହିଁ ?
ଆପଣଙ୍କୁ ଯିଏ ବାଇବଲ ଶିଖାଇବାକୁ ଆସନ୍ତି, ତାଙ୍କ ସହ ଦେଖନ୍ତୁ ଯେ ଏ ସପ୍ତାହରେ ଥିବା କୌଣସି ଏକ ସଭାରେ ଆମକୁ କʼଣ କʼଣ ଶିଖିବାକୁ ମିଳିବ ।
ଆପଣ କʼଣ ଭାବନ୍ତି ସଭାର କେଉଁ ଭାଗ ଆପଣଙ୍କୁ ଭଲ ଲାଗିବ ?
କʼଣ ଆପଣ ଜାଣନ୍ତି ?
jw.org ୱେବସାଇଟ୍ରେ ଆପଣ ଦେଖିପାରିବେ ଯେ ସାରା ଦୁନିଆରେ ଆମ ସଭାଗୁଡ଼ିକ କେଉଁଠାରେ ଓ କେଉଁ ସମୟରେ ହୁଏ ।
୧. ଆମ ସଭାଗୁଡ଼ିକୁ ଗୀତ ଓ ପ୍ରାର୍ଥନା ଦ୍ୱାରା ଆରମ୍ଭ ଓ ଶେଷ କରାଯାଏ । ସେଠାରେ ଆମେ ଭାଷଣ ଶୁଣୁ ଓ ଭିଡିଓ ଦେଖୁ । ଆମେ ଅନ୍ୟମାନଙ୍କୁ କିପରି ପ୍ରଚାର କରିବା ଏବଂ ବାଇବଲ ଶିଖାଇବା, ତାʼପାଇଁ ମଧ୍ୟ ଆମକୁ ଟ୍ରେନିଙ୍ଗ ଦିଆଯାଏ
୨. କିଛି ଭାଗରେ ପ୍ରଶ୍ନ ପଚରାଯାଏ । ସେଥିରେ କେହି ବି ଉତ୍ତର ଦେଇପାରିବେ
୩. ଆମ ସଭାକୁ ସମସ୍ତେ ଆସିପାରିବେ । ସ୍ତ୍ରୀ-ପୁରୁଷ, ଯୁବକଯୁବତୀ, ବୃଦ୍ଧବୃଦ୍ଧା ଏବଂ ଛୋଟ ପିଲା ସମସ୍ତେ ଆସିପାରିବେ
୪. ଆମ ସଭାଗୁଡ଼ିକରେ ଆସିବା ପାଇଁ କାହାରିଠାରୁ ଟଙ୍କାପଇସା ନିଆଯାଏ ନାହିଁ । ଆମେ ସମସ୍ତଙ୍କୁ ବିନା ପଇସାରେ ଶିଖାଉ
୫. ସଭାକୁ ଯିବା ପାଇଁ ଆମକୁ ପରିଶ୍ରମ କରିବାକୁ ପଡ଼ିବ
ଯୀଶୁଙ୍କ ପରିବାର ପ୍ରତି ଟିକେ ଧ୍ୟାନ ଦିଅନ୍ତୁ । ସେମାନେ ପ୍ରତି ବର୍ଷ ଗୋଟିଏ ପର୍ବ ପାଳନ କରିବା ପାଇଁ ନାଜରିତରୁ ଯିରୂଶାଲମକୁ ଯାଉଥିଲେ । ସେଠାକୁ ଯିବା ପାଇଁ ସେମାନଙ୍କୁ ପାଖାପାଖି ତିନି ଦିନ ଲାଗୁଥିଲା । କାରଣ ଯିରୂଶାଲମ ନାଜରିତରୁ ପ୍ରାୟ ୧୦୦ କି.ମି. ଦୂରରେ ଥିଲା ଓ ସେମାନଙ୍କୁ ପାହାଡ଼ିଆ ଅଞ୍ଚଳ ଦେଇ ଚାଲି ଚାଲି ଯିବାକୁ ପଡ଼ୁଥିଲା । ଲୂକ ୨:୩୯-୪୨ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନଗୁଡ଼ିକ ଉପରେ ଆଲୋଚନା କରନ୍ତୁ:
ଯିରୂଶାଲମ ଯିବା କʼଣ ସେମାନଙ୍କ ପାଇଁ ସହଜ ଥିଲା ?
ଆପଣଙ୍କୁ ସଭାଗୁଡ଼ିକରେ ଯିବା ପାଇଁ କାହିଁକି କଷ୍ଟକର ଲାଗିପାରେ ?
