ପାଠ ୨୩
ବାପ୍ତିସ୍ମ, ଯାହା ଅନେକ ଆଶିଷ ଆଣେ
ଯୀଶୁ ଶିଖାଇଥିଲେ ଯେ ଖ୍ରୀଷ୍ଟିୟାନମାନଙ୍କୁ ବାପ୍ତିସ୍ମ ନେବା ବହୁତ ଜରୁରୀ । (ମାଥିଉ ୨୮:୧୯, ୨୦ ପଢ଼ନ୍ତୁ ।) କିନ୍ତୁ ପ୍ରଶ୍ନ ହେଉଛି, ବାପ୍ତିସ୍ମ ନେବାର ଅର୍ଥ କʼଣ ? ଯଦି ଜଣେ ବ୍ୟକ୍ତି ବାପ୍ତିସ୍ମ ନେବାକୁ ଚାହେଁ, ତାହେଲେ ତାକୁ କʼଣ କରିବାକୁ ପଡ଼ିବ ?
୧. ବାପ୍ତିସ୍ମ କିପରି ଦିଆଯାଏ ?
ଶବ୍ଦ “ବାପ୍ତିସ୍ମ” ଯେଉଁ ଗ୍ରୀକ୍ ଶବ୍ଦରୁ ଆସିଛି, ତାʼ ଅର୍ଥ ହେଉଛି, ପାଣିରେ ପୂରାପୂରି “ଡୁବନ ଦେବା” କିମ୍ବା ପାଣିରେ ପୂରାପୂରି ବୁଡ଼ାଇବା । ଯେତେବେଳେ ଯୋହନ ଯର୍ଦ୍ଦନ ନଦୀରେ ଯୀଶୁଙ୍କୁ ବାପ୍ତିସ୍ମ ଦେଲେ, ସେ ତାଙ୍କୁ ପାଣିରେ ପୂରାପୂରି ବୁଡ଼ାଇ ବାହାର କରିଥିଲେ । ବାଇବଲରେ ଲେଖାଅଛି, ‘ଯୀଶୁ ଜଳରୁ ଉଠିଆସିଲେ ।’ (ମାର୍କ ୧:୯, ୧୦) ଠିକ୍ ସେହିଭଳି, ଆଜି ଯେତେବେଳେ ସତ୍ୟ ଖ୍ରୀଷ୍ଟିୟାନମାନେ ବାପ୍ତିସ୍ମ ନିଅନ୍ତି, ସେତେବେଳେ ସେମାନଙ୍କୁ ପାଣିରେ ପୂରାପୂରି ବୁଡ଼ାଇ ବାହାର କରାଯାଏ ।
୨. ବାପ୍ତିସ୍ମ ନେଇ ଜଣେ ବ୍ୟକ୍ତି କʼଣ ଦେଖାଏ ?
ବାପ୍ତିସ୍ମ ନେଇ ଜଣେ ବ୍ୟକ୍ତି ଦେଖାଏ ଯେ ସେ ଯିହୋବାଙ୍କୁ ନିଜ ଜୀବନ ସମର୍ପଣ କରିଛି । କିନ୍ତୁ ଜଣେ ବ୍ୟକ୍ତି ନିଜ ଜୀବନ ସମର୍ପଣ କିପରି କରେ ? ବାପ୍ତିସ୍ମ ନେବା ପୂର୍ବରୁ ସେ ଏକୁଟିଆ ପ୍ରାର୍ଥନା କରି ଯିହୋବାଙ୍କୁ ପ୍ରତିଜ୍ଞା କରେ ଯେ ସେ ଜୀବନସାରା ତାଙ୍କ ସେବା କରିବ, କେବଳ ତାଙ୍କର ଉପାସନା କରିବ ଏବଂ ନିଜ ଜୀବନରେ କେବଳ ତାଙ୍କର ହିଁ ଇଚ୍ଛା ପୂରଣ କରିବ । ସେ ନିଷ୍ପତ୍ତି ନିଏ ଯେ ସେ ‘ନିଜକୁ ଅସ୍ୱୀକାର କରିବ ଓ ଯୀଶୁଙ୍କର ଅନୁଗମନ କରିବ’ ଅର୍ଥାତ୍ ସେ ଯୀଶୁଙ୍କ କଥାଗୁଡ଼ିକ ମାନିବ ଓ ତାଙ୍କ ଭଳି ହେବା ପାଇଁ ଚେଷ୍ଟା କରିବ । (ମାଥିଉ ୧୬:୨୪) ସମର୍ପଣ କରିବା ପରେ ଆଉ ବାପ୍ତିସ୍ମ ନେଲା ପରେ ହିଁ ଜଣେ ବ୍ୟକ୍ତି ଯିହୋବାଙ୍କ ସହ ଓ ତାଙ୍କ ସେବକମାନଙ୍କ ସହ ଏକ ମଜବୁତ୍ ସମ୍ପର୍କ ଗଢ଼ିପାରେ ।
୩. ବାପ୍ତିସ୍ମ ନେବା ପାଇଁ ଜଣେ ବ୍ୟକ୍ତିକୁ କʼଣ କରିବାକୁ ପଡ଼ିବ ?
