ଈଶ୍ୱରଙ୍କ ରାଜ୍ୟ ଆରମ୍ଭ ହୋଇଯାଇଛି !

୧. ଆଜି କେଉଁ ଭବିଷ୍ୟତବାଣୀ ପୂରା ହେଉଛି ଆଉ ଏହା କେଉଁ କଥାର ପ୍ରମାଣ ଅଟେ ?

ଦୁନିଆରେ ଦେଖିବା ହେଲେ, ପରିବାର ସବୁ ଭାଙ୍ଗିଯାଉଛି । କଥା କଥାରେ ଲୋକମାନେ ରାଗିଯାଆନ୍ତି ଆଉ ମାରପିଟ୍‌ କରନ୍ତି । ସମସ୍ତେ କେବଳ ନିଜ ବିଷୟରେ ଭାବନ୍ତି । ଅଧିକାରୀମାନେ ବେଇମାନ ହୋଇଯାଉଛନ୍ତି ଆଉ ସେମାନଙ୍କ ଉପରୁ ଲୋକମାନଙ୍କର ଭରସା ଉଠିଯାଉଛି । ଏହା ଦେଖି ହୁଏତ ଆମକୁ ଲାଗିପାରେ ଆମ ପାଖରେ କିଛି ଆଶା ନାହିଁ, ପରିସ୍ଥିତି କେବେ ସୁଧୁରିବ ନାହିଁ । କିନ୍ତୁ ପ୍ରକୃତରେ ଏହି ପରିସ୍ଥିତିକୁ ଦେଖି ଆମକୁ ଆଶା ମିଳେ ଯେ ଖୁବ୍‌ ଶୀଘ୍ର ସବୁକିଛି ଠିକ୍‌ ହୋଇଯିବ । ବାଇବଲରେ ଭବିଷ୍ୟତବାଣୀ କରାଯାଇଥିଲା ଯେ ଯେବେ ଏପରି ଲୋକମାନେ ଦେଖାଯିବେ, ତେବେ ତାʼର ଅର୍ଥ ହେବ ଯେ ଆମେ ଦୁନିଆର “ଶେଷକାଳରେ” ବଞ୍ଚୁଛୁ । (୨ ତୀମ. ୩:୧-୫) ଏଥିରେ କିଛି ସନ୍ଦେହ ନାହିଁ ଯେ ଏହି ଭବିଷ୍ୟତବାଣୀ ଆଜି ପୂରା ହେଉଛି । ଏହା ଏକଥାର ପ୍ରମାଣ ଯେ ଯୀଶୁ ଖ୍ରୀଷ୍ଟ ସ୍ୱର୍ଗରେ ଶାସନ କରିବା ଆରମ୍ଭ କରିଦେଇଛନ୍ତି । ବାଇବଲରେ ଈଶ୍ୱରଙ୍କ ରାଜ୍ୟ ସହିତ ଜଡ଼ିତ ଆହୁରି ଭବିଷ୍ୟତବାଣୀଗୁଡ଼ିକ କରାଯାଇଛି । ଆସନ୍ତୁ ସେମଧ୍ୟରୁ କିଛି ଉପରେ ଧ୍ୟାନ ଦେବା, ଯାହା ଶେଷକାଳରେ ଅର୍ଥାତ୍‌ ଆମ ସମୟରେ ପୂରା ହୋଇଛି । ଏଥିରୁ ଆମର ବିଶ୍ୱାସ ଆହୁରି ବଢ଼ିବ ।

୨. ଏହି ଲେଖାରେ ଆମେ କେଉଁ ବିଷୟଗୁଡ଼ିକରେ ଆଲୋଚନା କରିବା ଓ କାହିଁକି ? (ବାହାରେ ଥିବା ଚିତ୍ର ଦେଖନ୍ତୁ ।)

^୨ ଏହି ଲେଖାରେ ଆମେ ସବୁଠୁ ଆଗ ଗୋଟିଏ ଭବିଷ୍ୟତବାଣୀ ଉପରେ ଧ୍ୟାନ ଦେବା, ଯେଉଁଥିରୁ ଜଣାପଡ଼େ ଯେ ଈଶ୍ୱରଙ୍କ ରାଜ୍ୟ କେବେ ଆରମ୍ଭ ହେଲା । ତାʼପରେ ଆମେ କିଛି ଭବିଷ୍ୟତବାଣୀଗୁଡ଼ିକରୁ ଜାଣିବା ଯେ ଆମେ କିପରି କହିପାରିବା ଯେ ଯୀଶୁ ଶାସନ କରିବା ଆରମ୍ଭ କରିଦେଇଛନ୍ତି । ଶେଷରେ ଆମେ କିଛି ଭବିଷ୍ୟତବାଣୀଗୁଡ଼ିକ ଉପରେ ଆଲୋଚନା କରିବା, ଯେଉଁଥିରୁ ଆମେ ବୁଝିପାରିବା ଯେ ଈଶ୍ୱର ନିଜ ଶତ୍ରୁମାନଙ୍କୁ କିପରି ବିନାଶ କରିବେ । ଏହି ସବୁ ଭବିଷ୍ୟତବାଣୀଗୁଡ଼ିକ ଗୋଟିଏ ବଡ଼ ଚିତ୍ରର ଛୋଟ ଛୋଟ ଅଂଶ ଭଳି ଅଟେ । ଏଗୁଡ଼ିକୁ ଯୋଡ଼ିଲେ ଆମେ ପୂରା ଚିତ୍ର ଦେଖିପାରିବା ଅର୍ଥାତ୍‌ ଆମେ ବୁଝିପାରିବା ଯେ ଅନେକ ଭବିଷ୍ୟତବାଣୀଗୁଡ଼ିକ ପୂରା ହୋଇଯାଇଛି ଆଉ ଖୁବ୍‌ ଶୀଘ୍ର ବିନାଶ ଆସିବ, ଠିକ୍‌ ଯେପରି ଯିହୋବା ପ୍ରତିଜ୍ଞା କରିଥିଲେ ।

ଈଶ୍ୱରଙ୍କ ରାଜ୍ୟ କେବେ ଆରମ୍ଭ ହେଲା ?

