Hechos

27 Hänge nuꞌu̱ bi tsꞌitsꞌi ante yä tsꞌu̱tꞌhui mi fädi ngu rä Sanedrín. Oraꞌä näꞌä rä ndä gä majhä bi yꞌo̱tpäbi yä ntꞌani. 28 Bi ꞌñembäbiꞌu̱: «Dä proibiꞌihe gi sigi gi ꞌñudihu̱ po rä thuhu näꞌä rä ñꞌo̱ho̱ꞌä. Pe hingi ntiendehu̱ ꞌne ya xkä ñuꞌtsihu̱ gatꞌho Jerusalén ko näꞌä bi ꞌñudiꞌä. ꞌNe gi eñhu̱ ge go mä tsꞌokihe pa bi tho». 29 Pedro ꞌne nuꞌu̱ märꞌa yä apostol bi dädi: «Go ma gä o̱tehe Äjuä ngu mä gobernantehe hingä näꞌä go dä mängä yä jäꞌi. 30 Äjuä, näꞌä rä Zi Dada ndu mä xitahu̱ go geꞌä bi gu̱tsꞌi rä Hesu de rä du, näꞌä toꞌo gä hohu̱ ꞌne gä tsu̱tihu̱ ha nꞌa rä zaa. 31 Äjuä bi ꞌñespäbi rä nsu ꞌne bi hñutsꞌi de gä Dängä Lider ꞌne ngu nꞌa rä Ñänte, pa mu̱ dä arrepenti rä hnini Israel dä hñäni rä mpumbäte de nuꞌu̱ yä pekado. 32 ꞌNe nuje dyä testigohe de nuya yä tꞌo̱tꞌe, ꞌnehe ꞌmu̱i de gä testigo rä espiritu santo, näꞌä xä uni Äjuä pa nuꞌu̱ toꞌo o̱teꞌä ngu rä gobernante». 33 Mi yꞌo̱de njabu̱, nuꞌu̱ xa bi nkue̱ ꞌne asta mi ne dä hyoꞌu̱. 34 Pe nꞌa rä fariseo mrä thuhu Gamaliel —nꞌa rä xahnäte de rä Ley näꞌä mi ꞌme̱späbi ndunthi rä tꞌekꞌei— bi mꞌai de habu̱ mi hudi ꞌne bi mända dä tꞌe̱ni nꞌa rato nuꞌu̱ yä apostol. 35 ꞌNepu̱ bi ꞌñembäbi gatꞌho nuꞌu̱ mi huhni: «Ñꞌo̱ho̱hu̱ de Israel, hyanthu̱ xä ñho näꞌä gi beñhu̱ gi yꞌo̱tpäbihu̱ nuyu̱ yä ñꞌo̱ho̱. 36 Beñhu̱ ge bi mꞌu̱ nꞌa rä ñꞌo̱ho̱ mrä thuhu Teudas näꞌä mi gu̱tꞌi ngu 400 yä jäꞌi. Pe mi tho näꞌä jäꞌiꞌä, ja bi uapu̱tho ꞌne nuꞌu̱ yä de̱ni bi nxani habu̱räza. 37 Mꞌe̱fa de bi duꞌä, nubye̱ bi nju̱tsꞌi nꞌa rä me Galilea mrä thuhu Judas —ha nuꞌu̱ yä pa bi nja nꞌa rä censo—. Näꞌä ꞌnehe bi kadi ndunthi yä jäꞌi, pe mi du, ꞌnehe bi nxani nuꞌu̱ yä de̱ni ꞌne ja bi uapu̱tho. 38 Hänge di xiꞌähu̱ ge ogi xaxihu̱ nuyu̱ yä ñꞌo̱ho̱. Ngeꞌä mu̱ näꞌä pe̱fiyu̱ himbi ehe de Äjuä, ma dä uadi ngu nuꞌu̱ märꞌaa. 39 Pe mu̱ bi ehe de Äjuä, nuꞌähu̱ hingä ma dä za gi huatihu̱. ꞌNe ja rä ue̱nda ge go ma gi ntuñhu̱ ko Äjuä». 40 Hänge nuꞌu̱ bi yꞌo̱de näꞌä bi sipäbi ꞌne bi mända dä ju̱ꞌti mänꞌaki nuꞌu̱ yä apostol; bi tꞌumbäbi yä mfe̱ꞌi ꞌne bi mhändabi dä hye̱gi dä ꞌñudi po rä thuhu rä Hesu. ꞌNepu̱ nuꞌu̱ bi the̱gi mi ma. 41 Hänge nuꞌu̱ bi bo̱ni ndelante de rä Sanedrin, xa mi johyaꞌu̱ ngeꞌä nuꞌu̱ xki thahni pa dä thogi yä mꞌe̱tsa po ränge rä thuhuꞌä. 42 ꞌNe hyaxtho nuꞌu̱ himi tsaya ꞌne mi pa ha rä templo ꞌne ha yä nguu pa mi sigi mi ungä ntꞌo̱de nuꞌu̱ yä hogä notisia de rä Ñhesukristo.