ପାଠ ୫୧
ଏପରି କଥାବାର୍ତ୍ତା କରନ୍ତୁ, ଯାହା ଯିହୋବା ପସନ୍ଦ କରନ୍ତି
ଯେତେବେଳେ ଯିହୋବା ଆମକୁ ସୃଷ୍ଟି କଲେ, ସେତେବେଳେ ସେ ଆମକୁ ଗୋଟିଏ ବଢ଼ିଆ ଉପହାର ଦେଲେ । ତାହା ହେଉଛି, କଥା ହେବାର ଦକ୍ଷତା । କʼଣ ଯିହୋବାଙ୍କୁ ଏଥିରୁ କିଛି ଫରକ ପଡ଼େ ଯେ ଆମେ ଏହାର କିପରି ବ୍ୟବହାର କରୁ ? ହଁ, ପଡ଼େ । (ଯାକୁବ ୧:୨୬ ପଢ଼ନ୍ତୁ ।) ତାହେଲେ ଆମେ କʼଣ କରିପାରିବା, ଯାହାଫଳରେ ଆମ କଥାବାର୍ତ୍ତାରୁ ଏବଂ ଆମେ ଯେଉଁଭଳି ଭାବରେ କଥା ହେଉ, ସେଥିରୁ ଯିହୋବା ଖୁସି ହେବେ ?
୧. ଆମେ ନିଜ କଥା ହେବାର ଦକ୍ଷତାକୁ କିପରି ଭଲ ବ୍ୟବହାର କରିପାରିବା ?
ବାଇବଲରେ ଆମକୁ କୁହାଯାଇଛି, “ପରସ୍ପରର ସାହସ ବଢ଼ାଉଥାଅ ଓ ପରସ୍ପରକୁ ମଜବୁତ୍ କରୁଥାଅ ।” (୧ ଥେସଲନୀକୀୟ ୫:୧୧, NWT) କʼଣ ଏପରି କେହି ବ୍ୟକ୍ତି ଅଛନ୍ତି, ଯାହାଙ୍କର ଆପଣ ସାହସ ବଢ଼ାଇପାରିବେ ? ଆପଣ ତାଙ୍କର ସାହସ କିପରି ବଢ଼ାଇପାରିବେ ? ଆପଣ ତାଙ୍କୁ ଭରସା ଦେଇପାରିବେ ଯେ ଆପଣ ତାଙ୍କ ପାଇଁ ଚିନ୍ତା କରନ୍ତି । ଆପଣ ତାଙ୍କୁ ଏହା ବି କହିପାରିବେ ଯେ ଆପଣଙ୍କୁ ତାଙ୍କର କେଉଁ କଥା ବହୁତ ଭଲ ଲାଗେ । ବାଇବଲରେ ସାହସ ବଢ଼ାଉଥିବା ଅନେକ ପଦ ଦିଆଯାଇଛି । ଆପଣ ସେମଧ୍ୟରୁ କିଛି ପଦ ଦେଖାଇ ତାଙ୍କର ସାହସ ବଢ଼ାଇପାରିବେ । ଆଉ ଗୋଟିଏ କଥା ମନେ ରଖନ୍ତୁ: ଆପଣ ଯାହା କହନ୍ତି ତାହା ଯେତିକି ମହତ୍ତ୍ୱ ରଖେ, ସେତିକି ମହତ୍ତ୍ୱ ଆପଣ ଯେପରି କହନ୍ତି, ତାହା ବି ରଖେ । ତେଣୁ ସବୁବେଳେ ଅନ୍ୟମାନଙ୍କ ସହ ପ୍ରେମ ଓ କୋମଳତାର ସହିତ କଥା ହୁଅନ୍ତୁ ।—ହିତୋପଦେଶ ୧୫:୧.
୨. ଆମେ କେଉଁଭଳି କଥା ହେବା ଉଚିତ୍ ନୁହେଁ ?
ବାଇବଲରେ ଲେଖାଅଛି, “ତୁମ୍ଭମାନଙ୍କ ମୁଖରୁ କୌଣସି କୁବାକ୍ୟ ନିର୍ଗତ ନ ହେଉ ।” (ଏଫିସୀୟ ୪:୨୯ ପଢ଼ନ୍ତୁ ।) ଏହାର ଅର୍ଥ, ଆମେ ଖରାପ କଥା କହିବା ନାହିଁ ଓ ଗାଳିଗୁଲଜ କରିବା ନାହିଁ । ଏପରିକି ଆମେ ଅନ୍ୟକୁ କଷ୍ଟ ପହଞ୍ଚାଇଲା ଭଳି କିମ୍ବା ନୀଚ ଦେଖାଇଲା ଭଳି କଥା ମଧ୍ୟ କହିବା ନାହିଁ । ତାʼଛଡ଼ା, ଆମେ କଥା ହେଉ ହେଉ କାହାରି ନିନ୍ଦା କରିବା ନାହିଁ ଏବଂ ଜାଣିଶୁଣି କାହାରିକୁ ବଦନାମ କରିବା ନାହିଁ ।—ହିତୋପଦେଶ ୧୬:୨୮ ପଢ଼ନ୍ତୁ ।
୩. ଆମେ କିପରି ନିଜ କଥାରୁ ଅନ୍ୟମାନଙ୍କର ସାହସ ବଢ଼ାଇପାରିବା ?