୩. ଦାନିୟେଲ ୭:୧୩, ୧୪ ପଦରେ ଲେଖାଥିବା ଭବିଷ୍ୟତବାଣୀରୁ ଆମକୁ କେଉଁ କଥାର ବିଶ୍ୱାସ ହୋଇଯାଏ ?

^୩ ଦାନିୟେଲ ୭:୧୩, ୧୪ ପଦରେ ଲେଖାଥିବା ଭବିଷ୍ୟତବାଣୀରୁ ଆମକୁ ବିଶ୍ୱାସ ହୋଇଯାଏ ଯେ ଯୀଶୁ ଖ୍ରୀଷ୍ଟ ଈଶ୍ୱରଙ୍କ ରାଜ୍ୟର ରାଜା ଅଟନ୍ତି ଆଉ ତାଙ୍କ ଭଳି ଭଲ ରାଜା କେହି ହୋଇପାରିବେ ନାହିଁ । ଏଥିରୁ ଏହା ବି ଜଣାପଡ଼େ ଯେ ତାଙ୍କ ରାଜ୍ୟ ସବୁଦିନ ପାଇଁ ରହିବ ଆଉ ସବୁ ରାଷ୍ଟ୍ରର ଲୋକେ ଖୁସିରେ ତାଙ୍କ “ସେବା କରିବେ ।” କିନ୍ତୁ ତାଙ୍କ ରାଜ୍ୟ କେବେ ଆରମ୍ଭ ହେଲା ? ଦାନିୟେଲ ବହିରେ ଲେଖାଥିବା ଆଉ ଏକ ଭବିଷ୍ୟତବାଣୀରୁ ଜଣାପଡ଼େ ଯେ ସାତ କାଳର ଏକ ଲମ୍ବା ସମୟ ଶେଷ ହେଲା ପରେ ଯୀଶୁ ଶାସନ କରିବା ଆରମ୍ଭ କରନ୍ତେ । ଆସନ୍ତୁ ଜାଣିବା ଏହି ସାତ କାଳ କେବେ ଶେଷ ହେଲା ।

୪. ଦାନିୟେଲ ୪:୧୦-୧୭ ପଦରୁ କିପରି ଜଣାପଡ଼େ ଯେ ଯୀଶୁ କେବେ ରାଜା ହୁଅନ୍ତେ ? (ଫୁଟନୋଟ୍‌ ମଧ୍ୟ ଦେଖନ୍ତୁ ।)

^୪ ଦାନିୟେଲ ୪:୧୦-୧୭ ପଢ଼ନ୍ତୁ । ଏହି ଭବିଷ୍ୟତବାଣୀରେ କୁହାଯାଇଥିବା ‘ସାତ କାଳର’ ଅର୍ଥ ୨,୫୨୦ ବର୍ଷ । “ସାତ କାଳ” ଖ୍ରୀଷ୍ଟ ପୂର୍ବ ୬୦୭ରେ ଆରମ୍ଭ ହେଲା, ଯେବେ ବାବିଲର ଲୋକମାନେ ଯିରୂଶାଲମ ଉପରେ ଆକ୍ରମଣ କଲେ ଓ ସେଠାକାର ରାଜାକୁ ରାଜଗାଦିରୁ ହଟାଇଦେଲେ । ତାʼପରେ ତାʼପରଠୁ ୨,୫୨୦ ବର୍ଷ ପର୍ଯ୍ୟନ୍ତ ଈଶ୍ୱରଙ୍କ ତରଫରୁ ଶାସନ କରିବା ପାଇଁ କେହି ରାଜା ନ ଥିଲେ । “ସାତ କାଳ” ୧୯୧୪ ଖ୍ରୀଷ୍ଟାବ୍ଦରେ ଶେଷ ହେଲା, ଯେବେ ଯିହୋବା ଯୀଶୁଙ୍କୁ ନିଜ ରାଜ୍ୟର ରାଜା କଲେ ଯାହା ପାଖରେ ଶାସନ କରିବାର ‘ଆଇନଗତ ଅଧିକାର’ ଅଛି ।b—ଯିହି. ୨୧:୨୫-୨୭ NWT.

୫. ‘ସାତ କାଳର’ ଭବିଷ୍ୟତବାଣୀରୁ ଆମକୁ କେଉଁ କଥାର ବିଶ୍ୱାସ ହୋଇଯାଏ ?

^୫ ଏହି ଭବିଷ୍ୟତବାଣୀକୁ ବୁଝିଲେ ଆମକୁ କିପରି ଲାଭ ହୁଏ ? ଆମକୁ ଏକଥାର ବିଶ୍ୱାସ ହୋଇଯାଏ ଯେ ଯିହୋବା ନିଜ ପ୍ରତିଜ୍ଞାଗୁଡ଼ିକୁ ଠିକ୍‌ ସମୟରେ ପୂରା କରନ୍ତି । ‘ସାତ କାଳର’ ଭବିଷ୍ୟତବାଣୀ ଠିକ୍‌ ସମୟରେ ପୂରା ହେଲା ଏବଂ ଈଶ୍ୱରଙ୍କ ରାଜ୍ୟ ନିର୍ଦ୍ଧାରିତ ସମୟରେ ଆରମ୍ଭ ହେଲା । ତେଣୁ ଆମେ ବିଶ୍ୱାସ କରିପାରିବା ଯେ ବାକି ଭବିଷ୍ୟତବାଣୀଗୁଡ଼ିକ ମଧ୍ୟ ଠିକ୍‌ ସମୟରେ ପୂରା ହେବ ଆଉ ଯିହୋବାଙ୍କ ଦିନ ଠିକ୍‌ ସମୟରେ ଆସିବ, ‘ଏଥିରେ ବିଳମ୍ବ ହେବ ନାହିଁ ।’—ହବ. ୨:୩.

