ଯେବେ ଇସ୍ରାଏଲୀୟ ଗୁପ୍ତଚର ଯିରୀହୋ ସହରକୁ ଗଲେ, ତେବେ ସେମାନେ ରାହାବ ନାମକ ଜଣେ ସ୍ତ୍ରୀର ଘରେ ରହିଲେ । ଏହି କଥା ଯିରୀହୋର ରାଜାଙ୍କୁ ଜଣା ପଡ଼ିଗଲା । ତେଣୁ ସେ ନିଜ ସୈନିକମାନଙ୍କୁ ରାହାବଙ୍କ ଘରକୁ ପଠାଇଲେ । ରାହାବ ଗୁପ୍ତଚରମାନଙ୍କୁ ଛାତରେ ଲୁଚାଇ ଦେଲେ ଏବଂ ସୈନିକମାନଙ୍କୁ ଅନ୍ୟ ବାଟକୁ ପଠାଇ ଦେଲେ । ରାହାବ ଗୁପ୍ତଚରମାନଙ୍କୁ କହିଲେ, ‘ମୁଁ ତମମାନଙ୍କ ସାହାଯ୍ୟ କରିବି କାରଣ ମୁଁ ଜାଣିଛି ଯେ ଯିହୋବା ତମମାନଙ୍କ ସହିତ ଅଛନ୍ତି ଏବଂ ତମେ ଏହି ଦେଶକୁ ବିଜୟ ହାସଲ କରିବ । ମୋତେ ପ୍ରତିଜ୍ଞା କର ଯେ ତମେମାନେ ମୋ ପରିବାରକୁ ବଞ୍ଚାଇବ ।’

ଗୁପ୍ତଚରମାନେ ରାହାବଙ୍କୁ କହିଲେ, ‘ଆମେ ପ୍ରତିଜ୍ଞା କରୁଛୁ ଯେ ଯେକେହି ତମ ଘର ଭିତରେ ଥିବ ସେମାନଙ୍କୁ କିଛି ହେବ ନାହିଁ ।’ ତାʼପରେ ସେମାନେ କହିଲେ, ‘ତମେ ନିଜ ଝରକାରେ ଗୋଟିଏ ଲାଲ ରଙ୍ଗର ରଶି ବାନ୍ଧିବ ଏବଂ ତମ ପରିବାରକୁ ରକ୍ଷା କରାଯିବ ।’

ରାହାବ ଗୁପ୍ତଚରମାନଙ୍କୁ ଗୋଟିଏ ରଶି ସାହାଯ୍ୟରେ ଝରକାରୁ ତଳକୁ ଓହ୍ଲାଇବା ପାଇଁ ସାହାଯ୍ୟ କଲେ । ସେମାନେ ପାହାଡ଼ ଆଡ଼କୁ ଚାଲିଗଲେ ଏବଂ ତିନି ଦିନ ଯାଏ ସେଠାରେ ଲୁଚି ରହିଲେ । ତାʼପରେ ସେମାନେ ଯିହୋଶୂୟଙ୍କ ପାଖକୁ ଫେରିଗଲେ । ଇସ୍ରାଏଲୀୟମାନେ ଯର୍ଦ୍ଦନ ନଦୀ ପାର କଲେ ଏବଂ କିଣାନ ଦେଶକୁ ଜିତିବା ପାଇଁ ପ୍ରସ୍ତୁତି କଲେ । ସବୁଠୁ ପ୍ରଥମେ ସେମାନେ ଯିରୀହୋ ସହରକୁ ଜିତିଲେ । ଜାଣିଛ କିପରି ? ଯିହୋବା ସେମାନଙ୍କୁ ଦିନକୁ ଥରେ ସହରର ଚାରିଆଡ଼େ ବୁଲିବା ପାଇଁ ଏବଂ ଏପରି ହିଁ ଛଅ ଦିନ ଯାଏ କରିବା ପାଇଁ କହିଲେ । ସପ୍ତମ ଦିନ ସେମାନେ ସାତ ଥର ସହରର ଚାରିଆଡ଼େ ବୁଲିଲେ । ଏହାପରେ ଯାଜକମାନେ ତୂରୀ ବଜାଇଲେ ଏବଂ ସୈନିକମାନେ ଉଚ୍ଚ ସ୍ୱରରେ ପାଟି କଲେ । ସେସମୟରେ ସହରର ପ୍ରାଚୀରଗୁଡ଼ିକ ଭୁଷୁଡ଼ି ପଡ଼ିଲା ! କିନ୍ତୁ ରାହାବଙ୍କ ଘର, ଯାହା ସହରର ପ୍ରାଚୀରରେ ଲାଗି ରହିଥିଲା, ଭାଙ୍ଗିଲା ନାହିଁ । ସେ ଓ ତାଙ୍କ ପରିବାର ବଞ୍ଚିଗଲେ କାରଣ ସେ ଯିହୋବାଙ୍କ ଉପରେ ଭରସା ରଖିଲେ ।

