Hebreos

5 Po näꞌä rä jamfri mi pe̱ꞌtsi Enoc bi rꞌaꞌtsi pa himbi hyandä rä du, ꞌne hiñhabu̱ bi thini, ngeꞌä Äjuä go bi rꞌaꞌtsiꞌä; pe änte de geꞌä bi bädi ge Äjuä xki numäñhoꞌä. 6 ꞌNehe, hindä za gä johyabihu̱ rä koraso Äjuä mu̱ hindi pe̱ꞌspäbihu̱ rä komfiansa. Ngeꞌä toꞌo di joni ko Äjuä pe̱ꞌtsi te dä gamfri ge xa mäjuäni ꞌmu̱i, ꞌne ge di jäpi nuꞌu̱ o̱tꞌe ntsꞌe̱di po dä joni Kongeꞌä. 7 Po näꞌä rä jamfri mi pe̱ꞌtsi Noé, mꞌe̱fa de bi umbäbi Äjuä nꞌa rä adbertensia de nuꞌu̱ yä tꞌo̱tꞌe tobe himi nheki, bi ꞌñudi nꞌa rä hogä ntsu ꞌne bi hyoki nꞌa rä arka pa bi ñäni nuꞌu̱ mi ꞌmu̱i ha rä nguu; ꞌne po näꞌä rä jamfri bi kondenä rä xiꞌmhai, ꞌne bi zo̱ho̱ bi hñäni de gä erensia rä justisia po näꞌä rä jamfri mi pe̱ꞌtsi. 8 Po näꞌä rä jamfri mi pe̱ꞌtsi Abrahán, nuꞌmu̱ bi tsꞌohni, näꞌä bi yꞌo̱de ꞌne bi ma ha nꞌa rä luga habu̱ ma xä tꞌumbäbi de gä erensia; näꞌä bi bo̱ni bi ma, mäske himi pädi habu̱ ri ma. 17 Po näꞌä rä däta jamfri mi pe̱ꞌtsi Abrahán, ora bi thuꞌspäbi nꞌa rä prueba, bi ofrese Isaac ngu nꞌa rä ofrenda. Hää, näꞌä ñꞌo̱ho̱ xki tꞌumbäbi yä hogä promesa, bi trata dä ofrese näꞌä rä rꞌa tꞌu̱, 18 mäske xki tꞌembäbi: «Näꞌä ma dä tꞌembäbi ri rꞌoho, ma dä zo̱ho̱ dä nja po mäde de Isaac». 19 Pe näꞌä mi pädi ge Äjuä asta ma xä za xä gu̱tsꞌi de rä du, ꞌne näꞌä ꞌñenä bi resibi rä tꞌu̱ de rä du. 24 Po rä jamfri Moises, nuꞌmu̱ ya xki te, ya himbi ne bi tꞌembäbi ge mi geꞌä rä tꞌu̱ rä tꞌixu Faraon. 25 Näꞌä bi huahni bi tꞌu̱tsa ko rä hnini Äjuä ke dä johya po nꞌa hängutho yä pa ꞌne dä mꞌu̱i habu̱ mi ja yä tsꞌoki, 26 ngeꞌä pa geꞌä mänꞌa mi ja ndunthi rä muui dä sufri ngu näꞌä ma xä sufri rä Kristo, ke gatꞌho nuꞌu̱ yä tesoro mi ja ha Egipto, ngeꞌä himi häki de rä mfeni näꞌä njutꞌi ma xä tꞌumbäbi.