ଆମେ କିପରି ଜାଣୁ ଯେ ଯୀଶୁ ଶାସନ କରିବା ଆରମ୍ଭ କରିଦେଇଛନ୍ତି ?

୬. (କ) ଯୀଶୁ ଖ୍ରୀଷ୍ଟ ସ୍ୱର୍ଗରେ ଶାସନ କରିବା ଆରମ୍ଭ କରିଦେଇଛନ୍ତି, ଏହି କଥାର କʼଣ ଲକ୍ଷଣ ଅଛି ? (ଖ) ପ୍ରକାଶିତ ବାକ୍ୟ ୬:୨-୮ ପଦରେ ଲେଖାଥିବା ଭବିଷ୍ୟତବାଣୀରୁ ଏହା କିପରି ପ୍ରମାଣିତ ହୁଏ ଯେ ଯୀଶୁ ଶାସନ କରିବା ଆରମ୍ଭ କରିଦେଇଛନ୍ତି ?

^୬ ସ୍ୱର୍ଗ ଯିବା ପୂର୍ବରୁ ଯୀଶୁ ନିଜ ଶିଷ୍ୟମାନଙ୍କୁ କହିଥିଲେ ଯେ ଯେବେ ସେ ଶାସନ କରିବା ଆରମ୍ଭ କରିବେ, ତେବେ ପୃଥିବୀରେ କʼଣ କʼଣ ହେବ ? ସେ କହିଥିଲେ ଯେ ଯୁଦ୍ଧ, ଦୁର୍ଭିକ୍ଷ ଓ ଭୂମିକମ୍ପ ହେବ । ସେ ଏହା ବି କହିଥିଲେ ଯେ “ସ୍ଥାନେ ସ୍ଥାନେ” ମହାମାରୀଗୁଡ଼ିକ ବ୍ୟାପିବ । ଆଉ ଆମେ ସମସ୍ତେ ଦେଖିଲୁ ଯେ କୋଭିଡ୍‌-୧୯ ମହାମାରୀ କିପରି ବ୍ୟାପିଲା । ବାଇବଲରେ କୁହାଯାଇଛି ଯେ ଏହି କଥାଗୁଡ଼ିକ ଖ୍ରୀଷ୍ଟଙ୍କ ଆଗମନର “ଲକ୍ଷଣ” ଅଟେ । (ମାଥି. ୨୪:୩, ୭; ଲୂକ ୨୧:୭, ୧୦, ୧୧) ନିଜ ଶିଷ୍ୟମାନଙ୍କୁ ଏହି କଥା କହିବାର ୬୦ ବର୍ଷ ପରେ, ଯୀଶୁ ଆଉ ଥରେ ପ୍ରେରିତ ଯୋହନଙ୍କୁ କହିଲେ ଯେ ଯେବେ ତାଙ୍କ ଶାସନ ଆରମ୍ଭ ହେବ, ତେବେ ଏହି ଘଟଣାଗୁଡ଼ିକ ହେବ । (ପ୍ରକାଶିତ ବାକ୍ୟ ୬:୨-୮ ପଢ଼ନ୍ତୁ ।) ଆଉ ୧୯୧୪ରୁ ଯେବେଠୁ ଯୀଶୁ ରାଜା ହେଲେ, ତେବେଠୁ ଆମେ ସ୍ପଷ୍ଟ ଦେଖିପାରୁଛୁ ଯେ ଏସବୁ କଥା ପୂରା ହେଉଛି ।

୭. ଯେବେଠୁ ଯୀଶୁ ରାଜା ହେଲେ, ତେବେଠୁ ପୃଥିବୀରେ ଏତେ କଷ୍ଟ କାହିଁକି ଆସିଛି ?

^୭ ଯେବେଠୁ ଯୀଶୁ ରାଜା ହେଲେ, ତେବେଠୁ ପୃଥିବୀର ପରିସ୍ଥିତି ଏତେ ଖରାପ କାହିଁକି ହୋଇଯାଇଛି ? ପ୍ରକାଶିତ ବାକ୍ୟ ୬:୨ ପଦରୁ ଆମକୁ ଏବିଷୟରେ କିଛି ଜଣାପଡ଼େ । ସେଇଠି କୁହାଯାଇଛି ଯେ ଯୀଶୁ ରାଜା ହେବା ପରେ ପ୍ରଥମେ ଶୟତାନ ଓ ତାʼର ଦୁଷ୍ଟ ସ୍ୱର୍ଗଦୂତମାନଙ୍କ ସହ ଲଢ଼େଇ କଲେ । ପ୍ରକାଶିତ ବାକ୍ୟ ଅଧ୍ୟାୟ ୧୨ରେ ଲେଖାଅଛି ଯେ ଶୟତାନ ସେହି ଲଢ଼େଇରେ ହାରିଗଲା ଏବଂ ତାକୁ ଆଉ ଦୁଷ୍ଟ ସ୍ୱର୍ଗଦୂତମାନଙ୍କୁ ପୃଥିବୀରେ ଫିଙ୍ଗି ଦିଆଗଲା । ତେବେଠୁ ଶୟତାନ ମଣିଷମାନଙ୍କ ଉପରେ ନିଜ ରାଗ ବାହାର କରୁଛି । ତେଣୁ ବାଇବଲରେ ଲେଖାଅଛି ଯେ ‘ପୃଥିବୀ ସନ୍ତାପର ପାତ୍ର ।’—ପ୍ରକା. ୧୨:୭-୧୨.

