Proverbios

2 Iho, mu̱ gi yꞌo̱de näꞌä di xiꞌi ꞌne gi balora näꞌä di mändaꞌi 3 mu̱ ko ngatꞌho ri tsꞌe̱di gi mafi pa gi adi gi pädi ndaꞌä xä ñho ꞌne ndaꞌä hinä, ꞌne mu̱ gi mafi ntsꞌe̱di pa gi adi dä nja ri juisio; 4 mu̱ gi sigi gi hyoni ngu thoni rä plata, ꞌne gi sigi xa gi honi ja ngu nuꞌmu̱ thoni nꞌa rä tesoro; 5 nuꞌmu̱ ma gi pädi gi pe̱ꞌtsuäbi rä hogä ntsu Jeoba, ꞌne ma gi tini näꞌä rä mfädi bi ehe de Äjuä. 6 Ngeꞌä Jeoba go geꞌä uni näꞌä xa mäjuäni rä mfädi; de rä ne po̱ni rä mfädi ꞌne xikägihu̱ ndaꞌä xä ñho ꞌne ndaꞌä hinä. 7 Näꞌä xä ꞌueke rä hogä mfädi pa nuꞌu̱ yꞌo mänjuäntho. ꞌNe Näꞌä mismo xä zo̱ho̱ xä nja ngu nꞌa rä däta escudo pa nuꞌu̱ nzäntho yꞌo ha rä ꞌñuu. 8 Näꞌä di bijila näꞌä rä ꞌñuu xä hyoki ko rä justisia ꞌne supäbi rä ꞌñuu nuꞌu̱ yꞌo mänjuäntho. 9 Njabu̱, nuꞌi ma gi pädi näꞌä xa mäjuäni rä justisia, ma gi pädi näꞌä rä ꞌñuu mänjuäntho habu̱ gatꞌho dri trata xä ñho, ꞌne ma gi hyandi ndaꞌä näꞌä rä ꞌñuu mänꞌa xä ñho 10 Ora dä zo ha ri koraso näꞌä rä mfädi di rꞌaꞌi, ꞌne dä zo̱ho̱ xa gi mädi näꞌä di utꞌäꞌi, 11 geꞌä ma dä maxꞌäꞌi pa gi usa ri mfeni ꞌne geꞌä ma dä bijilaꞌi. ꞋNehe, ma gi pädi gi hyandi ndaꞌä xä ñho ꞌne ndaꞌä hinä, ꞌne geꞌä ma dä suꞌäꞌi 12 ꞌne ma dä ñäñꞌäꞌi de näꞌä rä ꞌñuu xä ntsꞌo, ꞌne de näꞌä rä ñꞌo̱ho̱ pede yä nkꞌuamba, 13 ma dä ñäñꞌäꞌi de nuꞌu̱ yä jäꞌi di ꞌuege de näꞌä rä ꞌñuu mänꞌa xä ñho ꞌne go xä huahni dä ñꞌo ha näꞌä rä ꞌñuu xä mꞌe̱xui, 14 ma dä ñäñꞌäꞌi de nuꞌu̱ di ho dä yꞌo̱tꞌe rä ntsꞌomꞌu̱i ꞌne tini rä johya ho̱nse̱ nuꞌmu̱ pe̱fi yä tsꞌo tꞌo̱tꞌe̱, 15 ma dä ñäñꞌäꞌi de nuꞌu̱ yä jäꞌi yꞌo ha nuꞌu̱ yä ꞌñuu xä ntsꞌaki, ꞌne di ho dä de̱ni näꞌä rä ꞌñuu hingi pa mänjuäntho. 16 Näꞌä rä mfädi di rꞌaꞌi ma dä ꞌuekꞌäꞌi de näꞌä rä ꞌñuu xä ntsꞌo habu̱ yꞌo näꞌä rä tsꞌo ꞌme̱hñä. ꞌNehe ma dä ꞌuekꞌäꞌi de näꞌä rä tsꞌo ꞌme̱hñä xiꞌi yä noya mähotho ngeꞌä ne dä kadiꞌi. 18 Rä nguu tsitsꞌi ha rä du, ꞌne näꞌä rä ꞌñuu ri ma habu̱ xä zoo ꞌne xä dagi xä du märꞌaa,