ମୁକ୍ତିର ମୂଲ୍ୟ ଦେବା ପୂର୍ବରୁ ପାପ କ୍ଷମା କରାଗଲା

ଯୀଶୁ ନିଜ ଜୀବନ ଦେଇ ମୁକ୍ତିର ଯେଉଁ ମୂଲ୍ୟ ଦେଲେ, ତାହା ଆଧାରରେ ହିଁ ଆମକୁ ନିଜ ପାପଗୁଡ଼ିକର କ୍ଷମା ମିଳିପାରିବ । (ଏଫି. ୧:୭) କିନ୍ତୁ ବାଇବଲରେ ଲେଖାଅଛି, ‘ଈଶ୍ୱର ଆପଣା ସହିଷ୍ଣୁତାରେ ଲୋକମାନଙ୍କ ପୂର୍ବକୃତ ପାପସବୁ ଉପେକ୍ଷା [“କ୍ଷମା,” NWT] କରିଥିବାରୁ ନିଜ ଧାର୍ମିକତା ପ୍ରକାଶ କରିଛନ୍ତି ,’ ଅର୍ଥାତ୍‌ ଯୀଶୁଙ୍କ ମୁକ୍ତିର ମୂଲ୍ୟ ଦେବା ପୂର୍ବରୁ ଈଶ୍ୱର ଲୋକମାନଙ୍କ ପାପ କ୍ଷମା କଲେ । (ରୋମୀ. ୩:୨୫) କିନ୍ତୁ ପ୍ରଶ୍ନ ଉଠେ ଯେ ଯିହୋବା ଏହା କିପରି କଲେ ? କʼଣ ଏପରି କରିବା ତାଙ୍କ ନ୍ୟାୟର ସ୍ତର ଅନୁସାରେ ଠିକ୍‌ ଥିଲା ?

ଯେପରି ଯିହୋବା ଏହା ଭବିଷ୍ୟତବାଣୀ କରିଲେ ଯେ ଗୋଟିଏ “ବଂଶ” ଆସିବ ଯିଏ ମଣିଷମାନଙ୍କୁ ପାପ ଓ ମୃତ୍ୟୁରୁ ରକ୍ଷା କରିବ । ତାଙ୍କ ଦୃଷ୍ଟିରେ ଏହା ଏପରି ଥିଲା ଯେପରିକି ମୁକ୍ତିର ମୂଲ୍ୟ ଆଗରୁ ଦିଆଯାଇ ସାରିଛି । (ଆଦି. ୩:୧୫; ୨୨:୧୮) ଯିହୋବାଙ୍କୁ ପୂରା ଭରସା ଥିଲା ଯେ ସମୟ ଆସିଲେ ତାଙ୍କ ଏକମାତ୍ର ପୁତ୍ର ଖୁସି ଖୁସି ନିଜ ଜୀବନ ବଳିଦାନ କରିଦେବେ । (ଗାଲା. ୪:୪; ଏବ୍ରୀ ୧୦:୭-୧୦) ଯେବେ ଯୀଶୁ ପୃଥିବୀରେ ଥିଲେ ତେବେ ଯିହୋବା ତାଙ୍କୁ ଲୋକମାନଙ୍କ ପାପ କ୍ଷମା କରିବାର ଅଧିକାର ଦେଇଥିଲେ । କିନ୍ତୁ ସେ ସମୟ ଯାଏ ମୁକ୍ତିର ମୂଲ୍ୟ ଦିଆଯାଇ ନ ଥିଲା । ଯୀଶୁ କେଉଁ ଆଧାରରେ ପାପ କ୍ଷମା କରିପାରିଲେ ? ସେ ଜାଣିଥିଲେ ଯେ ଆଗକୁ ଯାଇ ଯେ କେହି ମୁକ୍ତିର ମୂଲ୍ୟ ଉପରେ ବିଶ୍ୱାସ କରିବେ, ତାଙ୍କ ପାପ କ୍ଷମା କରିଦିଆଯିବ । ତେଣୁ ସେ ସେହି ଲୋକମାନଙ୍କ ପାପ କ୍ଷମା କଲେ ଯେଉଁମାନେ ତାଙ୍କ ଉପରେ ବିଶ୍ୱାସ କଲେ ।—ମାଥି. ୯:୨-୬.