୮. ଯେବେ ଆମେ ଦେଖୁ ଯେ ରାଜ୍ୟ ବିଷୟରେ କରାଯାଇଥିବା ଭବିଷ୍ୟତବାଣୀଗୁଡ଼ିକ ପୂରା ହେଉଛି, ତେବେ ଆମକୁ କିପରି ଲାଗେ ?

^୮ ଏହି ଭବିଷ୍ୟତବାଣୀକୁ ବୁଝିଲେ ଆମକୁ କିପରି ଲାଭ ହୁଏ ? ଆଜି ଦୁନିଆର ପରିସ୍ଥିତି ଓ ଲୋକମାନଙ୍କ ବ୍ୟବହାର ଦେଖିଲେ ସ୍ପଷ୍ଟ ଜଣାପଡ଼େ ଯେ ଯୀଶୁ ରାଜା ହୋଇଯାଇଛନ୍ତି । ତେଣୁ ଯେବେ ଆମେ ଦେଖୁ ଯେ ଲୋକମାନେ କେବଳ ନିଜ ବିଷୟରେ ଭାବନ୍ତି ଓ ଅନ୍ୟମାନଙ୍କ ସହିତ ଖରାପ ବ୍ୟବହାର କରନ୍ତି, ତେବେ ଆମକୁ ଅଧିକ ଚିନ୍ତା କରିବା ଦରକାର ନାହିଁ । ଆମେ ମନେରଖିବା ଉଚିତ୍‌ ଯେ ଏହାର ଅର୍ଥ ବାଇବଲର ଭବିଷ୍ୟତବାଣୀଗୁଡ଼ିକ ପୂରା ହେଉଛି ଆଉ ସ୍ୱର୍ଗରେ ଈଶ୍ୱରଙ୍କ ରାଜ୍ୟ ଆରମ୍ଭ ହୋଇଯାଇଛି ! (ଗୀତ. ୩୭:୧) ଯେମିତି ଯେମିତି ହର୍ମିଗିଦ୍ଦୋନ୍‌ ପାଖକୁ ଆସିବ, ସମସ୍ୟାଗୁଡ଼ିକ ଆହୁରି ବଢ଼ିବାକୁ ଲାଗିବ । (ମାର୍କ ୧୩:୮; ୨ ତୀମ. ୩:୧୩) କିନ୍ତୁ ଆମେ ବହୁତ ଖୁସି ଯେ ଦୁନିଆର ପରିସ୍ଥିତି ଏତେ ଖରାପ କାହିଁକି ଅଛି, ତାହା ବୁଝିବା ପାଇଁ ଯିହୋବା ଆମକୁ ସାହାଯ୍ୟ କରିଛନ୍ତି ।

ଈଶ୍ୱରଙ୍କ ରାଜ୍ୟ ନିଜ ଶତ୍ରୁମାନଙ୍କୁ କିପରି ବିନାଶ କରିବ ?

୯. (କ) ଦାନିୟେଲ ୨:୨୮, ୩୧-୩୫ ପଦରେ ଶେଷ ବିଶ୍ୱଶକ୍ତି ବିଷୟରେ କʼଣ କୁହାଯାଇଛି ? (ଖ) ଏହା କେବେଠୁ ଶାସନ କରିବାକୁ ଲାଗିଲା ?

^୯ ଦାନିୟେଲ ୨:୨୮, ୩୧-୩୫ ପଢ଼ନ୍ତୁ । ଆଜି ଆମେ ଏହି ଭବିଷ୍ୟତବାଣୀକୁ ପୂରା ହେବାର ଦେଖୁଛୁ । ନବୂଖଦ୍‌ନିତ୍ସର ନିଜ ସ୍ୱପ୍ନରେ ଦେଖିଲେ ଯେ “ଅନ୍ତିମ କାଳରେ” ଅର୍ଥାତ୍‌ ଯୀଶୁଙ୍କ ଶାସନ ଆରମ୍ଭ ହେବା ପରେ କʼଣ ହେବ । ସେ ଗୋଟିଏ ମୂର୍ତ୍ତି ଦେଖିଲେ, ଯାହାର ପାଦ ‘ଲୌହ ଓ ମୃତ୍ତିକାରୁ’ ତିଆରି ହୋଇଥିଲା । ଏହା ଶେଷ ବିଶ୍ୱଶକ୍ତି ହୁଅନ୍ତା ଓ ଈଶ୍ୱରଙ୍କ ରାଜ୍ୟର ଶତ୍ରୁ ହୁଅନ୍ତା । ଯେବେ ଯୀଶୁ ଶାସନ କରିବା ଆରମ୍ଭ କରନ୍ତେ, ତେବେ ପୃଥିବୀରେ ଏହି ବିଶ୍ୱଶକ୍ତିର ଶାସନ ଚାଲୁଥାʼନ୍ତା । ଏହି ବିଶ୍ୱଶକ୍ତି କିଏ ଥିଲା ଓ କେବେଠୁ ଶାସନ କରିବା ଆରମ୍ଭ କରିଥିଲା ? ପ୍ରଥମ ବିଶ୍ୱଯୁଦ୍ଧ ସମୟରେ ବ୍ରିଟେନ୍‌ ଓ ଆମେରିକା ମଧ୍ୟରେ ଗଭୀର ମିତ୍ରତା ହୋଇଗଲା ଆଉ ସେମାନେ ମିଶି କାମ କରିବାକୁ ଲାଗିଲେ । ତେବେଠୁ ବ୍ରିଟେନ୍‌-ଆମେରିକା ବିଶ୍ୱଶକ୍ତି ଶାସନ କରିବା ଆରମ୍ଭ କରିଦେଲା । କିନ୍ତୁ ଏହି ବିଶ୍ୱଶକ୍ତି ଅନ୍ୟ ବିଶ୍ୱଶକ୍ତିଠାରୁ କିପରି ଅଲଗା ଅଟେ ? ଆସନ୍ତୁ ଦୁଇଟି କଥା ଉପରେ ଧ୍ୟାନ ଦେବା ।