ସାଧାରଣତଃ ଆମ ମୁହଁରୁ ସେପରି କଥା ବାହାରେ ଯେପରି କଥା ଆମ ମନରେ ଭରିଥାଏ । (ଲୂକ ୬:୪୫) ତେଣୁ ଆମକୁ ଭଲ କଥାଗୁଡ଼ିକ ଉପରେ ଧ୍ୟାନ ଦେବା ଉଚିତ୍ । ଅର୍ଥାତ୍ ଏପରି କଥାଗୁଡ଼ିକ ଉପରେ ଧ୍ୟାନ ଦେବା ଉଚିତ୍ ଯାହା ଈଶ୍ୱରଙ୍କ ଦୃଷ୍ଟିରେ ଠିକ୍ ଥିବ, ଶୁଦ୍ଧ ଥିବ, ଶୁଣିବାକୁ ଭଲ ଓ ପ୍ରଶଂସାର ବିଷୟ ହୋଇଥିବ । (ଫିଲିପ୍ପୀୟ ୪:୮) ଭଲ କଥାଗୁଡ଼ିକ ଉପରେ ଧ୍ୟାନ ଦେବା ପାଇଁ ଆମକୁ ଭାବିଚିନ୍ତି ମନୋରଞ୍ଜନ କରିବା ଓ ସାଙ୍ଗ ବାଛିବା ଉଚିତ୍ । (ହିତୋପଦେଶ ୧୩:୨୦) ତାʼଛଡ଼ା, ଆମେ କିଛି କହିବା ପୂର୍ବରୁ ଭାବିବା ଉଚିତ୍ ଯେ କʼଣ କହିବା ଓ କିପରି କହିବା । କାରଣ ଆମେ ଯାହା କହୁ, ତାହା ଅନ୍ୟମାନଙ୍କ ଉପରେ ବହୁତ ପ୍ରଭାବ ପକାଏ । ବାଇବଲରେ ଲେଖାଅଛି, “କାହାର କାହାର ବାଚାଳତା [ବିନା ଭାବିଚିନ୍ତି କହିବା, NWT] ଖଡ଼୍ଗାଘାତ ପରି; ମାତ୍ର ଜ୍ଞାନୀର ଜିହ୍ୱା ସ୍ୱାସ୍ଥ୍ୟଜନକ ।”—ହିତୋପଦେଶ ୧୨:୧୮.
ଭାବନ୍ତୁ ଓ ଶିଖନ୍ତୁ
ଜାଣନ୍ତୁ ଯେ ଆମେ କʼଣ କରିପାରିବା, ଯାହାଫଳରେ ଆମ କଥାବାର୍ତ୍ତା ଏବଂ ଆମେ ଯେଉଁଭଳି ଭାବରେ କଥା ହେଉ, ତାହା ଯିହୋବାଙ୍କୁ ପସନ୍ଦ ଆସିବ ଓ ଅନ୍ୟମାନଙ୍କର ସାହସ ବଢ଼ିବ ।
୪. ଧ୍ୟାନ ରଖନ୍ତୁ ଯେ ଆପଣ କʼଣ କହୁଛନ୍ତି, କିପରି କହୁଛନ୍ତି ଓ କେତେବେଳେ କହୁଛନ୍ତି
ବେଳେ ବେଳେ ଆମେ କାହାରିକୁ ଏପରି କଥା କହି ଦେଉ, ଯାହା ଯୋଗୁଁ ଆମକୁ ପରେ ଖରାପ ଲାଗେ । (ଯାକୁବ ୩:୨) ଗାଲାତୀୟ ୫:୨୨, ୨୩ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନଗୁଡ଼ିକ ଉପରେ ଆଲୋଚନା କରନ୍ତୁ:
ଏହି ପଦରେ ଦିଆଯାଇଥିବା କେଉଁ ଗୁଣଗୁଡ଼ିକ ପାଇଁ ଆପଣ ପ୍ରାର୍ଥନା କରିବା ପାଇଁ ଚାହିଁବେ, ଯାହାଫଳରେ ଆପଣ ନିଜ କଥାବାର୍ତ୍ତା ଉପରେ ଧ୍ୟାନ ଦେଇପାରିବେ ? ଏହି ଗୁଣଗୁଡ଼ିକ ଆପଣଙ୍କୁ କିପରି ସାହାଯ୍ୟ କରିପାରିବ ?
