ସମସ୍ତଙ୍କ ସହ ଭଲ ସମ୍ପର୍କ କିପରି ଗଢ଼ିବା ?
ଈଶ୍ୱର ଆମକୁ ଭଲ ପରାମର୍ଶ ଦେଇଛନ୍ତି ଯାହାକୁ ମାନିବା ଦ୍ୱାରା ଆମେ ସମସ୍ତଙ୍କ ସହିତ ଭଲ ସମ୍ପର୍କ ଗଢ଼ିପାରିବା । ବହୁତ ଲୋକମାନଙ୍କୁ ଏହି ପରାମର୍ଶ ମାନିବା ଦ୍ୱାରା ଲାଭ ମିଳିଛି ସେମାନେ ପରିବାରରେ, କାମ ଜାଗାରେ ଓ ସାଙ୍ଗସାଥୀମାନଙ୍କ ସହିତ ଭଲ ସମ୍ପର୍କ ଗଢ଼ିପାରିଛନ୍ତି । ଆସନ୍ତୁ ଦେଖିବା ଈଶ୍ୱର ଆମକୁ କେଉଁ କେଉଁ ପରାମର୍ଶ ଦେଇଛନ୍ତି ?
ପରସ୍ପରକୁ କ୍ଷମା କରନ୍ତୁ
“ଯଦି କାହାରି କାହାରି ବିରୁଦ୍ଧରେ କୌଣସି କଥା ଥାଏ, ତେବେ ଏକକୁଆରେକ କ୍ଷମା କର ।”—କଲସୀୟ ୩:୧୩.
ଆମ ସମସ୍ତଙ୍କ ଦ୍ୱାରା ଭୁଲ ହୋଇଥାଏ । ବେଳେ ବେଳେ ଆମେ ଅନ୍ୟମାନଙ୍କୁ ଦୁଃଖ ପହଞ୍ଚାଉ ଆଉ ବେଳେ ବେଳେ ଅନ୍ୟମାନେ ଆମକୁ ଦୁଃଖ ପହଞ୍ଚାନ୍ତି । ତେଣୁ ଆମେ ପରସ୍ପରକୁ କ୍ଷମା କରିବା ଉଚିତ୍ । ଯେତେବେଳେ ଆମେ ଅନ୍ୟମାନଙ୍କୁ କ୍ଷମା କରୁ, ସେତେବେଳେ ଆମେ ତାଙ୍କୁ ରାଗି ନ ଥାଉ । ଆମେ “ମନ୍ଦ ବଦଳରେ କାହାରି ମନ୍ଦ” କରିବା ନାହିଁ ଏବଂ ତାଙ୍କ ଭୁଲଗୁଡ଼ିକୁ ତାଙ୍କୁ ବାରମ୍ବାର କହିବା ଉଚିତ୍ ନୁହେଁ । (ରୋମୀୟ ୧୨:୧୭) କିନ୍ତୁ ଅନେକଥର ଆମକୁ କାହାରି କଥା ଏତେ ଖରାପ ଲାଗେ ଯେ ତାହା ଆମେ ଭୁଲି ନ ଥାଉ ଓ ଆମକୁ ତାଙ୍କୁ କ୍ଷମା କରିବା ପାଇଁ କଷ୍ଟ ଲାଗିପାରେ । ସେତେବେଳେ ଆମେ କʼଣ କରିବା ଉଚିତ୍ ? ଆମେ ସେହି ବ୍ୟକ୍ତି ସହ ଏକୁଟିଆ କଥା ହେବା ଉଚିତ୍ । ଏପରି କଲେ ଆମ ସମ୍ପର୍କ ଆଗ ଭଳି ହୋଇଯିବ । ସେତେବେଳେ ଆମେ ପରସ୍ପରକୁ ଠିକ୍ ବା ଭୁଲ ପ୍ରମାଣ କରିବା ପାଇଁ ଚେଷ୍ଟା କରିବା ଉଚିତ୍ ନୁହେଁ ।—ରୋମୀୟ ୧୨:୧୮.