୧୦. (କ) ବ୍ରିଟେନ୍‌-ଆମେରିକାକୁ ଯେଉଁଭଳି ଦର୍ଶାଯାଇଛି ତାହା କାହିଁକି ଠିକ୍‌ ଅଟେ ? (ଖ) ଆମେ କେଉଁ କଥାଠାରୁ ସାବଧାନ ରହିବା ଉଚିତ୍‌ ? (“ମୃତ୍ତିକାଠାରୁ ସାବଧାନ !” ବକ୍ସ ଦେଖନ୍ତୁ ।)

^୧୦ ପ୍ରଥମ କଥା: ମୂର୍ତ୍ତିର ଅଲଗା ଅଲଗା ଭାଗ ଅଲଗା ଅଲଗା ବିଶ୍ୱଶକ୍ତିଗୁଡ଼ିକୁ ଦର୍ଶାଏ ଆଉ ସବୁ ଭାଗ କୌଣସି ଏକ ଧାତୁରେ ତିଆରି ହୋଇଛି, ଯେପରି ସୁନା କିମ୍ବା ପିତ୍ତଳ । କିନ୍ତୁ ମୂର୍ତ୍ତିର ପାଦ ଅର୍ଥାତ୍‌ ବ୍ରିଟେନ୍‌-ଆମେରିକା ବିଶ୍ୱଶକ୍ତି, ମୃତ୍ତିକା ଓ ଲୌହରେ ମିଶି ତିଆରି ହୋଇଛି । ମୃତ୍ତିକା “ମନୁଷ୍ୟମାନଙ୍କ ବଂଶ” ଅର୍ଥାତ୍‌ ସାଧାରଣ ଲୋକଙ୍କୁ ଦର୍ଶାଏ । (ଦାନି. ୨:୪୩) ଏହି ସାଧାରଣ ଲୋକମାନଙ୍କ ଯୋଗୁଁ ଏହି ବିଶ୍ୱଶକ୍ତିର ଲୌହ ଭଳି ଶକ୍ତି ଦୁର୍ବଳ ହୋଇଯାଇଛି । ଆଜି ନିର୍ବାଚନ ସମୟରେ କିମ୍ବା ନାଗରିକମାନଙ୍କ ଅଧିକାର ପାଇଁ ଲଢ଼ିବା ସମୟରେ, ଆନ୍ଦୋଳନ କରିବା ବେଳେ କିମ୍ବା ଶ୍ରମିକ ସଂଘ ତିଆରି କରିବା ବେଳେ, ସାଧାରଣ ଲୋକମାନଙ୍କର ପ୍ରଭାବ ଆମେ ସ୍ପଷ୍ଟ ଦେଖିପାରୁ । ଆଉ ଏହି କାରଣରୁ ଏହି ବିଶ୍ୱଶକ୍ତି ଯାହା ବି କରିବାକୁ ଚାହେଁ, ତାହା କରିପାରେ ନାହିଁ ।

୧୧. ଆଜି ବ୍ରିଟେନ୍‌-ଆମେରିକା ବିଶ୍ୱଶକ୍ତି ଶାସନ କରୁଛି, ଏଥିରୁ କିପରି ଆମର ବିଶ୍ୱାସ ବଢ଼େ ଯେ ବିନାଶ ବହୁତ ପାଖରେ ଅଛି ?

^୧୧ ଦ୍ୱିତୀୟ କଥା: ବ୍ରିଟେନ୍‌-ଆମେରିକାକୁ ବିଶ୍ୱଶକ୍ତିକୁ ପାଦ ଭାବେ ଦର୍ଶାଯାଇଛି, ଅର୍ଥାତ୍‌ ସେ ଶେଷ ବିଶ୍ୱଶକ୍ତି ଅଟେ । ଆଜି ଏହାର ହିଁ ଶାସନ ଚାଲୁଛି ଆଉ ତାʼପରେ କୌଣସି ବିଶ୍ୱଶକ୍ତି ଶାସନ କରିବ ନାହିଁ । ହର୍ମିଗିଦ୍ଦୋନ୍‌ ଯୁଦ୍ଧରେ ଈଶ୍ୱରଙ୍କ ରାଜ୍ୟ ଏହି ବିଶ୍ୱଶକ୍ତିକୁ ଆଉ ବାକି ସମସ୍ତ ସରକାରଗୁଡ଼ିକୁ ସବୁଦିନ ପାଇଁ ବିନାଶ କରିଦେବ ।c—ପ୍ରକା. ୧୬:୧୩, ୧୪, ୧୬; ୧୯:୧୯, ୨୦.

୧୨. ଦାନିୟେଲର ଭବିଷ୍ୟତବାଣୀକୁ ବୁଝିଲେ ଆମକୁ କିପରି ଲାଭ ହେବ ?