୧ କରିନ୍ଥୀୟ ୧୫:୩୩ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନ ଉପରେ ଆଲୋଚନା କରନ୍ତୁ:
ମନୋରଞ୍ଜନ ଓ ସାଙ୍ଗସାଥୀମାନଙ୍କର ଆପଣଙ୍କ କଥାବାର୍ତ୍ତା ଉପରେ କିପରି ପ୍ରଭାବ ପଡ଼ିପାରେ ?
ଆପଣ ଯେପରି କଥାବାର୍ତ୍ତା ହୁଅନ୍ତି, ତାʼ ଉପରେ କାହାର ପ୍ରଭାବ ପଡ଼ିପାରେ ?
ଉପଦେଶକ ୩:୧, ୭ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନ ଉପରେ ଆଲୋଚନା କରନ୍ତୁ:
ବେଳେ ବେଳେ କିଛି ନ କହିବା ଭଲ ହେବ କିମ୍ବା ବେଳେ ବେଳେ ଚୁପ୍ ରହି ପରେ କହିବା ଭଲ ହେବ । ଆପଣ କʼଣ ଭାବନ୍ତି, କେତେବେଳେ ଏପରି କରିବା ଭଲ ହେବ ?
୫. ଅନ୍ୟମାନଙ୍କ ବିଷୟରେ ଭଲ କଥା କହନ୍ତୁ
ଆମେ ଧ୍ୟାନ ଦେବା ଉଚିତ୍ ଯେ ଆମେ କାହାରି ନିନ୍ଦା ନ କରୁ ଏବଂ ଏପରି କଥା ନ କହୁ, ଯାହା କାହାରି ମନକୁ କଷ୍ଟ ଦେଉଥିବ । ଭିଡିଓ ଦେଖନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନଗୁଡ଼ିକ ଉପରେ ଆଲୋଚନା କରନ୍ତୁ ।
ଭିଡିଓରେ ଥିବା ଭାଇଙ୍କର କେଉଁ ଖରାପ ଅଭ୍ୟାସ ଥିଲା ଏବଂ ସେ କାହିଁକି ତାହାକୁ ଛାଡ଼ିବାକୁ ଚାହୁଁଥିଲେ ?
ନିଜକୁ ବଦଳାଇବା ପାଇଁ ସେ କʼଣ କଲେ ?
ଉପଦେଶକ ୭:୧୬ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନ ଉପରେ ଆଲୋଚନା କରନ୍ତୁ:
ଯେତେବେଳେ ଆମକୁ କାହାରି ନିନ୍ଦା କରିବାକୁ ଇଚ୍ଛା ହୁଏ, ସେତେବେଳେ ଆମକୁ କେଉଁ କଥା ମନେ ରଖିବା ଉଚିତ୍ ?
ଉପଦେଶକ ୭:୨୧, ୨୨ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନ ଉପରେ ଆଲୋଚନା କରନ୍ତୁ:
ଯଦି ଆପଣଙ୍କୁ ଜଣାପଡ଼େ ଯେ କେହି ଆପଣଙ୍କ ବିଷୟରେ ଓଲଟା-ସିଧା କହୁଛନ୍ତି, ତାହେଲେ ହୁଏତ ଆପଣଙ୍କୁ ତାହା ଶୁଣି ଖରାପ ଲାଗିପାରେ ବା ରାଗ ଲାଗିପାରେ । ଏପରି ସମୟରେ ଏହି ପଦଗୁଡ଼ିକ ଆପଣଙ୍କୁ କିପରି ସାହାଯ୍ୟ କରିପାରେ ?
୬. ନିଜ ପରିବାର ସହିତ କୋମଳତାର ସହ କଥା ହୁଅନ୍ତୁ
ଯିହୋବା ଚାହାନ୍ତି ଯେ ଆପଣ ନିଜ ପରିବାର ସହିତ ପ୍ରେମ ଓ କୋମଳତାର ସହ କଥା ହୁଅନ୍ତୁ । ଭିଡିଓ ଦେଖନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନ ଉପରେ ଆଲୋଚନା କରନ୍ତୁ ।
କେଉଁ କଥା ଆପଣଙ୍କୁ ନିଜ ପରିବାର ସହିତ ପ୍ରେମର ସହ କଥା ହେବା ପାଇଁ ସାହାଯ୍ୟ କରିପାରେ ?
