1 Timoteo

3 Nuya yä noya mäjuäni: mu̱ nꞌa rä ñꞌo̱ho̱ o̱tꞌe ntsꞌe̱di po dä hñäni nꞌa rä responsabilida de gä anciano, xi nꞌa rä hogä ꞌme̱fi näꞌä ne dä zu̱di. 2 Nꞌa rä anciano pe̱ꞌtsi te dä uni nꞌa rä hogä ejemplo, di pe̱ꞌtsi nꞌadä rä ꞌme̱hñä, di jamäsu näꞌä pe̱fi ꞌne näꞌä mää, di ja rä juisio, drä ordenädo, di pädi dä ungä ntsaya, di pädi dä ꞌñudi xä ñho, 3 hingä nꞌa rä tixfani, hingä rä bo̱ka nixi rä mu̱nte, udi ge pädi dä ntiende, hingä rä hyongä tuhni nixi hingä rä kꞌatꞌä bojä. 4 Di pädi dä gu̱ꞌtuäbi rä ꞌñuu ꞌne dä diriji xä ñho rä familia, ꞌne di pädi dä educa yä bätsi ngu ri ꞌñehe 5 (ngeꞌä mu̱ nꞌa rä ñꞌo̱ho̱ hingi pädi dä diriji rä familia, ¿hanja ma dä za dä supäbi rä mhuntsꞌi Äjuä?). 6 Hingä nꞌa rä ñꞌo̱ho̱ näꞌä ja penä xä nkristianu, pa hindä ñꞌexmänsu ꞌne dä tꞌumbäbi näꞌä rä kastigo bi tꞌumbäbi rä Diablo. 7 ꞌNehe, mähyoni ge asta nuꞌu̱ hingä yä gamfri dä hyandi ge näꞌä tsitsꞌi nꞌa rä mꞌu̱i ngu di mända Äjuä, pa njabu̱ hinto dä ñä xä ntsꞌo de geꞌä ꞌne hindä zoo ha nꞌa de nuꞌu̱ yä trampa xä me̱gi rä Diablo. 8 Yä siervo ministerial, ꞌnehe debe dä nresponsable ꞌne dä bädi dä dähä rä tꞌekꞌei, hindi debe drä majäne, hindä zi ndunthi yä binu, hindä ñꞌambisioso nixi dä ñhate kontal te dä dähä. 9 Sino ke nzäntho di debe dä yꞌo̱tꞌe nguenda näꞌä rä jamfri pe̱ꞌtsi ngu nꞌa rä mäkä secreto, ꞌne dä me̱ꞌtsi nꞌa rä mfeni xä ntꞌaxi. 10 Pe mꞌe̱tꞌo debe dä thandi xä ñho mu̱ dä za dä mfaxte o hinä; ꞌne mu̱ otho de te drä akusabi, nuꞌmu̱ hyopäbihu̱ dä mfaxte. 11 Yä ꞌme̱hñä ꞌnehe debe dä nresponsable ꞌne hingä dyä kꞌuamba nixi dyä ꞌñetsäte. Debe dä jamäsu näꞌä pe̱fi ꞌne näꞌä mää, ꞌne hindä ꞌuengi de näꞌä xä ñho. 12 Yä siervo ministerial di debe dä me̱ꞌtsi nꞌadä rä ꞌme̱hñä, ꞌne dä bädi dä gu̱ꞌtuäbi rä ꞌñuu ꞌne dä diriji xä ñho yä bätsi ꞌne rä familia. 13 Ngeꞌä nuꞌu̱ yä ñꞌo̱ho̱ pe̱päbi xä ñho Äjuä, tähä rä respeto ꞌne ja rä tsꞌe̱di näꞌä mää ora udi de Ñhesukristo.