ବାପ୍ତିସ୍ମ ନେବା ପାଇଁ ଜଣେ ବ୍ୟକ୍ତିକୁ ଯିହୋବାଙ୍କ ବିଷୟରେ ଶିଖିବାକୁ ପଡ଼ିବ ଏବଂ ତାଙ୍କ ଉପରେ ନିଜ ବିଶ୍ୱାସ ବଢ଼ାଇବାକୁ ପଡ଼ିବ । (ଏବ୍ରୀ ୧୧:୬ ପଢ଼ନ୍ତୁ ।) ଯେତେ ବେଶି ସେ ଏପରି କରିବ ସେତେ ବେଶି ଯିହୋବାଙ୍କ ପ୍ରତି ତାʼର ପ୍ରେମ ବଢ଼ିବ । ଏହି ପ୍ରେମ ତାକୁ ଅନ୍ୟମାନଙ୍କୁ ଯିହୋବାଙ୍କ ବିଷୟରେ କହିବା ପାଇଁ ଏବଂ ଯିହୋବାଙ୍କ ସ୍ତର ଅନୁସାରେ ଚାଲିବା ପାଇଁ ସାହାଯ୍ୟ କରିବ । (୨ ତୀମଥି ୪:୨; ୧ ଯୋହନ ୫:୩) ଯେତେବେଳେ ସେ ଯିହୋବାଙ୍କ ‘ଯୋଗ୍ୟ ଆଚରଣ କରେ’ ଅର୍ଥାତ୍ ଏପରି ଜୀବନଯାପନ କରେ ଯେପରି ଯିହୋବା ନିଜ ସେବକମାନଙ୍କଠାରୁ ଚାହାନ୍ତି, ସେତେବେଳେ ସେ ସମର୍ପଣ କରିବା ପାଇଁ ଓ ବାପ୍ତିସ୍ମ ନେବା ପାଇଁ ନିଷ୍ପତ୍ତି ନେଇପାରିବ ।—କଲସୀୟ ୧:୯, ୧୦.a
ଭାବନ୍ତୁ ଓ ଶିଖନ୍ତୁ
ଜାଣନ୍ତୁ ଯେ ବାଇବଲରେ ଯୀଶୁଙ୍କ ବାପ୍ତିସ୍ମ ବିଷୟରେ ଯାହା କୁହାଯାଇଛି, ସେଥିରୁ ଆମେ କʼଣ ଶିଖିପାରିବା ଏବଂ ଯଦି ଜଣେ ବ୍ୟକ୍ତି ବାପ୍ତିସ୍ମ ନେବାକୁ ଚାହେଁ, ତାହେଲେ ତାକୁ କʼଣ କରିବାକୁ ପଡ଼ିବ ।
୪. ଯୀଶୁଙ୍କ ବାପ୍ତିସ୍ମ ବିଷୟରେ ଯାହା କୁହାଯାଇଛି, ସେଥିରୁ ଆମେ କʼଣ ଶିଖୁ ?
ଯୀଶୁଙ୍କ ବାପ୍ତିସ୍ମ ବିଷୟରେ ଅଧିକ ଜାଣିବା ପାଇଁ ମାଥିଉ ୩:୧୩-୧୭ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନଗୁଡ଼ିକ ଉପରେ ଆଲୋଚନା କରନ୍ତୁ:
କʼଣ ବାପ୍ତିସ୍ମ ନେବା ବେଳେ ଯୀଶୁ ଜଣେ ଶିଶୁ ଥିଲେ ?
ଯୀଶୁଙ୍କୁ କିପରି ବାପ୍ତିସ୍ମ ଦିଆଯାଇଥିଲା ? କʼଣ ତାଙ୍କ ମୁଣ୍ଡରେ ପାଣି ଢାଳି ବାପ୍ତିସ୍ମ ଦିଆଯାଇଥିଲା ?
