1 Corintios

6 Ogi ñꞌexmäsuhu̱. ¿Hage hingi pädihu̱ ge nꞌa tu̱i rä levadura japi dä netsꞌi gatꞌho rä ju̱ni? 7 Hñäkihu̱ näꞌä rä ze̱ lebadura, pa njabu̱ nuꞌähu̱ gi njahu̱ ngu nꞌa rä rꞌayꞌo ju̱ni näꞌä hinxä nzoi. Ngeꞌä rä Kristo, näꞌä mä zi de̱tihu̱ de gä paskua ya bri sacrifica. 9 Ha mä karta dä opꞌäꞌihu̱ ge gi hye̱gihu̱ de gi ntsitsꞌihu̱ ko nuꞌu̱ yä ꞌñätsa jäꞌi o̱tꞌe yä pekado ko yä ndoyꞌo, 10 hindi ne gä mää ge gi ꞌuegehu̱ de nuꞌu̱ yä ꞌñätsa jäꞌi o̱tꞌe yä pekado ko yä ndoyꞌo de nunä rä xiꞌmhai, o de nuꞌu̱ yä ambisioso jäꞌi ꞌne de nuꞌu̱ hämbäbi näꞌä pe̱ꞌtsi märꞌaa o xo̱kämbeni yä idolo. Mu̱ di njabu̱, xtä xiꞌähmähu̱ gi po̱nihu̱ de nunä rä xiꞌmhai. 11 Pe nubye̱ di opꞌäꞌihu̱ pa gä xiꞌähu̱ ge ya ogi ntsitsꞌihu̱ ko nꞌa rä jäꞌi näꞌä fädi ge rä ku, pe o̱tꞌe yä däta pekado ko rä ndoyꞌo, o rä ambisioso, o di xo̱kämbeni yä idolo, o rä zante, o di nti, o hämbäbi näꞌä pe̱ꞌtsi märꞌaa. Nisiquiera di debe gi ñunihu̱ kongeꞌä. 12 ¿Xi pa te go ma gä juzga nuꞌu̱ hingi pe̱päbi Äjuä? ¿Hanja hingo gi juzgahu̱ nuꞌu̱ ꞌmu̱i mbo ha rä mhuntsꞌi, 13 ꞌne gi hye̱gihu̱ ge Äjuä go dä juzga nuꞌu̱ hingi pe̱päbiꞌä? «Yꞌe̱nihu̱ de entre geꞌähu̱ näꞌä rä yꞌo̱tꞌä tsꞌoki».