Bi mꞌai rä Hyadi

HYANDI rä Josue. Bi ꞌñembäbi rä Hyadi: “¡Hyadi, ja dä kohibu̱!”. Näꞌä rä Hyadi himbi ñꞌo. Jeoba bi japi rä Hyadi bi gohi mäde de mähetsꞌi po 24 yä ora. Pe ma gä handihu̱ por hanja rä Josue hingi ne ge dä ñꞌo rä Hyadi.

Mi mu̱di bi ntuhni nuꞌu̱ ku̱tꞌa yä bo̱ka ndä de rä hnini Kanään kontra rä hnini Gabaon, nuꞌu̱ yä gabaonita bi me̱hni nꞌa rä ñꞌo̱ho̱ pa dä yꞌapäbi rä mfatsꞌi rä Josue ꞌne bi ꞌñembäbi: “¡Nguntꞌä guä ehe! ¡Ñängägihe! Gatꞌho nuꞌu̱ yä ndä yä me tꞌo̱ho̱ bi ntunkui nuꞌu̱ ri ꞌme̱go”.

Nubye̱, rä Josue ꞌne nuꞌu̱ yä soldado nguntꞌä bi ma. Bi ñꞌo gatꞌho rä xui. ꞌNe mi zo̱ni ha Gabaon, yä soldado de nuꞌu̱ ku̱tꞌa yä ndä, xi bi ntsu ꞌne bi mu̱di bi nextꞌi. Nubye̱, Jeoba bi japäbi bi dagi de mähetsꞌi yä däta ndo ꞌne bi hyo xi ndunthi yä soldado ke nuꞌu̱ xki hyo nuꞌu̱ yä soldado rä Josue.

Rä Josue mi pädi ge nguntꞌä ma xä yu̱i rä Hyadi. ꞌNe xti mꞌe̱xui, ndunthi de nuꞌu̱ yä soldado mi ntunkui ma xä nextꞌi xä ma. Hänge rä Josue bi xatuäbi Jeoba ꞌne bi ꞌñembäbi rä Hyadi: “¡Hyadi, ja dä kohibu̱!”. Rä Hyadi bi mꞌai, ꞌne njabu̱ yä israelita bi za bi dähä näꞌä rä tuhni.

Mi ꞌmu̱ mä ndunthi yä ndä de Kanään nuꞌu̱ mi u̱tsabi rä hnini Äjuä. Bi zitsꞌi rꞌato yä je̱ya pa njabu̱ rä Josue ꞌne nuꞌu̱ yä soldado bi däpäbi 31 yä ndä de rä hnini Kanään. Mi uadi bi hñäni rä hnini Kanään, rä Josue bi heke näꞌä rä hai pa nuꞌu̱ yä tꞌu̱kä hnini de Israel himi ja yä hai.

Bi thogi ndunthi yä je̱ya, ꞌne rä Josue bi du, mi pe̱ꞌtsi 110 yä je̱ya. Nuꞌmu̱ mi te rä Josue ꞌne nuꞌu̱ yä ntsitsꞌi, yä israelita mi o̱te Jeoba. Pe nuꞌmu̱ bi du nuyu̱, yä israelita bi mu̱di bi me̱fi yä tsꞌo tꞌo̱tꞌe ꞌne bi me̱ꞌtsi ndunthi yä xuñha. Nubye̱ hää mi japä mꞌe̱di rä mfatsꞌi Äjuä.