ବାପ୍ତିସ୍ମ ନେବା ପରେ ଯୀଶୁ ଗୋଟିଏ ବିଶେଷ କାମ କରିବା ଆରମ୍ଭ କଲେ, ଯାହା ଯିହୋବା ତାଙ୍କୁ ଦେଇଥିଲେ । ଲୂକ ୩:୨୧-୨୩ ଓ ଯୋହନ ୬:୩୮ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନ ଉପରେ ଆଲୋଚନା କରନ୍ତୁ:
ବାପ୍ତିସ୍ମ ନେବା ପରେ ଯୀଶୁ କେଉଁ କାମକୁ ସବୁଠୁ ବେଶି ମହତ୍ତ୍ୱ ଦେଲେ ?
୫. ଆପଣ ବି ବାପ୍ତିସ୍ମ ନେଇପାରିବେ
ହୁଏତ ଆପଣ ଭାବୁଥିବେ, ‘ସମର୍ପଣ ଓ ବାପ୍ତିସ୍ମ ନେବା ତ ବହୁତ ବଡ଼ ନିଷ୍ପତ୍ତି । ମୋ ଦ୍ୱାରା ଏହା ହେବନି ।’ କିନ୍ତୁ ଯଦି ଆପଣ ଯିହୋବାଙ୍କ ବିଷୟରେ ଶିଖିବା ଜାରି ରଖିବେ ଓ ତାଙ୍କ ସହ ନିଜ ସମ୍ପର୍କ ମଜବୁତ୍ କରିବେ, ତାହେଲେ ଆପଣ ବାପ୍ତିସ୍ମ ନେବାର ନିଷ୍ପତ୍ତି ନେଇପାରିବେ । ଆସନ୍ତୁ ଦେଖିବା ଯେ କିଛି ଲୋକ କିପରି ନିଜ ଜୀବନରେ ଏହି ନିଷ୍ପତ୍ତି ନେଇପାରିଲେ । ଭିଡିଓ ଦେଖନ୍ତୁ ।
ଯୋହନ ୧୭:୩ ଓ ଯାକୁବ ୧:୫ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନ ଉପରେ ଆଲୋଚନା କରନ୍ତୁ:
ବାପ୍ତିସ୍ମ ନେବା ପାଇଁ ଜଣେ ବ୍ୟକ୍ତି କʼଣ କରିପାରିବ ?
୧. ସମର୍ପଣ କରିବା ପାଇଁ ଜଣେ ବ୍ୟକ୍ତି ଯିହୋବାଙ୍କୁ କହେ ଯେ ସେ ସବୁଦିନ ପାଇଁ ତାଙ୍କର ହିଁ ସେବା କରିବ
୨. ବାପ୍ତିସ୍ମ ନେଇ ଜଣେ ବ୍ୟକ୍ତି ଦେଖାଏ ଯେ ସେ ଯିହୋବାଙ୍କୁ ନିଜ ଜୀବନ ସମର୍ପଣ କରିଛି
୬. ବାପ୍ତିସ୍ମ ନେଲେ ଆପଣ ଯିହୋବାଙ୍କ ପରିବାରର ଏକ ସଦସ୍ୟ ହୋଇଯିବେ
ସାରା ଦୁନିଆରେ ଥିବା ଯିହୋବାଙ୍କ ସାକ୍ଷୀମାନେ ଏକ ପରିବାର ଭଳି ଅଟନ୍ତି । ଏହା ସତ ଯେ ସେମାନେ ଅଲଗା ଅଲଗା ଜାଗାରେ ରହନ୍ତି, ସେମାନଙ୍କର ସଂସ୍କୃତି ଓ ଭାଷା ମଧ୍ୟ ଅଲଗା । କିନ୍ତୁ ସେମାନେ ବାଇବଲର ଯେଉଁ ସ୍ତରଗୁଡ଼ିକୁ ମାନନ୍ତି ଏବଂ ଯେଉଁ ଶିକ୍ଷାଗୁଡ଼ିକ ଉପରେ ବିଶ୍ୱାସ କରନ୍ତି, ସବୁ ସମାନ । ବାପ୍ତିସ୍ମ ନେଲା ପରେ ଜଣେ ବ୍ୟକ୍ତି ଯିହୋବାଙ୍କ ପରିବାରର ଏକ ସଦସ୍ୟ ହୋଇଯାଏ । ଯାକୁବ ୨:୨୩ ଓ ୧ ପିତର ୨:୧୭ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନ ଉପରେ ଆଲୋଚନା କରନ୍ତୁ:
ଏହି ପଦଗୁଡ଼ିକ ଅନୁସାରେ, ବାପ୍ତିସ୍ମ ନେଲା ପରେ ଜଣେ ବ୍ୟକ୍ତିକୁ କʼଣ କʼଣ ଲାଭ ମିଳେ ?