ଯିରୀହୋର ବିନାଶର ଖବର କିଣାନର ଅନ୍ୟ ଜାତିଗୁଡ଼ିକ ଯାଏ ପହଞ୍ଚିଗଲା । ସେମାନଙ୍କ ରାଜାମାନେ ନିଷ୍ପତ୍ତି ନେଲେ ଯେ ସେମାନେ ମିଶି ଇସ୍ରାଏଲୀୟମାନଙ୍କ ସହ ଲଢ଼ିବେ । କିନ୍ତୁ ଗିବିୟୋନୀୟ ଲୋକ ଅନ୍ୟ କିଛି ନିଷ୍ପତ୍ତି ନେଲେ । ସେମାନେ ଛିଣ୍ଡା ପୁରୁଣା କପଡ଼ା ପିନ୍ଧି ଯିହୋଶୂୟଙ୍କ ପାଖକୁ ଗଲେ । ସେମାନେ ତାଙ୍କୁ କହିଲେ, ‘ଆମେ ଦୂର ଦେଶରୁ ଆସିଛୁ । ଆମେ ଯିହୋବାଙ୍କ ବିଷୟରେ ଶୁଣିଛୁ ଏବଂ ଏହା ବି ଯେ ସେ ମିଶର ଓ ମୋୟାବରେ ତମମାନଙ୍କ ପାଇଁ କʼଣ କʼଣ କଲେ । ଆମକୁ ପ୍ରତିଜ୍ଞା କର ଯେ ତମେମାନେ ଆମ ଉପରେ ଆକ୍ରମଣ କରିବ ନାହିଁ । ତାʼପରେ ଆମେ ତମର ସେବକ ହୋଇଯିବା ।’

ଯିହୋଶୂୟ ତାଙ୍କ କଥାକୁ ସତ ଭାବି ସେମାନଙ୍କୁ ପ୍ରତିଜ୍ଞା କଲେ ଯେ ସେମାନେ ତାଙ୍କ ଉପରେ ଆକ୍ରମଣ କରିବେ ନାହିଁ । କିନ୍ତୁ ତିନି ଦିନ ପରେ ଯିହୋଶୂୟଙ୍କୁ ଜଣା ପଡ଼ିଲା ଯେ ସେମାନେ ଦୂର ଦେଶରୁ ନୁହେଁ ବରଂ କିଣାନ ଦେଶରେ ହିଁ ରହନ୍ତି । ଯିହୋଶୂୟ ସେମାନଙ୍କୁ ପଚାରିଲେ, ‘ତମେମାନେ ଆମକୁ ମିଛ କାହିଁକି କହିଲ ?’ ସେମାନେ କହିଲେ, ‘ଆମେ ବହୁତ ଡରି ଯାଇଥିଲୁ ! ଆମେ ଜାଣିଛୁ ତମ ଈଶ୍ୱର ଯିହୋବା ତମମାନଙ୍କ ତରଫରୁ ଲଢ଼ୁଛନ୍ତି । ଦୟାକରି ଆମକୁ ଛାଡ଼ି ଦିଅ, ଆମମାନଙ୍କୁ ମାର ନାହିଁ ।’ ଯିହୋଶୂୟ ନିଜ ପ୍ରତିଜ୍ଞା ପୂରା କଲେ ଏବଂ ଗିବିୟୋନୀୟମାନଙ୍କୁ ଜୀବିତ ଛାଡ଼ି ଦେଲେ ।

କିଛି ସମୟ ପରେ, ପାଞ୍ଚ ଜଣ କିଣାନୀୟ ରାଜା ନିଜ ସେନାକୁ ନେଇ ଗିବିୟୋନୀୟମାନଙ୍କୁ ଉପରେ ଆକ୍ରମଣ କରିବାକୁ ବାହାରି ପଡ଼ିଲେ । ଯିହୋଶୂୟ ଓ ତାଙ୍କ ସୈନିକମାନେ ଗିବିୟୋନୀୟମାନଙ୍କୁ ରକ୍ଷା କରିବା ପାଇଁ ରାତି ସାରା ଚାଲି ଚାଲି ଗଲେ । ତା ଆରଦିନ ସକାଳେ କିଣାନୀୟ ଓ ଇସ୍ରାଏଲୀୟମାନଙ୍କ ମଧ୍ୟରେ ଲଢ଼େଇ ଆରମ୍ଭ ହୋଇଗଲା । କିଣାନୀୟ ଲୋକ ଏଣେ ତେଣେ ପଳାଇବାକୁ ଲାଗିଲେ, କିନ୍ତୁ ସେମାନେ ଯେଉଁଠି ବି ପଳାଇଲେ ଯିହୋବା ସେମାନଙ୍କ ଉପରେ ବଡ଼ ବଡ଼ କୁଆପଥରର ବର୍ଷା କରିଲେ । ତାʼପରେ ଯିହୋଶୂୟ, ଯିହୋବାଙ୍କୁ କହିଲେ ଯେ ସେ ସୂର୍ଯ୍ୟକୁ ଅଟକାଇ ଦିଅନ୍ତୁ । କିନ୍ତୁ ଏହା ପୂର୍ବରୁ ସୂର୍ଯ୍ୟ କେବେ ବି ଅଟକି ନ ଥିଲା, ତାହେଲେ ଯିହୋଶୂୟ କାହିଁକି ଏପରି କରିବା ପାଇଁ ପ୍ରାର୍ଥନା କଲେ ? କାରଣ ତାଙ୍କୁ ଯିହୋବାଙ୍କ ଉପରେ ଭରସା ଥିଲା । ସୂର୍ଯ୍ୟ ଦିନ ସାରା ଅସ୍ତ ହେଲା ନାହିଁ । ତାହା ସେ ଯାଏ ଅଟକି ରହିଲା ଯେ ଯାଏ ଇସ୍ରାଏଲୀୟମାନେ କିଣାନୀୟ ରାଜାମାନଙ୍କୁ ଏବଂ ତାଙ୍କ ସେନାକୁ ପରାସ୍ତ କଲେ ନାହିଁ ।