1 Corintios

6 ¿Ja nꞌa de geꞌähu̱ toꞌo pe̱ꞌtsi nꞌa rä tuhni ko mä nꞌaa, ꞌne di atrebe dä ma ha yä autorida ko nuꞌu̱ yä jäꞌi hingi o̱tꞌe rä justisia, ꞌne hingä go pa ante nuꞌu̱ yä santo? 2 ¿O hingi pädihu̱ ge yä santo geꞌu̱ ma dä juzga rä xiꞌmhai? ꞌNe mu̱ nuꞌähu̱ go ma gi juzgahu̱ rä xiꞌmhai, ¿hage hingi tsa go gi juzgahu̱ nuꞌu̱ yä tꞌu̱kä asunto? 3 ¿Hingi pädihu̱ ge nuju̱ ma gä juzgahu̱ yä e̱nxe̱? Nuꞌmu̱, ¿por hanja hingä nuꞌu̱ yä asunto de nunä mꞌu̱i? 4 Mu̱ gi pe̱ꞌtsihu̱ rꞌa yä asunto nuꞌu̱ mähyoni drä juzga, ¿nuꞌu̱ yä jäꞌi hindi nhumäñho ha rä mhuntsꞌi go geꞌu̱ gi hutsꞌihu̱ de gä nzaya? 5 Di nzoꞌähu̱ pa gi ꞌme̱ ri tsahu̱. ¿Hage entre geꞌähu̱ joꞌo nꞌa rä ñꞌo̱ho̱ näꞌä ja rä mfädi pa dä juzga entre yä ku? 6 En lugar de geꞌä, ¡nꞌa rä ku pa ha yä autorida pa bi denunsia mä nꞌa rä ku, ꞌne ante yä da nuꞌu̱ hingä yä gamfri! 7 Nde, gi ꞌme̱dihu̱ ndunthi ora gi jahu̱ yä demanda nꞌa kontra mä nꞌaa. ¿Por hanja hingi he̱gihu̱ dä tꞌo̱tꞌähu̱ yä injustisia? ¿Por hanja hingi he̱gihu̱ dä fepꞌähu̱? 8 En lugar de geꞌä, ¡nuꞌähu̱ go gi o̱tꞌehu̱ yä injustisia ꞌne gi mpehu̱, ꞌne gi o̱tpäbihu̱ njabu̱ ri kuhu̱! 9 ¿Hage hingi pähu̱ ge nuꞌu̱ pe̱fi yä tsꞌo tꞌo̱tꞌe, hingä ma dä hñäni de gä erensia rä Tsꞌu̱tꞌhui Äjuä? Ogi ñhatꞌäse̱hu̱. Nuꞌu̱ yä ꞌñätsa ꞌne yä tsꞌu̱di jäꞌi o̱tꞌe yä pekado ko yä ndoyꞌo, nuꞌu̱ di xo̱kämbeni yä idolo, nuꞌu̱ toꞌo hatꞌi yä däme o yä ꞌme̱hñä, nuꞌu̱ yä ñꞌo̱ho̱ di ñꞌetꞌä ꞌme̱hñä, nuꞌu̱ yä ñꞌo̱ho̱ ꞌme̱ngui yä mi ñꞌo̱ho̱ui, 10 nuꞌu̱ yä be, nuꞌu̱ yä ambisioso, nuꞌu̱ di nti, nuꞌu̱ yä zante ꞌne nuꞌu̱ ñämäñꞌu̱ de märꞌaa, ꞌne nuꞌu̱ hämbäbi näꞌä pe̱ꞌtsi märꞌaa, hingä ma dä hñäni de gä erensia rä Tsꞌu̱tꞌhui Äjuä. 11 Pe rꞌa de geꞌähu̱ geꞌä rä mꞌu̱i ngi pe̱ꞌtsihu̱ mä mꞌe̱tꞌo. Pe nubye̱ xä su̱kꞌähu̱, xkä tꞌaxkihu̱ ꞌne po rä thuhu mä zi Hmuuhu̱ Ñhesukristo ꞌne rä espiritu Äjuä, nubye̱ xä thantꞌähu̱ ngu yä hogä jäꞌi. 18 ¡ꞌUegehu̱ de nuꞌu̱ yä pekado o̱tꞌe yä ꞌñätsa jäꞌi ko yä ndoyꞌo! Gatꞌho nuꞌu̱ yä pekado o̱tꞌe nꞌa rä jäꞌi, kohi thi de rä ndoyꞌo, pe toꞌo o̱tꞌe yä pekado ko rä ndoyꞌo, di peka kontra rä ndoyꞌose̱. 19 ¿Hage hingi pädihu̱ ge ri ndoyꞌohu̱ go geꞌä rä templo rä espiritu santo näꞌä ꞌmu̱i kongeꞌähu̱ ꞌne xkä hänihu̱ de Äjuä? ꞌNehe, ri tehu̱ ya hingo ri me̱tihu̱, 20 ngeꞌä nuꞌähu̱ bi thaiꞌihu̱ po nꞌa rä presio. Hänge, nsundahu̱ Äjuä ko ri ndoyꞌohu̱.