ଈଶ୍ୱର ପ୍ରଥମ ପୁରୁଷ ଏବଂ ପ୍ରଥମ ସ୍ତ୍ରୀକୁ ସୃଷ୍ଟି କଲେ

ଯିହୋବା ଏଦନ ନାମକ ଜାଗାରେ ଗୋଟିଏ ବଗିଚା କଲେ । ସେହି ବଗିଚାରେ ଅନେକ ଫୁଲ, ଗଛଲତା ଓ ପଶୁମାନେ ଥିଲେ । ତାʼପରେ ଈଶ୍ୱର ମାଟିରୁ ପ୍ରଥମ ପୁରୁଷ, ଆଦମର ଶରୀରକୁ ତିଆରି କଲେ ଏବଂ ତାʼର ନାକରେ ଶ୍ୱାସ ଫୁଙ୍କି ଦେଲେ । ଜାଣିଛ ତାʼପରେ କʼଣ ହେଲା ? ଆଦମ ଜୀବିତ ହୋଇଗଲା ! ଯିହୋବା ତାକୁ ଗୋଟିଏ କାମ ଦେଲେ । ସେ ତାକୁ କହିଲେ ଯେ ସେ ବଗିଚାର ଦେଖାଶୁଣା କରୁ ଏବଂ ସବୁ ପଶୁର ନାମ ରଖୁ ।

ଯିହୋବା ଆଦମକୁ ଗୋଟିଏ ନିୟମ ଦେଲେ ଯାହା ମାନିବା ବହୁତ ଜରୁରୀ ଥିଲା । ସେ ଆଦମକୁ କହିଲେ, ‘ତମେ ବଗିଚାର ସମସ୍ତ ଗଛର ଫଳ ଖାଇପାର, କେବଳ ଗୋଟିଏ ଗଛକୁ ଛାଡ଼ି ଯାହା ବହୁତ ଖାସ୍‌ ଅଟେ । ଯେଉଁ ଦିନ ତମେ ତାହା ଖାଇବ ସେହି ଦିନ ମରିଯିବ ।’

ପରେ ଯିହୋବା କହିଲେ, ‘ମୁଁ ଆଦମ ପାଇଁ ଗୋଟିଏ ସହକାରିଣୀ ସୃଷ୍ଟି କରିବି ।’ ସେ ଆଦମକୁ ଗଭୀର ନିଦରେ ଶୁଆଇ, ତାʼର ଗୋଟିଏ ପଞ୍ଜରା ନେଇ ସେଥିରୁ ଆଦମ ପାଇଁ ଗୋଟିଏ ସ୍ତ୍ରୀ ସୃଷ୍ଟି କଲେ । ତାʼର ନାମ ହବା ଥିଲା । ଆଦମ ଓ ହବାଠାରୁ ପ୍ରଥମ ପରିବାରର ଆରମ୍ଭ ହେଲା । ନିଜ ସ୍ତ୍ରୀକୁ ଦେଖି ଆଦମକୁ କିପରି ଲାଗିଲା ? ସେ ଏତେ ଖୁସି ହେଲା ଯେ ସେ କହିଲା, ‘ଦେଖ, ଯିହୋବା ମୋ ପଞ୍ଜରାରୁ କʼଣ ସୃଷ୍ଟି କଲେ ! ମୋ ଭଳି ଜଣେ ମଣିଷକୁ ସୃଷ୍ଟି କଲେ !’

ଯିହୋବା ଆଦମ ଓ ହବାକୁ କହିଲେ ଯେ ସେମାନେ ସନ୍ତାନ ଜନ୍ମ କରନ୍ତୁ ଏବଂ ସାରା ପୃଥିବୀକୁ ଭରି ଦିଅନ୍ତୁ । ସେ ଚାହୁଁଥିଲେ ଯେ ଆଦମ ଓ ହବା ମିଶି ସାରା ପୃଥିବୀକୁ ପାରଦୀଶ କରନ୍ତୁ ଏବଂ ଏହି କାମରୁ ଖୁସି ପାଆନ୍ତୁ । ପାରଦୀଶର ଅର୍ଥ ହେଉଛି ସୁନ୍ଦର ବଗିଚା, ଯେପରି ଏଦନ ବଗିଚା ଥିଲା । କିନ୍ତୁ ଈଶ୍ୱର ଯାହା ଚାହିଁଥିଲେ ସେପରି ହେଲା ନାହିଁ । କାହିଁକି ? ଏ ବିଷୟରେ ଆମେ ଆଗ ଅଧ୍ୟାୟରେ ଶିଖିବା ।