ନମ୍ର ହୁଅନ୍ତୁ ଓ ସମସ୍ତଙ୍କୁ ସମ୍ମାନ କରନ୍ତୁ
“ନମ୍ରଚିତ୍ତ ହୋଇ ପ୍ରତ୍ୟେକେ ଅନ୍ୟକୁ ଆପଣାଠାରୁ ଶ୍ରେଷ୍ଠ ମନେ କର ।”—ଫିଲିପ୍ପୀୟ ୨:୩.
ଆମେ ସମସ୍ତେ ଏପରି ଲୋକମାନଙ୍କ ସହିତ ସାଙ୍ଗ ହେବା ପାଇଁ ଚାହୁଁ ଯେଉଁମାନେ ନମ୍ର ଅଟନ୍ତି, ଅନ୍ୟମାନଙ୍କର ସମ୍ମାନ କରନ୍ତି ଏବଂ ସମସ୍ତଙ୍କ ସହିତ ଭଲ ବ୍ୟବହାର କରନ୍ତି । ଏପରି ଲୋକମାନେ ଜାଣିଶୁଣି କେବେ ବି ଅନ୍ୟମାନଙ୍କୁ ଦୁଃଖ ପହଞ୍ଚାନ୍ତି ନାହିଁ । ଯେଉଁମାନେ ଅନ୍ୟମାନଙ୍କଠାରୁ ନିଜକୁ ବଡ଼ ବୋଲି ଭାବନ୍ତି ଏବଂ ସବୁକିଛି ନିଜ ଅନୁସାରେ କରିବା ପାଇଁ ଚାହାନ୍ତି, ସେମାନଙ୍କ ସହିତ କେହି ବି ସାଙ୍ଗ ହେବା ପାଇଁ ଚାହାନ୍ତି ନାହିଁ ।
ଭେଦଭାବ କରନ୍ତୁ ନାହିଁ
‘ଈଶ୍ୱର ଯେ ଭେଦଭାବ କରନ୍ତି ନାହିଁ, କିନ୍ତୁ ପ୍ରତ୍ୟେକ ଜାତିରେ ଯେକେହି ତାହାଙ୍କୁ ଭୟ କରି ଧର୍ମାଚରଣ କରେ, ସେ ଯେ ତାହାଙ୍କ ନିକଟରେ ଗ୍ରାହ୍ୟ ହୁଏ, ଏହା ମୁଁ ସତ୍ୟ ବୁଝୁଅଛି ।’ —ପ୍ରେରିତ ୧୦:୩୪, ୩୫.
ଆମେ ଯେକୌଣସି ଦେଶ, ଭାଷା, ଧନୀ କିମ୍ବା ଗରିବ କିମ୍ବା ଆମ ରୂପରଙ୍ଗ ଯାହା ବି ଥାଉ ନା କାହିଁକି ଆମେ ସମସ୍ତେ ଈଶ୍ୱରଙ୍କ ଦୃଷ୍ଟିରେ ସମାନ ଅଟୁ । “ଏକ ବ୍ୟକ୍ତିଠାରୁ ସମସ୍ତ ମାନବଜାତି ସୃଷ୍ଟି କରିଅଛନ୍ତି,” ତେଣୁ ଆମେ ସମସ୍ତେ ଭାଇଭଉଣୀ ଅଟୁ । (ପ୍ରେରିତ ୧୭:୨୬) ଯେବେ ଆମେ ସମସ୍ତଙ୍କ ସହିତ ଭଲ ବ୍ୟବହାର କରୁ, ତେବେ ସେମାନେ ଖୁସି ହୁଅନ୍ତି ଏବଂ ଆମେ ମଧ୍ୟ ଖୁସି ହେଉ । ତାʼଠାରୁ ବଡ଼ କଥା ହେଉଛି ଯିଏ ଆମକୁ ସୃଷ୍ଟି କରିଛନ୍ତି, ତାଙ୍କ ହୃଦୟ ଖୁସି କରୁ ।
ଶାନ୍ତ ଓ କୋମଳ ସ୍ୱଭାବର ହୁଅନ୍ତୁ
‘ମୃଦୁତା ପରିଧାନ କର ।’—କଲସୀୟ ୩:୧୨.