^୧୨ ଏହି ଭବିଷ୍ୟତବାଣୀକୁ ବୁଝିଲେ ଆମକୁ କିପରି ଲାଭ ହୁଏ ? ଦାନିୟେଲର ଭବିଷ୍ୟତବାଣୀରୁ ଏହି କଥାର ପ୍ରମାଣ ମିଳେ ଯେ ଆମେ ଶେଷ ସମୟରେ ବଞ୍ଚୁଛୁ । ଆଜିଠୁ ପ୍ରାୟ ୨,୫୦୦ ବର୍ଷ ପୂର୍ବେ ଦାନିୟେଲ କହିଥିଲେ ବାବିଲ ପରେ ଆହୁରି ଚାରୋଟି ବିଶ୍ୱଶକ୍ତି ଆସିବେ ଯେଉଁମାନେ ଈଶ୍ୱରଙ୍କ ଲୋକମାନଙ୍କ ଉପରେ ଅତ୍ୟାଚାର କରିବେ । ସେ ଯାହା ଭବିଷ୍ୟତବାଣୀ କଲେ, ସେଥିରୁ ଆମେ ଏହା ବି ବୁଝିପାରୁ ଯେ ବ୍ରିଟେନ୍‌-ଆମେରିକା ବିଶ୍ୱଶକ୍ତି ଶେଷ ବିଶ୍ୱଶକ୍ତି ଅଟେ । ଏଥିରୁ ଆମକୁ ବହୁତ ସାନ୍ତ୍ୱନା ମିଳେ ଓ ଆଶା ମିଳେ ଯେ ଖୁବ୍‌ ଶୀଘ୍ର ଈଶ୍ୱରଙ୍କ ରାଜ୍ୟ ମଣିଷମାନଙ୍କ ସମସ୍ତ ସରକାରଗୁଡ଼ିକୁ ବିନାଶ କରିଦେବ ଆଉ ପୂରା ପୃଥିବୀରେ ଶାସନ କରିବ ।—ଦାନି. ୨:୪୪.

୧୩. ପ୍ରକାଶିତ ବାକ୍ୟ ୧୭:୯-୧୨ ପଦରେ କୁହାଯାଇଥିବା ‘ଅଷ୍ଟମ ରାଜା’ ଓ “ଦଶ ରାଜା” କେଉଁମାନେ ଅଟନ୍ତି ଓ ସେମାନଙ୍କ ବିଷୟରେ କରାଯାଇଥିବା ଭବିଷ୍ୟତବାଣୀଗୁଡ଼ିକ କିପରି ପୂରା ହେଲା ?

^୧୩ ପ୍ରକାଶିତ ବାକ୍ୟ ୧୭:୯-୧୨ ପଢ଼ନ୍ତୁ । ପ୍ରଥମ ବିଶ୍ୱଯୁଦ୍ଧ ସମୟରେ ବହୁତ ଧନ-ଜୀବନ ନଷ୍ଟ ହେଲା ଯାହା ଯୋଗୁଁ ଶେଷ ସମୟ ବିଷୟରେ ବାଇବଲରେ ଲେଖାଯାଇଥିବା ଆଉ ଗୋଟିଏ ଭବିଷ୍ୟତବାଣୀଗୁଡ଼ିକ ପୂରା ହେଲା । ଦୁନିଆର ନେତାମାନେ ପୃଥିବୀରେ ଶାନ୍ତି ଆଣିବା ପାଇଁ ଚାହୁଁଥିଲେ, ତେଣୁ ଜାନୁୟାରୀ ୧୯୨୦ ମସିହାରେ ସେମାନେ ରାଷ୍ଟ୍ର ସଂଘ ତିଆରି କଲେ । ଆଉ କିଛି ବର୍ଷ ପରେ ଅକ୍ଟୋବର ୧୯୪୫ ମସିହାରେ ତାʼଜାଗାରେ ସଂଯୁକ୍ତ ରାଷ୍ଟ୍ର ଆସିଗଲା । ଏହି ସଂଗଠନକୁ ବାଇବଲରେ ‘ଅଷ୍ଟମ ରାଜା’ କୁହାଯାଇଛି । ଏହା କୌଣସି ବିଶ୍ୱଶକ୍ତି ନୁହେଁ, କିନ୍ତୁ ତାʼପାଖରେ ଯାହା ବି ଅଧିକାର ଅଛି ତାହା ତାକୁ ଦୁନିଆର ସରକାରଗୁଡ଼ିକ ଠାରୁ ମିଳେ । ବାଇବଲରେ ଏହି ସରକାରଗୁଡ଼ିକୁ “ଦଶ ରାଜା” କୁହାଯାଇଛି ।

୧୪-୧୫. (କ) ପ୍ରକାଶିତ ବାକ୍ୟ ୧୭:୩-୫ ପଦରୁ ଆମକୁ “ମହାନଗରୀ ବାବିଲ” ବିଷୟରେ କʼଣ ଜଣାପଡ଼େ ? (ଖ) ଆଜି ମିଥ୍ୟା ଧର୍ମଗୁଡ଼ିକ ସହ କʼଣ ହେଉଛି ?

^୧୪ ପ୍ରକାଶିତ ବାକ୍ୟ ୧୭:୩-୫ ପଢ଼ନ୍ତୁ । ପ୍ରେରିତ ଯୋହନ ଦର୍ଶନରେ ଗୋଟିଏ ବେଶ୍ୟାକୁ ଦେଖିଲେ । ତାକୁ “ମହାନଗରୀ ବାବିଲ” କୁହାଯାଇଛି ଓ ସେ ସାରା ଦୁନିଆରେ ଥିବା ମିଥ୍ୟା ଧର୍ମଗୁଡ଼ିକୁ ଦର୍ଶାଏ । ଶହ ଶହ ବର୍ଷରୁ ମିଥ୍ୟା ଧର୍ମଗୁଡ଼ିକର ଦୁନିଆର ସରକାରଗୁଡ଼ିକ ସହିତ ଭଲ ସମ୍ପର୍କ ରହିଆସିଛି ଓ ସେମାନେ ଏହି ସରକାରଗୁଡ଼ିକୁ ସହଯୋଗ କରି ଆସୁଛନ୍ତି  । କିନ୍ତୁ ଖୁବ୍‌ ଶୀଘ୍ର ଯିହୋବା ‘ଦଶ ରାଜା’ ଅର୍ଥାତ୍‌ ଦୁନିଆର ସରକାରଗୁଡ଼ିକର ମନରେ ଏ କଥା ପୂରାଇବେ ଯେ ସେମାନେ ତାଙ୍କର ‘ଅଭିପ୍ରାୟ ପୂରା କରିବେ’ ଓ ମିଥ୍ୟା ଧର୍ମଗୁଡ଼ିକୁ ବିନାଶ କରିଦେବେ ।—ପ୍ରକା. ୧୭:୧, ୨, ୧୬, ୧୭.

