Bi mu̱di nꞌa rä mꞌu̱i xä ñhei

MꞌE̱FA de bi jui de ha rä uädri Eden, rä Adan ꞌne rä Eba bi me̱ꞌtsi xi ndunthi yä xuñha. Nubye̱, pe̱ꞌtsi te bi mpe̱fi pa bi ñuni. Änte dä jui de ha rä uädri mi ja yä fruta mähotho, pe nubye̱ se̱he̱ mi handi yä ꞌmini ꞌne yä peꞌmni ha rä Xiꞌmhai. Geꞌä bi thogi rä Adan ꞌne rä Eba ngeꞌä himbi yꞌo̱te Äjuä ꞌne bi ꞌme̱di näꞌä rä hogä ntsitsꞌi mi pe̱ꞌtsi Kongeꞌä.

Pa ri uadi, rä Adan ꞌne rä Eba bi mu̱di bi du. Beni: Äjuä bi ꞌñembi ge ma xä du mu̱ xä zi näꞌä rä fruta xki xipi ge hindä zi. Näꞌä rä pa bi zi näꞌä rä fruta geꞌä rä pa bi mu̱di bi du. ¡Xi yä nda dondo ngeꞌä himbi yꞌo̱te Äjuä!

Gatꞌho nuꞌu̱ yä bätsi rä Adan ꞌne rä Eba, bi mꞌu̱i mꞌe̱fa de nuꞌmu̱ Äjuä ya xki gui rä Adan ꞌne rä Eba de ha rä uädri Eden. Hänge gatꞌho nuꞌu̱ yä bätsi ꞌnehe ma xä zo̱ho̱ xä nxita ꞌne ma xä du.

Mu̱ rä Adan ꞌne rä Eba xä yꞌo̱te rä Zi Dada Jeoba, nuꞌu̱ ꞌne yä bätsi ma xä me̱ꞌtsi nꞌa rä hogä mꞌu̱i ko ndunthi rä johya. Ma xä za xä mꞌu̱i pa nzäntho ko rä johya ha rä Xiꞌmhai. Yä jäꞌi hingä ma xä nxita, hingä ma xä ñheni ꞌne hingä ma xä du.

Äjuä ne ge yä jäꞌi dä mꞌu̱i pa nzäntho ko rä johya, ꞌne mää ge nꞌa rä pa ma dä njabu̱. Ma dä nja xa mähotho gatꞌho rä Xiꞌmhai, ꞌne yä jäꞌi hingä ma dä ñheni. Gatꞌho yä jäꞌi ma dä ntsitsꞌi, ꞌne ma dä me̱ꞌtsi nꞌa rä hogä ntsitsꞌi ko Äjuä.

Pe rä Eba xki ꞌme̱di näꞌä rä hogä ntsitsꞌi mi pe̱ꞌtsi ko Äjuä. Hänge nubye̱, rä Eba bi me̱ꞌtsi ndunthi yä xuñha pa bi za bi mꞌu̱i yä bätsi. Mi pe̱ꞌtsi ndunthi yä u̱gi. Hää, rä Eba himbi yꞌo̱te Jeoba, hänge bi me̱ꞌtsi ndunthi yä dumu̱i, ¿hänge hää?

Rä Adan ꞌne rä Eba bi me̱ꞌtsi ndunthi yä tꞌu̱ ꞌne yä tꞌixu. Näꞌä rä mu̱di tꞌu̱ bi me̱ꞌtsi bi ꞌñembi rä Kain. Näꞌä rä yoho rä bätsi bi ꞌñembi rä Abel. ¿Gi pädi te bi thogi kongeꞌu̱?