କିଛି ଲୋକ କହନ୍ତି: “ମୁଁ ଏବେ ବାପ୍ତିସ୍ମ ନେଇପାରିବିନି ।”
ହୁଏତ ଆପଣଙ୍କୁ ବି ଏପରି ଲାଗୁଥିବ । ତଥାପି କʼଣ ଆପଣଙ୍କୁ ଲାଗେ ଯେ ବାପ୍ତିସ୍ମ ନେଲେ ଆପଣଙ୍କୁ ଅନେକ ଆଶିଷ ମିଳିବ ?
ଆମେ କʼଣ ଶିଖିଲୁ ?
ଯୀଶୁ ଶିଖାଇଥିଲେ ଯେ ଜଣେ ବ୍ୟକ୍ତିକୁ ତାଙ୍କର ଶିଷ୍ୟ ହେବା ପାଇଁ ବାପ୍ତିସ୍ମ ନେବାକୁ ପଡ଼ିବ । କିନ୍ତୁ ବାପ୍ତିସ୍ମ ନେବା ପାଇଁ ତାକୁ ଯିହୋବାଙ୍କ ଉପରେ ନିଜ ବିଶ୍ୱାସ ବଢ଼ାଇବାକୁ ପଡ଼ିବ, ତାଙ୍କ ସ୍ତର ଅନୁସାରେ ଚାଲିବାକୁ ପଡ଼ିବ ଏବଂ ନିଜ ଜୀବନ ତାଙ୍କୁ ସମର୍ପଣ କରିବାକୁ ପଡ଼ିବ ।
ଆପଣ କʼଣ କହିବେ ?
ବାପ୍ତିସ୍ମ କିପରି ଦିଆଯାଏ ଏବଂ ବାପ୍ତିସ୍ମ ନେବା କାହିଁକି ଜରୁରୀ ?
ସମର୍ପଣ କରିବା ଓ ବାପ୍ତିସ୍ମ ନେବାର ଅର୍ଥ କʼଣ ?
ସମର୍ପଣ କରିବା ଓ ବାପ୍ତିସ୍ମ ନେବା ପାଇଁ ଜଣେ ବ୍ୟକ୍ତିକୁ କʼଣ କରିବାକୁ ପଡ଼ିବ ?
ଅଧିକ ଜାଣନ୍ତୁ
ଜାଣନ୍ତୁ ଯେ ବାପ୍ତିସ୍ମ ନେବାର ଅର୍ଥ କʼଣ ।
ଆସନ୍ତୁ ଜାଣିବା ଯେ ଜଣେ ବ୍ୟକ୍ତି ବାପ୍ତିସ୍ମ ନେବା ପାଇଁ କʼଣ କରିପାରିବ ।
“ଯିହୋବାଙ୍କ ପ୍ରତି ପ୍ରେମ ଥିଲେ ଆପଣ ବାପ୍ତିସ୍ମ ନେବେ” (ପ୍ରହରୀଦୁର୍ଗ-ହି, ମାର୍ଚ୍ଚ ୨୦୨୦)
ଆସନ୍ତୁ ଜାଣିବା ଯେ ଜଣେ ବ୍ୟକ୍ତି କାହିଁକି ବାପ୍ତିସ୍ମ ନେଲେ ।
“ସେମାନେ ଚାହୁଁଥିଲେ ଯେ ମୁଁ ନିଜେ ଯାଞ୍ଚ କରିକି ଦେଖେ ଯେ ସତ୍ୟ କʼଣ” (ପ୍ରହରୀଦୁର୍ଗ ଲେଖା-ହି)
ଆମେ କାହିଁକି କହିପାରିବା ଯେ ବାପ୍ତିସ୍ମ ନେଲେ ଆମକୁ ଆଶିଷ ମିଳେ ଏବଂ ତାʼପାଇଁ ଆପଣ କିପରି ନିଜକୁ ପ୍ରସ୍ତୁତ କରିପାରିବେ ?