Nꞌa rä uädri xa mähotho

¡HYANDI rä Xiꞌmhai! ¡Xa mähotho gatꞌho! Hyandi yä tꞌe̱i ꞌne yä zaa, yä do̱ni ꞌne gatꞌho yä zuꞌue. ¿Gi handi habu̱ ꞌmai yä elefante ꞌne yä zate?

¿Toꞌo bi hyoki nunä rä uädri mähotho? Äjuä. Ma gä handihu̱ hanja Äjuä bi hyoki rä Xiꞌmhai pa gä ꞌmu̱ihu̱.

Mꞌe̱tꞌo, Äjuä bi hyoki yä tꞌe̱i pa bi goꞌmi rä hai. ꞌNe bi hyoki gatꞌho yä zi do̱ni ꞌne yä zaa. Gatꞌho nuya yä tꞌo̱tꞌe japi dä nheki xa mähotho gatꞌho rä Xiꞌmhai. Pe hingä se̱he̱ꞌä. Ndunthi de gehyu̱ ꞌnehe di rꞌakägihu̱ te gä tsihu̱.

Mꞌe̱fa bi hyoki yä peskado pa dä mꞌu̱ ha rä dehe ꞌne yä tsꞌintsꞌu̱ pa dä ñhatsꞌi ha mähetsꞌi. Bi hyoki yä tsatꞌyo, yä mixi ꞌne yä fani; bi hyoki yä däta zuꞌue ꞌne yä tꞌu̱kä zuꞌue. ¿Te mä zuꞌue ꞌmu̱i getbu̱ ha ri nguu? ¡Xa rä hojäꞌi Äjuä ngeꞌä bi hyoki gatꞌho yä tꞌo̱tꞌe pa nuju̱!

Rä ngätsꞌi, Äjuä bi huahni nꞌa xe̱ni rä hai de ha rä Xiꞌmhai pa mänꞌa bi hyoki xa mähotho. ꞌNe bi ꞌñembäbi rä uädri Eden. Hinte mi ꞌme̱päbi nunä rä uädri. Gatꞌho yä tꞌo̱tꞌe xa mi neki tsꞌu̱ngänza. ꞌNe Äjuä mi ne ge gatꞌho rä Xiꞌmhai dä zo̱ho̱ dä nja ngu nunä rä uädri xki hyoki.

Pe hyandi mänꞌaki nunä rä kꞌoi. ¿Gi pädi te bi hyandi Äjuä ge mi ꞌme̱päbi nunä rä uädri? Ma gä handihu̱.