^୧୫ ଆମେ କିପରି ଜାଣୁ ଯେ ଖୁବ୍‌ ଶୀଘ୍ର ମହାନଗରୀ ବାବିଲର ବିନାଶ ହୋଇଯିବ ? ଏହି ପ୍ରଶ୍ନର ଉତ୍ତର ଜାଣିବା ପାଇଁ ଟିକିଏ ପ୍ରାଚୀନ ସମୟର ବାବିଲ ସହର ବିଷୟରେ ଭାବନ୍ତୁ । ଏହି ସହରର ବାହାରେ ଫରାତ୍‌ ନଦୀ ବହୁଥିଲା, ଯେଉଁଥିରୁ ସହରକୁ ସୁରକ୍ଷା ମିଳୁଥିଲା । ସେହିପରି ପ୍ରକାଶିତ ବାକ୍ୟ ବହିରେ କୁହାଯାଇଛି ଯେ ମହାନଗରୀ ବାବିଲକୁ “ଜଳରାଶି” ଘେରି ରହିଛି । (ପ୍ରକା. ୧୭:୧୫) ଏହି ଜଳରାଶି ସେହି ଲକ୍ଷ ଲକ୍ଷ ଭକ୍ତମାନଙ୍କୁ ଦର୍ଶାଏ ଯେଉଁମାନେ ମିଥ୍ୟା ଧର୍ମଗୁଡ଼ିକୁ ସହଯୋଗ କରନ୍ତି । ପ୍ରକାଶିତ ବାକ୍ୟରେ ଏହା ମଧ୍ୟ କୁହାଯାଇଛି ଯେ ଏହି ‘ଜଳ ଶୁଷ୍କ’ ହୋଇଯିବ ଅର୍ଥାତ୍‌ ଅନେକ ଲୋକ ମିଥ୍ୟା ଧର୍ମଗୁଡ଼ିକୁ ଛାଡ଼ିଦେବେ । (ପ୍ରକା. ୧୬:୧୨) ଆଜି ଆମେ ଦେଖିପାରୁଛୁ ଯେ ଏହି ଭବିଷ୍ୟତବାଣୀ ପୂରା ହେଉଛି । ଅନେକ ଲୋକଙ୍କର ଧର୍ମ ଉପରୁ ବିଶ୍ୱାସ ଉଠିଯାଇଛି ଓ ସେମାନେ ସମସ୍ୟାର ସମାଧାନ ପାଇଁ କିମ୍ବା ମନର ଶାନ୍ତି ପାଇବା ପାଇଁ ଅନ୍ୟ ଉପାୟ ଆପଣାଉଛନ୍ତି ।

୧୬. ସଂଯୁକ୍ତ ରାଷ୍ଟ୍ରର ଆରମ୍ଭ ଓ ମହାନଗରୀ ବାବିଲ ବିଷୟରେ କରାଯାଇଥିବା ଭବିଷ୍ୟତବାଣୀଗୁଡ଼ିକୁ ବୁଝିଲେ ଆମକୁ କʼଣ ଲାଭ ହୁଏ ?

^୧୬ ଏହି ଭବିଷ୍ୟତବାଣୀଗୁଡ଼ିକୁ ବୁଝିଲେ ଆମକୁ କିପରି ଲାଭ ହୁଏ ? ସଂଯୁକ୍ତ ରାଷ୍ଟ୍ର ଆରମ୍ଭ ହୋଇସାରିଛି ଓ ଆଜି ଅନେକ ଲୋକ ମିଥ୍ୟା ଧର୍ମଗୁଡ଼ିକୁ ଛାଡ଼ୁଛନ୍ତି । ଏହା ଦେଖି ଆମକୁ ପକ୍କା ଭରସା ହୋଇଯାଏ ଯେ ଆମେ ଶେଷ କାଳରେ ବଞ୍ଚୁଛୁ । ଏହା ସତ ଯେ ମିଥ୍ୟା ଧର୍ମକୁ ସହଯୋଗ କରୁଥିବା ଲୋକମାନଙ୍କର ସଂଖ୍ୟା କମି କମି ଯାଉଛି, କିନ୍ତୁ ଏହା ଯୋଗୁଁ ମିଥ୍ୟା ଧର୍ମଗୁଡ଼ିକର ବିନାଶ ହେବ ନାହିଁ । ଯିହୋବା ନିଜେ ମିଥ୍ୟା ଧର୍ମଗୁଡ଼ିକର ବିନାଶ କରାଇବେ । ଯେପରି ଆମେ ଆଗରୁ ଦେଖିଥିଲୁ ଯିହୋବା ‘ଦଶ ରାଜା’ ଅର୍ଥାତ୍‌ ସଂଯୁକ୍ତ ରାଷ୍ଟ୍ରକୁ ସହଯୋଗ କରୁଥିବା ସରକାରଗୁଡ଼ିକର ହୃଦୟରେ ଏ କଥା ପୂରାଇବେ ଯେ ସେମାନେ ତାଙ୍କର ‘ଅଭିପ୍ରାୟ ପୂରା କରିବେ ।’ ମିଥ୍ୟା ଧର୍ମଗୁଡ଼ିକର ବିନାଶ ହଠାତ୍‌ ହେବ ଓ ଏହା ଦେଖି ଲୋକମାନେ ଆଶ୍ଚର୍ଯ୍ୟ ହୋଇଯିବେ ।d (ପ୍ରକା. ୧୮:୮-୧୦) ମହାନଗରୀ ବାବିଲର ବିନାଶ ଦୁନିଆ ଉପରେ ବହୁତ ପ୍ରଭାବ ପକାଇବ ଓ ଏହା ଯୋଗୁଁ ହୁଏତ ଅନେକ ସମସ୍ୟା ଆସିପାରେ । କିନ୍ତୁ ଈଶ୍ୱରଙ୍କ ଲୋକମାନେ ଖୁସି ହେବେ । କାରଣ ଈଶ୍ୱରଙ୍କର ଏହି ବଡ଼ ଶତ୍ରୁର ସବୁଦିନ ପାଇଁ ବିନାଶ ହୋଇସାରିଥିବ ଓ ଆମକୁ ଭରସା ହେବ ଯେ ଖୁବ୍‌ ଶୀଘ୍ର ଆମକୁ ଏହି ଦୁଷ୍ଟ ଦୁନିଆରୁ ମୁକ୍ତି ମିଳିଯିବ ।—ଲୂକ ୨୧:୨୮.

