Jedeon ꞌne nuꞌu̱ 300 yä soldado

¿GI HANDI te thogi ha nunä rä kꞌoi? Nuyu̱ yä soldado yä me Israel. Hyandi nuyu̱ yä ñꞌo̱ho̱ tsithe. Jedeon, näꞌä rä nzaya, ꞌmai getbu̱ de gehyu̱ pa handi nuyu̱ yä ñꞌo̱ho̱ hanja tsithe.

Hyandi hanja tsithe kada nꞌa de nuyu̱ yä ñꞌo̱ho̱. Rꞌaa di ndandiñähmu ꞌne di yuki pa tsithe. Pe nꞌa de gehyu̱, ko rä yꞌe̱ hätsꞌi rä dehe ha rä ne, pa njabu̱ tsa dä ñhani. Geꞌä mähyoni dä me̱fi, ngeꞌä Jeoba xä ꞌñembäbi rä Jedeon ge dä huahni ho̱nse̱ nuꞌu̱ yä ñꞌo̱ho̱ tsithe pe di sigi di ñhani. Nuꞌu̱ hindi ja njabu̱, pe̱ꞌtsi te dä mengi ha yä nguu. Ma gä handihu̱ por hanja.

Yä israelita mänꞌaki pe̱ꞌtsi ndunthi yä xuñha ngeꞌä hinxä yꞌo̱te Jeoba. Yä mädianita mänꞌa xä nja yä tsꞌe̱di ke geꞌu̱ hänge mi o̱ꞌtuäbi ndunthi yä ntsꞌomꞌu̱i. Nubye̱, yä israelita bi yꞌapäbi rä mfatsꞌi Jeoba, ꞌne rä Zi Dada Jeoba, hää bi yꞌo̱de ꞌne bi matsꞌi.

Jeoba bi ꞌñembäbi rä Jedeon ge dä hyoni yä soldado, hänge rä Jedeon bi muntsꞌi 32,000 yä soldado. Ha nuꞌu̱ yä nkontra mi 135,000 yä soldado. Pe Jeoba bi ꞌñembäbi rä Jedeon: “Gi pe̱ꞌtsi xi ndunthi yä soldado”. ¿Por hanja bi mängä njabu̱?

Ngeꞌä mu̱ yä israelita xä dähä näꞌä rä tuhni, xä za xä ꞌñenä ge xki dähäse̱ näꞌä rä tuhni, ge himi honi rä mfatsꞌi Jeoba pa dä ntäte. Hänge Jeoba bi ꞌñembäbi rä Jedeon: “Xipi gatꞌho nuꞌu̱ tsu ge dä mengi ha yä nguu”. Rä Jedeon bi jabu̱ ꞌne 22,000 nuꞌu̱ yä soldado bi mengi ha yä nguu. Bi gohi se̱he̱ 10,000 yä soldado pa dä ntuhni kontra nuꞌu̱ 135,000 yä soldado.

Pe yꞌo̱de te bi mängä Jeoba: “Ndunthitho nuꞌu̱ yä soldado gi zii”. Hänge Jeoba bi ꞌñembi rä Jedeon ge dä japi dä ntsithe nuꞌu̱ yä soldado ha rä däthe, ꞌne dä me̱hni ha yä nguu gatꞌho nuꞌu̱ yä soldado dä ndandiñähmu ꞌne dä yuki pa dä ntsithe. Jeoba bi ꞌñembäbi rä Jedeon: “Ma gä jaꞌi gi ntäte ko nuꞌu̱ 300 yä soldado bi sigi bi ñhani mientra mi tsithe”.

Nubye̱, bi zo̱ho̱ näꞌä rä ora pa dä ntuhni. De nuꞌu̱ 300 yä soldado, rä Jedeon bi heke hñuu yä taxo. Kada nꞌa rä soldado bi umbi nꞌa rä ndäni, ꞌne nꞌa rä antorcha mi o ha nꞌa rä ꞌmada. ꞌNe ngu mädee rä xui, gatꞌho bi fahni ha näꞌä rä ꞌmatha habu̱ mi tsaya yä nkontra, ꞌne gatꞌho bi mu̱di bi pixti yä ndäni, bi tehmi yä ꞌmada, ꞌne bi mafi: “¡Rä majuai Jeoba ꞌne rä Jedeon!”. Mi nuhu nuꞌu̱ yä soldado mñä nkontra, xi bi ntsu ꞌne himbi bädi te bi me̱fi. Gatꞌho bi nextꞌi, ꞌne nuꞌu̱ yä israelita bi ntäte.