Juan

19 Hänge Pilato bi mända dä tsꞌitsꞌi rä Hesu pa dä tꞌumbäbi yä mfe̱i. 2 ꞌNe nuꞌu̱ yä soldado bi metꞌe nꞌa rä koronä de gä ꞌmini ꞌne bi hñuꞌspäbi ha rä ñäxu, ꞌne bi mantꞌuäbi ha rä ndoyꞌo nꞌa rä morado dutu, 3 ꞌne mi embäbi: «¡ꞌMu̱i ko rä johya rey de yä judío!». ꞌNe xa mi umbäbi yä mpe̱tgu. 4 Pilato bi bo̱ni mänꞌaki ꞌne bi ꞌñembäbi yä jäꞌi: «¡Yꞌo̱dehu̱! Di tsiñꞌähu̱ua mänꞌaki pa gi pähu̱ ge hinte mä tsꞌoki di timbäbi». 5 Oraꞌä rä Hesu bri ju̱ki ko näꞌä koronä de gä ꞌmini ꞌne näꞌä dutu de gä morado xki thuꞌspäbi. ꞌNepu̱ Pilato bi ꞌñenä: «¡Hyanthu̱! ¡ꞌMakua nunä ñꞌo̱ho̱!». 6 Pe ora nuꞌu̱ yä majhä mi gu̱tꞌi rä ꞌñuu ꞌne nuꞌu̱ yä ndä de gä soldado bi hyandi rä Hesu, nuꞌu̱ ko ndunthi rä kue̱ bi ꞌñenä: «¡Dä tsꞌu̱ti ha rä zaa! ¡Dä tsꞌu̱ti ha rä zaa!». Oraꞌä Pilato bi ꞌñenä: «Go dä tsixu̱ ꞌne tsu̱tihu̱ mu̱ gi nehu̱, nuga hinte mä tsꞌoki xtä timbäbi». 7 Nuꞌu̱ yä judío bi ꞌñenä: «Ja nꞌa mä leyhe näꞌä mää ge nuni debe dä du, ngeꞌä go di ñꞌetsꞌi ge rä tꞌu̱ Äjuä». 16 Mꞌe̱fa de geꞌä, näꞌä bi ntregabi rä Hesu pa go dä tsu̱tiꞌu̱ ha rä zaa. ꞌNe nuꞌu̱ yä jäꞌiꞌu̱ bi zixä rä Hesu. 17 Bi thuti näꞌä rä zaa habu̱ ma dä tsꞌu̱ti ꞌne bi tꞌe̱tꞌi ri ma ha näꞌä rä luga rä thuhu Calavera, ha rä idioma hebreo tꞌembäbi Gólgota. 18 Ja gehni bi tsꞌu̱ti ha rä zaa. ꞌNehe bi tsꞌu̱ti mä yoho yä ñꞌo̱ho̱; nꞌa ha kada nꞌa rä hyo ꞌne rä Hesu mi zu̱di mädetho. 33 Pe mi zo̱ni habu̱ mi zu̱di rä Hesu, nuꞌu̱ bi hyandi ge näꞌä ya xki du, hänge nuꞌu̱ ya himbi ꞌuakuäbi yä ua. 34 Pe nꞌa de nuꞌu̱ yä soldado bi su̱mbäbi ha rä hyo rä tiñä ko nꞌa rä lansa, ꞌne nguntꞌä bi bo̱ni rä ji ꞌne rä dehe. 35 ꞌNe näꞌä toꞌo bi hyandi go geꞌä mää, ꞌne hingrä nkꞌuamba, ꞌne näꞌä pädi xä ñho ge mäjuäni näꞌä mää, pa njabu̱ nuꞌähu̱ gi kamfrihu̱ ꞌnehe. 36 Gatꞌho geꞌä bi thogi pa njabu̱ bi kumpli näꞌä ya xki mängä rä Mäkä Tꞌofo habu̱ mää ge ninꞌa rä ndoyꞌo hingä ma xä thempäbi. 37 ꞌNehe, ha rä Mäkä Tꞌofo ya xki ꞌñenä: «Nuꞌu̱ ma dä hyandi näꞌä toꞌo bi su̱ni».