Lucas

12 ꞌNepu̱ bi ꞌñembäbi näꞌä rä ñꞌo̱ho̱ xki mbitabi: «Ora gi hoki nꞌa rä ñhuni o nꞌa rä ntꞌoxi, ogi zohni nuꞌu̱ ri amigo nixi nuꞌu̱ ri ku, nixi nuꞌu̱ ri pariente nixi nuꞌi ri besinu ja yä bojä. Ngeꞌä mu̱ gi pe̱fi njabu̱, nuꞌu̱ ꞌnehe ma dä ne dä mbitaꞌi nꞌa rä pa, ꞌne ya ho̱nse̱ꞌä ma gi tähä. 13 Hänge ora gi o̱tꞌä nꞌa rä ngo, mänꞌa dä hogi gi zohnä nuꞌu̱ yä zi hyoya, nuꞌu̱ yä zi tsꞌohnäte, nuꞌu̱ yä zi doua, nuꞌu̱ yä zi goda, 14 ꞌne gi nuhmä ge mänꞌa ma gi tini ndunthi rä johya, ngeꞌä nuꞌu̱ otho konte dä gutꞌäꞌi, ꞌne ri thähä ma gi hñäni näꞌä rä pa ma drä ju̱tsꞌi de rä du nuꞌu̱ yä hojäꞌi».