1 Pedro

5 Hänge, koꞌmu̱ nuga ꞌnehe dä anciano, ꞌne dä ntestigo de yä sufrimiento rä Kristo ꞌne di partisipa ha näꞌä rä nsu ma dä nheki mꞌe̱fa, nuga di bäntebi nuꞌu̱ yä anciano ꞌmu̱i entre geꞌähu̱: 2 Fadibihu̱ näꞌä rä taxo Äjuä xä nkargoꞌihu̱. Mfaxtehu̱ ngu yä superintendente, pe hingä ngeꞌä toꞌo di obligaꞌihu̱, sino de ri boluntase̱hu̱ ꞌne ko ngatꞌho ri ganähu̱ ante rä thandi Äjuä; hingä pa gi yꞌadihu̱ yä bojä, 3 nixi gi dominähu̱ sobre nuꞌu̱ toꞌo rä erensia Äjuä, sino gi tso̱hu̱ gi ñꞌejemplohu̱ de rä taxo. 4 ꞌNe xti ꞌñepu̱ näꞌä rä dängä mayꞌo, nuꞌähu̱ ma gi hñänihu̱ nꞌa rä koronä näꞌä nunka ma dä ꞌmaxhni. 5 Njabu̱ ꞌnehe, nuꞌähu̱ tsꞌu̱ntꞌu̱hu̱, yꞌo̱tehu̱ nuꞌu̱ yä ñꞌo̱ho̱ mänꞌa ja yä je̱ya. Pe nuꞌähu̱ gatꞌho, ñhehu̱ ko nꞌa rä hogä mfeni ꞌne ogi exä ri nsuhu̱ ora gi ñähu̱ ko märꞌaa. Ngeꞌä Äjuä di u̱tsa nuꞌu̱ yä ꞌñexmänsu, pe udi rä ñhojäꞌi ꞌne rä nhuekäte ko nuꞌu̱ hingä yä ꞌñexmänsu. 6 Hänge, ñꞌumiyase̱hu̱, hai de rä yꞌe̱ Äjuä, pa njabu̱ näꞌä dä ꞌñetsꞌä ri nsuhu̱ xti zo̱ho̱ rä tiempo, 7 mientra gi e̱mbäbihu̱ꞌä näꞌä te tupäꞌihu̱ ri mu̱ihu̱, ngeꞌä Näꞌä turämu̱i po geꞌähu̱. 10 Pe ꞌme̱fa de gi sufrihu̱ po nꞌa tu̱i rä tiempo, Äjuä näꞌä toꞌo xä rꞌakägihu̱ näꞌä rä mhäte hindi meresehu̱, Näꞌä toꞌo xä huankägihu̱ pa gä pe̱ꞌtsihu̱ nꞌa rä te pa nzäntho mähye̱gi ko rä Kristo, go geꞌä ma dä huati ri entrenämientohu̱. Go geꞌä ma dä maxꞌähu̱ pa hingi tagihu̱a, go geꞌä ma dä rꞌaꞌähu̱ rä tsꞌe̱di, ꞌne ma dä rꞌaꞌähu̱ nꞌa rä luga seguro pa dä za gi mꞌaihu̱ xä ñho ꞌne hingi njuenihu̱.