ଏଫିସୀୟ ୪:୩୧, ୩୨ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନ ଉପରେ ଆଲୋଚନା କରନ୍ତୁ:
କେଉଁଭଳି କଥା ହେଲେ ପରିବାରରେ ପ୍ରେମ ରହିବ ?
ଯିହୋବା ସ୍ପଷ୍ଟ ଭାବେ କହିଲେ ଯେ ସେ ନିଜ ପୁତ୍ର ଯୀଶୁଙ୍କ ପାଇଁ କିପରି ଅନୁଭବ କରନ୍ତି । ମାଥିଉ ୧୭:୫ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନ ଉପରେ ଆଲୋଚନା କରନ୍ତୁ:
ପରିବାର ସହ କଥା ହେବା ବିଷୟରେ ଆପଣ ଯିହୋବାଙ୍କଠାରୁ କʼଣ ଶିଖନ୍ତି ?
ଅନ୍ୟମାନଙ୍କୁ ପ୍ରଶଂସା କରିବା ପାଇଁ ସୁଯୋଗ ଖୋଜନ୍ତୁ
କିଛି ଲୋକ କହନ୍ତି: “ମୋ ମନରେ ଯାହା ଆସେ ତାହା କହି ଦିଏ । ଅନ୍ୟମାନଙ୍କୁ ଖରାପ ଲାଗିଲେ ଲାଗୁ, ମୁଁ କʼଣ କରିବି ।”
କʼଣ ଆପଣ ବି ଏପରି ଭାବନ୍ତି ? ଆପଣଙ୍କୁ ଏପରି କାହିଁକି ଲାଗେ ?
ଆମେ କʼଣ ଶିଖିଲୁ ?
ଆମେ ନିଜ କଥାବାର୍ତ୍ତାରୁ କାହାରି ସାହସ ବଢ଼ାଇପାରୁ କିମ୍ବା କାହାରି ସାହସ ଭାଙ୍ଗିପାରୁ । ତେଣୁ ଆମେ ଧ୍ୟାନ ଦେବା ଉଚିତ୍ ଯେ ଆମେ କʼଣ କହୁ, କେତେବେଳେ କହୁ ଏବଂ କିପରି କହୁ ।
ଆପଣ କʼଣ କହିବେ ?
ଆପଣ ନିଜ କଥା ହେବାର ଦକ୍ଷତାକୁ କିପରି ଭଲ ବ୍ୟବହାର କରିପାରିବେ ?
ଆପଣ କେଉଁଭଳି କଥାବାର୍ତ୍ତା କରିବା ପାଇଁ ଚାହାନ୍ତି ନାହିଁ ?
ଆପଣ କʼଣ କରିପାରିବେ, ଯାହାଫଳରେ ଆପଣଙ୍କ କଥାରୁ ଅନ୍ୟମାନଙ୍କର ସାହସ ବଢ଼ିବ ?
ଅଧିକ ଜାଣନ୍ତୁ
ଆମେ କʼଣ କରିପାରିବା, ଯାହାଫଳରେ ଆମ କଥାରୁ ଅନ୍ୟମାନଙ୍କର ସାହସ ବଢ଼ିବ ?
ଜାଣନ୍ତୁ ଯେ ଆପଣ ଗାଳିଗୁଲଜଠାରୁ କିପରି ଦୂରେଇ ରହିପାରିବେ ।
“ଗାଳିଗୁଲଜ କରିବା କʼଣ ଭୁଲ ଅଟେ ?” (jw.org ୱେବସାଇଟ୍ରେ ଥିବା ଲେଖା)
ଅନ୍ୟମାନଙ୍କ ବିଷୟରେ କଥା ହେଉ ହେଉ ହୁଏତ ଆମେ ତାଙ୍କ ବିଷୟରେ ନିନ୍ଦା କରିପାରୁ । ଆସନ୍ତୁ ଜାଣିବା ଯେ ଆମେ ଏପରି ନ କରିବା ପାଇଁ କʼଣ କରିପାରିବା ।
ଜଣେ ବ୍ୟକ୍ତି ବହୁତ ଗାଳିଗୁଲଜ କରୁଥିଲା । ତାʼପାଇଁ ଏହି ଅଭ୍ୟାସକୁ ଛାଡ଼ିବା ଏତେ ସହଜ ନ ଥିଲା । ଜାଣନ୍ତୁ ଯେ ଯିହୋବା କିପରି ତାକୁ ସାହାଯ୍ୟ କଲେ ।
“ମୁଁ ଗଭୀରତାର ସହ ଭାବିବାକୁ ଲାଗିଲି ଯେ ମୋ ଜୀବନର ଉଦ୍ଦେଶ୍ୟ କʼଣ” (ପ୍ରହରୀଦୁର୍ଗ-ହି, ଅକ୍ଟୋବର-ଡିସେମ୍ବର, ୨୦୧୩)