ତଥାପି ଯଦି ଆପଣ ସେଠାକୁ ଯିବା ପାଇଁ ପରିଶ୍ରମ କରିବେ, ତାହେଲେ ଆପଣଙ୍କୁ କʼଣ ଲାଭ ହେବ ?
ବାଇବଲରେ କୁହାଯାଇଛି ଯେ ଆମେ ଯିହୋବାଙ୍କ ଉପାସନା ପାଇଁ ଏକାଠି ହେବା ଉଚିତ୍ । ଏବ୍ରୀ ୧୦:୨୪, ୨୫ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନ ଉପରେ ଆଲୋଚନା କରନ୍ତୁ:
ଆମେ ପ୍ରତ୍ୟେକ ସଭାକୁ କାହିଁକି ଯିବା ଉଚିତ୍ ?
କିଛି ଲୋକ କହନ୍ତି: “ବାଇବଲ ତ ଆମେ ଘରେ ବି ପଢ଼ିପାରିବା, କୌଣସି ସଭାକୁ ଯିବା କʼଣ ଦରକାର ।”
ବାଇବଲର କେଉଁ ପଦ କିମ୍ବା କେଉଁ ଉଦାହରଣରୁ ଜଣାପଡ଼େ ଯେ ଯିହୋବା କʼଣ ଚାହାନ୍ତି ?
ଆମେ କʼଣ ଶିଖିଲୁ ?
ସଭାଗୁଡ଼ିକରେ ଗଲେ ଆପଣ ଯିହୋବାଙ୍କୁ ଆହୁରି ଭଲ ଭାବେ ଜାଣିପାରିବେ, ତାଙ୍କ ସହ ଆପଣଙ୍କ ସମ୍ପର୍କ ଆହୁରି ମଜବୁତ୍ ହୋଇଯିବ ଏବଂ ଆପଣ ଅନ୍ୟମାନଙ୍କ ସହ ମିଶି ତାଙ୍କ ଉପାସନା କରିପାରିବେ ।
ଆପଣ କʼଣ କହିବେ ?
ଯିହୋବା ଆମକୁ ସଭାକୁ ଯିବା ପାଇଁ କାହିଁକି କହନ୍ତି ?
ଯିହୋବାଙ୍କ ସାକ୍ଷୀମାନଙ୍କର ସଭାଗୁଡ଼ିକରେ ଆପଣ କʼଣ ଶିଖିବେ ?
ସଭାଗୁଡ଼ିକରେ ଗଲେ ଆପଣଙ୍କୁ ଆଉ କʼଣ କʼଣ ଲାଭ ହେବ ?
ଅଧିକ ଜାଣନ୍ତୁ
କʼଣ ଆପଣ ସଭାକୁ ଯିବା ପାଇଁ ଡରୁଛନ୍ତି ? ଜଣେ ବ୍ୟକ୍ତିଙ୍କୁ ବି ଏପରି ଲାଗୁଥିଲା । କିନ୍ତୁ ତାଙ୍କୁ ଏବେ ସଭାକୁ ଯିବା କାହିଁକି ଭଲ ଲାଗେ, ତାହା ଜାଣିବା ପାଇଁ ଏହି ଭିଡିଓ ଦେଖନ୍ତୁ ।
ଏହି ଭିଡିଓରେ ଦେଖନ୍ତୁ ଯେ ଜଣେ ଯୁବକଙ୍କୁ ସଭାଗୁଡ଼ିକ କାହିଁକି ଭଲ ଲାଗିଲା ଏବଂ ସେ ସେଠାକୁ ଯିବା ପାଇଁ କʼଣ କଲେ ।
ଜାଣନ୍ତୁ ଯେ କିଛି ଲୋକଙ୍କୁ ସଭାଗୁଡ଼ିକରେ ଯିବା କିପରି ଲାଗେ ।
“ମୁଁ ସଭା ପାଇଁ ରାଜ୍ୟଘର କାହିଁକି ଯିବି ?” (jw.org ୱେବସାଇଟ୍ରେ ଥିବା ଲେଖା)
ଜାଣନ୍ତୁ ଯେ ଯିହୋବାଙ୍କ ସାକ୍ଷୀମାନଙ୍କର ଗୋଟିଏ ସଭାରେ ଗଲା ପରେ ଜଣେ ବଦମାସ ଗୁଣ୍ଡାର ଜୀବନ କିପରି ବଦଳିଗଲା ।
“ମୁଁ କେବେ ବି ନିଜ ବନ୍ଧୁକ ନ ନେଇ କୁଆଡ଼େ ବି ଯାଉ ନ ଥିଲି” (ପ୍ରହରୀଦୁର୍ଗ-ହି, ୧ ଅକ୍ଟୋବର, ୨୦୧୪)