ଭରସା ରଖନ୍ତୁ, ଯିହୋବା ଆପଣଙ୍କୁ ରକ୍ଷା କରିବେ

୧୭-୧୮. (କ) ନିଜ ବିଶ୍ୱାସ ବଢ଼ାଇବା ଜାରି ରଖିବା ପାଇଁ ଆମକୁ କʼଣ କରିବାକୁ ହେବ ? (ଖ) ପରବର୍ତ୍ତୀ ଲେଖାରେ ଆମେ କେଉଁ ବିଷୟରେ ଆଲୋଚନା କରିବା ?

^୧୭ ଦାନିୟେଲ ଭବିଷ୍ୟତବାଣୀ କରିଥିଲେ ଯେ ଶେଷ କାଳରେ ‘ସତ୍ୟ ଜ୍ଞାନର ବୃଦ୍ଧି ହେବ ।’ ଆଉ ଆଜି ଆମେ ଏପରି ହିଁ ହେଉଥିବାର ଦେଖିପାରୁଛୁ । ଏବେ ଆମେ ଶେଷ କାଳ ବିଷୟରେ କୁହାଯାଇଥିବା ଭବିଷ୍ୟତବାଣୀଗୁଡ଼ିକୁ ଭଲଭାବେ ବୁଝିପାରୁ । (ଦାନି. ୧୨:୪, ୯, ୧୦) ଯେପରି ଭାବେ ବାଇବଲରେ ଲେଖାଥିବା ଭବିଷ୍ୟତବାଣୀଗୁଡ଼ିକର ପ୍ରତ୍ୟେକ କଥା ପୂରା ହୋଇଛି, ତାହା ଦେଖି ଆମ ହୃଦୟରେ ଯିହୋବାଙ୍କ ପାଇଁ ବିସ୍ମୟ ଭରିଯାଏ ଓ ବାଇବଲ ଉପରେ ଆମ ଭରସା ବଢ଼ିଯାଏ । (ଯିଶା. ୪୬:୧୦; ୫୫:୧୧) ତେଣୁ ବାଇବଲର ଗଭୀର ଭାବେ ଅଧ୍ୟୟନ କରନ୍ତୁ ଓ ଯିହୋବାଙ୍କ ସହ ଏକ ଭଲ ସମ୍ପର୍କ ରଖିବା ପାଇଁ ଲୋକମାନଙ୍କୁ ସାହାଯ୍ୟ କରନ୍ତୁ । ଏପରି ଭାବେ ଆପଣଙ୍କ ବିଶ୍ୱାସ ଆହୁରି ବଢ଼ି ବଢ଼ି ଯିବ । ଯିହୋବା ପ୍ରତିଜ୍ଞା କରନ୍ତି ଯେ ଯେଉଁମାନେ ତାଙ୍କ ଉପରେ ପୂରାପୂରି ନିର୍ଭର ରହିବେ, ସେ ସେମାନଙ୍କର ସୁରକ୍ଷା କରିବେ ଓ ସେମାନଙ୍କୁ ‘ସମ୍ପୂର୍ଣ୍ଣ ଶାନ୍ତିରେ ରଖିବେ ।’—ଯିଶା. ୨୬:୩.

^୧୮ ପରବର୍ତ୍ତୀ ଲେଖାରେ ଆମେ ଯିହୋବାଙ୍କ ଲୋକମାନଙ୍କ ବିଷୟରେ କରାଯାଇଥିବା କିଛି ଭବିଷ୍ୟତବାଣୀଗୁଡ଼ିକ ଉପରେ ଆଲୋଚନା କରିବା ଯାହା ଆଜି ପୂରା ହେଉଛି । ସେଥିରୁ ଆମର ଭରସା ଆହୁରି ପକ୍କା ହୋଇଯିବ ଯେ ଆମେ ଶେଷ କାଳରେ ବଞ୍ଚୁଛୁ । ଆମେ ଜାଣିବା ଯେ ଆମେ କିପରି କହିପାରିବା ଯେ ଯୀଶୁ ଆଜି ଆମକୁ ଠିକ୍‌ ରାସ୍ତା ଦେଖାଉଛନ୍ତି ।