«Bi uni rä mpumbäte po nuꞌu̱ yä tsꞌoki de mäyaꞌmu̱»

Ho̱nse̱ näꞌä rä njutꞌi bi uni rä Hesu nuꞌmu̱ bi ungä rä bida, geꞌä dä za dä goꞌmi mä pekadohu̱ (Efes. 1:7). Mäske njabu̱, rä Mäkä Tꞌofo enä ge dende änte, Äjuä «bi uni rä mpumbäte po nuꞌu̱ yä tsꞌoki de mäyaꞌmu̱» (Rom. 3:​25, TNM). Nuya yä noya signifika ge rä Zi Dada Jeoba bi mu̱di bi pumbäbi yä tsꞌoki yä mexiꞌmhai dende änte de xä ungä rä bida rä Hesu. Pe mu̱ tobe hixki ungä rä bida rä Hesu, ¿por hanja rä Mäkä Tꞌofo enä ge rä Zi Dada Jeoba bi pumbäbi yä tsꞌoki yä jäꞌi dende änte?

Nuꞌmu̱ rä Zi Dada Jeoba bi promete ge toꞌo ma xpä pe̱hni pa xä ñäni yä mexiꞌmhai; pa Geꞌä, dende näꞌä oraꞌä ꞌñenä go ya bi uni näꞌä njutꞌiꞌä (Gén. 3:15; 22:18). Jeoba hinte mä duda mi pe̱ꞌtsi ge xti zo̱ho̱ rä ora, rä Tꞌu̱ ma xä mꞌu̱i dispuesto xä da rä bida pa xä uni näꞌä rä njutꞌiꞌä (Gál. 4:4; Heb. 10:​7-10). Nuꞌmu̱ bi mꞌu̱kua rä Hesu ha rä Xiꞌmhai ngu rä representante rä Zi Dada Jeoba, mäske tobe himi unitho rä bida, näꞌä ya xki tꞌumbäbi rä autorida pa dä pumbäbi yä tsꞌoki nuꞌu̱ yä jäꞌi mi kamfribi. Hää, rä Hesu ya mi usa näꞌä rä balo mi pe̱ꞌtsi näꞌä rä bida ma xä uni mꞌe̱fa (Mat. 9:​2-6).