ଯଦି ଆମେ କୋମଳ ସ୍ୱଭାବର ଥିବା, ତେବେ ଲୋକମାନେ ସହଜରେ ଆମ ସହିତ କଥା ହୋଇପାରିବେ । ଯଦି ଆମେ କିଛି ଭୁଲ କରିଥାଉ, ତେବେ ସେମାନେ ଆମକୁ କହିବାରେ ପଛଘୁଞ୍ଚା ଦେବେ ନାହିଁ, କାରଣ ସେମାନେ ଜାଣନ୍ତି ଆମେ ରାଗିବା ନାହିଁ, ବରଂ ଶାନ୍ତ ରହିବା । ଯେବେ କେହି ରାଗି ଯାଇ ଆମ ସହିତ ଖରାପ ବ୍ୟବହାର କରନ୍ତି, ଆଉ ଆମେ ଶାନ୍ତ ହୋଇ ଉତ୍ତର ଦେଉ, ତେବେ ସେମାନଙ୍କ ରାଗ ଶାନ୍ତ ହୋଇପାରେ । ଜଣେ ବୁଦ୍ଧିମାନ ବ୍ୟକ୍ତି କହିଥିଲେ, “କୋମଳ ଉତ୍ତର କ୍ରୋଧକୁ ଦମନ କରେ; ମାତ୍ର କଟୁ ବାକ୍ୟ କୋପ ଜନ୍ମାଏ ।”—ହିତୋପଦେଶ ୧୫:୧.
ଖୁସି ଖୁସି ଦେବାର ସ୍ୱଭାବ ବଢ଼ାନ୍ତୁ ଏବଂ କୃତଜ୍ଞତା ଦେଖାନ୍ତୁ
“ ‘ଗ୍ରହଣ କରିବା ଅପେକ୍ଷା ଦାନ କରିବା ଅଧିକ ଶ୍ରେୟସ୍କର ।’ ”—ପ୍ରେରିତ ୨୦:୩୫.
ଆଜି ଅନେକ ଲୋକ ବହୁତ ଲୋଭୀ ଏବଂ କେବଳ ନିଜ ବିଷୟରେ ଭାବନ୍ତି । କିନ୍ତୁ ଏହା ସତ ଯେ ପ୍ରକୃତ ଖୁସି ଅନ୍ୟମାନଙ୍କୁ ଖୁସି ଖୁସି ଦେବାରୁ ମିଳେ । (ଲୂକ ୬:୩୮) ଯେଉଁମାନଙ୍କ ହୃଦୟ ବଡ଼ ସେମାନେ ଜିନିଷଗୁଡ଼ିକ ଅପେକ୍ଷା ଲୋକମାନଙ୍କୁ ଅଧିକ ପ୍ରେମ କରନ୍ତି । ଯେବେ କେହି ତାଙ୍କୁ କିଛି ଦିଅନ୍ତି, ତେବେ ସେମାନେ କୃତଜ୍ଞତା ଦେଖାନ୍ତି ଏବଂ ହୃଦୟରୁ ଧନ୍ୟବାଦ ଦିଅନ୍ତି । (କଲସୀୟ ୩:୧୫) ଟିକେ ଭାବନ୍ତୁ, ଆପଣଙ୍କୁ କିଭଳି ବ୍ୟକ୍ତି ପସନ୍ଦ, ଯିଏ ଲୋଭୀ ନା ଯିଏ ଖୁସି ଖୁସି ଦିଏ ? ଯେଉଁମାନେ ଅନ୍ୟମାନଙ୍କୁ ଧନ୍ୟବାଦ ଦିଅନ୍ତି ନା ଯେଉଁମାନେ ବିଲକୁଲ୍ କୃତଜ୍ଞତା ଦେଖାନ୍ତି ନାହିଁ ? ତେବେ ଆସନ୍ତୁ ଆମେ ଖୁସି ଖୁସି ଦେବାର ସ୍ୱଭାବ ବଢ଼ାଇବା ଏବଂ ଅନ୍ୟମାନଙ୍କୁ ହୃଦୟରୁ ଧନ୍ୟବାଦ ଦେବା ।—ମାଥିଉ ୭:୧୨.