Äjuä bi mu̱di bi hyoki yä tꞌo̱tꞌe

GATꞌHO yä hogä tꞌo̱tꞌe bi ehe de Äjuä. Näꞌä bi hyoki rä Hyadi pa dä rꞌakägihu̱ rä ñotꞌi de gä pa, rä Zänä ꞌne yä tso̱o̱ pa dä rꞌakägihu̱ rä ñotꞌi de gä xui. ꞌNehe, bi hyoki rä Xiꞌmhai pa dä za gä ꞌmu̱ihu̱.

Pe rä Hyadi, rä Zänä, yä tso̱o̱ ꞌne rä Xiꞌmhai hingä gehyu̱ yä mu̱di tꞌo̱tꞌe bi hyoki Äjuä. ¿Gi pädi te bi hyoki mꞌe̱tꞌo Äjuä? Bi hyoki rꞌa yä e̱nxe̱ nguꞌä. Rä Mäkä Tꞌofo mää ge nuyu̱ yä e̱nxe̱ hingi tsa gä handihu̱ ja ngu hingi tsa gä handihu̱ Äjuä. ¿Pate bi hyoki Äjuä yä e̱nxe̱? Äjuä bi hyoki yä e̱nxe̱ pa dä ꞌmu̱i kongeꞌä ha mähetsꞌi.

Näꞌä rä mu̱di e̱nxe̱ bi hyoki, geꞌä rä mu̱di Tꞌu̱ Äjuä, ꞌne Äjuä xa mi mädi. Näꞌä bi mpe̱fi ko rä Dada. Bi matsꞌi Äjuä dä hyoki gatꞌho nuꞌu̱ märꞌa yä tꞌo̱tꞌe. Bi matsꞌi bi hyoki rä Hyadi, rä Zänä, yä tso̱o̱ ꞌne rä Xiꞌmhai.

Nuꞌmu̱, ¿hanja mi nja rä Xiꞌmhai? Ri mu̱di himi tsa to dä mꞌu̱i. Mi ja se̱he̱ nꞌa rä däta ndehe näꞌä mi koꞌmi gatꞌho rä Xiꞌmhai. Pe Äjuä mi ne ge yä jäꞌi dä mꞌu̱i ha rä Xiꞌmhai. Hänge bi mu̱di bi hyoki pa gekhu̱. ¿Te bi me̱fi?

Mꞌe̱tꞌo, ha rä Xiꞌmhai mi ja mꞌe̱di rä ñotꞌi. Hänge Äjuä bi japäbi rä Hyadi dä yotꞌi ha rä Xiꞌmhai. Bi jabu̱ pa bi zo̱ho̱ bi nja rä xui ꞌne rä pa. Mꞌe̱fa bi japi bi bo̱tsꞌe rä hai de ha rä dehe.

Ri mu̱di, hinte mi ja ha rä hai. ꞌÑenä nunä rä kꞌoi gi handi nuua. Mi otho yä do̱ni, yä zaa nixi yä zuꞌue. Himi ja yä peskado ha rä dehe. Äjuä mi ja ndunthi te dä me̱fi pa njabu̱ yä zuꞌue ꞌne yä jäꞌi dä me̱ꞌtsi nꞌa rä mꞌu̱i xa mähotho ha rä Xiꞌmhai.