Jeremías

12 Gi ma ꞌne guä ungä ntꞌo̱de nuya yä noya po rä lado norte: »“«Pengi, oh tsꞌogäyꞌo̱de Israel —njabu̱ mängä Jeoba—. Nuga hingä ma gä nuꞌähu̱ ko rä kue̱, ngeꞌä nuga hindi fayaꞌihu̱ —njabu̱ mängä Jeoba—. Nuga hingä ma gä nkue̱ pa nzäntho kongeꞌähu̱. 13 Ho̱nse̱ rekonose ri tsꞌoki, ngeꞌä xkä no̱ꞌtuäbi Jeoba ri Zi Dada. Nuꞌi gä sigi gä ñꞌoui yä hyate zidada ha yä xudi yä däta arbol. Pe mä noya hingä ne gä o̱de» —njabu̱ mängä Jeoba”»—.